Siriusimi inuttat Kangerlussuarmi periarfissarpassuaqarneraraat

- Kangerlussuaq periarfissaqarluarpoq. Illersornissamut politikki ineriartortillugu Kangerlussuaq pingaaruteqarneruleriartuinnarpoq – tamatumalu saniatigut takornariartitsisarfiulluarsinnaavoq.

Siriusimi sakkutuujusimasoq Asbjørn Skjøth Bruun taama oqarpoq, taassumalu suleqatini Jørn Martin Bank, aamma Siriusimi qimussimik alapernaarsuiartortitat ilaat, peqatigalugit suliffeqarfik Arctic Expedition Supply Greenland ApS Kangerlussuarmiittoq upernaaq pilersippaa.

Suliffeqarfik UTV-t atorlugit nunakkut angallassinermut aaqqiissutinik neqerooruteqarlunilu Qeqqata Kommuniani sumiiffinni angallaffiusinnaasutut akuerisani tamani angallassisarpoq.

Aasaq ulapaarfiusoq

- Aasaq manna ulapaarpugut, ilaatigut illersornissaqarfik Albatros Arctic Circlellu Kangerlussuup eqqaani angallappagut. Aammattaaq Sisimiuni suliffeqarfiit suleqatigalugit ATV-nut aqqutini misileraalluta angalavugut.

Arctic Expedition Supply Greenlandip UTV-t Polarisimeersut initaat kiassarneqarsinnaallutillu sumiiffinni amerlanerpaani angallanneqarsinnaasut atortarpaat - aasarlu naallugu takornarianik, sakkutuunik atortunillu assartuisarsimapput.

- Takornarialerinermik ingerlatsisuunnnginnerput erseqqissassallugu pingaaruteqarpoq. Takornarianut toqqaannartumik saaffiginnittuunata suliffeqarfinnut allanut saaffiginnittuulluta assartuinermik ingerlatsisuuvugut. Suliffeqarfimmiit suliffeqarfimmut sullissilluta ingerlatsisuuvugut, inuussutissarsiuteqartunut assartuinermi aaqqiissutinik neqerooruteqartartut, najukkamilu suliffeqarfinnik unammillernissamik pilersaaruteqarnatalu kissaateqanngilagut, Asbjørn Skjødt Bruun oqarpoq.

- Kangerlussuaq eqqaanilu nunataa angallannermut immikkut piumasaqaateqarpoq. Isorartooq, nunap assigiinngilluinnarnera nunallu ingerlaffigiuminaassinnaanera pissutigalugit nalinginnaasumik angallanneq pitsaanerpaajuaannarneq ajorpoq – tamatumanilu UTV-t sumiiffiit biilinik umiatsianillu tikinneqarsinnaanngitsut tikissinnaagatsigit naleqqussarsinnaapput.

Ukiussamut piareersarneq

Arctic Expedition Supply aasaanerani Kangerlussuarmi pingasunik sulisoqarpoq - maannalu ukiussamut piareersaleruttorput.

- Ukiuunerani apummi UTV-nik aputikkoorutilinnik ingerlaartarpugut, taamaammat ukiup ilaannaa sulineq ajorlutalu ukioq naallugu sulinissamut piareersimavugut.

Suliffeqarfik nutaaq Qeqqata Kommunianit aamma ilassilluarneqarpoq.

- Aallartinnitsinni kommuni suleqatigilluarnikuuarput – ilaatigut nunaminertamik tunissuteqarnikkut. Periarfissat takulluarsinnaavaat - sumiiffinnilu suliffissanik ataavartunik pilersitsinissamik soqutiginnilluarput, Asbjørn Skjødt Bruun oqaluttuarpoq.

- Ikiorsimaqaatigut – kommunilu qanimut suleqatigaarput, taassumami aamma nunaminertanut oqartussaallunilu sumi ingerlasinnaanersugut sumilu ingerlasinnaanngitsugut tamakkiisumik nakkutigigaa.

- Tigulluarneqarnerput qujamasuutigaarput, taamaammat maannakkut Kangerlussuarmi Sisimiunilu suliffeqarfiit kattuffiillu suleqatiginerulernissaat anguniagaraarput. Siunissaq ungasinnerusoq eqqarsaatigalugu suleqatigiilernissaq suliassallu nalinginnaasumik aqqutit avataanni suliarineqaraangata eqaannerusumik assartuisarsinnaaneq anguniarneqarput.

Aallaqqaammut Qeqqata Kommunia Kangerlussuarlu qitiutillugit suliniuteqassallutik aalajangerput. Siriusimili inuttaasimasut taakku marluk angusaqarluarusupput.

- Issittumi suliassaqarnerulerneq nunakkullu angallannermik pisariaqartitsinerulerneq eqqarsaatigalugit piffissaq ungasinnerusoq eqqarsaatigalugu Tunumi Avannaanilu aamma angalasarnitta annertusinissaa, kiisalu angallatinik amerlanerusunik anginerusunillu atuilernissarput eqqarsaatigaarput, Asbjørn Skjødt Bruun oqarpoq.