USA-p præsidentiata Kalaallit Nunaannik tiguaaniarluni oqariartuuteqaqattaarnera inuussutissarsiortunut kinguniperlutsitisinnaavoq.
– Allanngujaassuseq naalakkersuinikkullu pissuserissaarneq pisariaqarput. Nalorninartorsiorneq eqqissiviilliornerlu aningaasaliinissamut ajoqutaapput, Sulisitsisut pisortaat Christian Keldsen oqarpoq, taassumalu Amerikamiut præsidentiata ataqqittaatsuliornera mamiatsaatiginerarpaa, Kalaallit Nunaatami USA-llu suleqatigiilluarsinnaanerat periarfissaalluaraluartoq aallaaviugaluarpoq, tamannalu Naalakkersuisut issittumut periusissiaanni 2024-meersumi atuarneqarsinnaavoq.
USA-p præsidentiata Kalaallit Nunaannik tiguaaniarluni oqariartuuteqaqattaarnera inuussutissarsiortunut kinguniperlutsitisinnaavoq.
– Allanngujaassuseq naalakkersuinikkullu pissuserissaarneq pisariaqarput. Nalorninartorsiorneq eqqissiviilliornerlu aningaasaliinissamut ajoqutaapput, Sulisitsisut pisortaat Christian Keldsen oqarpoq, taassumalu Amerikamiut præsidentiata ataqqittaatsuliornera mamiatsaatiginerarpaa, Kalaallit Nunaatami USA-llu suleqatigiilluarsinnaanerat periarfissaalluaraluartoq aallaaviugaluarpoq, tamannalu Naalakkersuisut issittumut periusissiaanni 2024-meersumi atuarneqarsinnaavoq.
– USA-mik niueqateqarnissamut sinaakkutit pitsaapput, taamaammallu Amerikamiut Kalaallit Nunaata tinguarneqarnissaannik oqaaseqarnerat pisariaqarsorinanngikkaluarpoq.
Nunap ineriartornera
Kalaallit Nunaata USA-mut attaveqarnini ukiuni arlalinni ineriartortinnissaa kissaatigigaa, aamma Kalaallit Nunaata USA-llu akornanni toqqaannartumik niuernikkut assartuinikkullu aqqutit pilersinneqarnissaat sulissutigineqartoq Naalakkersuisut Issittoq pillugu periusissiaanni ilaatigut allassimavoq. Kalaallit Nunaattaaq USA-mi naalagaaffiit immikkoortui, Alaska aamma USA-p avannaata kangiani sineriaat ilanngullugit, suleqatigalugit ineriartortitserusuppoq. Illersornissamuttaaq isumaqatigiissutip 1951-imeersup Kalaallit Nunaannut iluaqutaanerusumik Kalaallit Nunaannut ilanngunneqarnissaanut suliniuteqartoqarpoq.
– Amerikamiut maannakkut oqariartuutigisaqattaagai Kalaallit Nunaata Kalaallit Nunaannilu suliffeqarfiit ineriartortinnissaanut ukkatarinninerput allanngortinngilaat, Christian Keldsen oqarpoq.
Taamaatitsiinnarnerit
Takornariartitsisartut ilaasa angalasussat taamaatitsiinnartarnerat piffissami kingullermi misigaat, akerlianik akunnittarfiit neriniartarfiillu tusagassiortunik tusagassiuutinillu suliaqartunit tikeraat ukiup ingerlanerani amerlavallaannginneranni Kalaallit Nunaannut tikerartut amerleriarput.
Christian Keldsen naapertorlugu USA-mi pissutsit pissutaallutik sulisitsisut ilaasa sulisussarsiornertik ajornartorsiutigilersimavaat. Aningaasaliinissamut piumassuseq appariartorpoq, pisortaanerlu naapertorlugu Kalaallit Nunaanni eqqissiviilliornerit annertusiartortillugit aningaasaliinissamut piumassuseqarnerup appariartuinnarnera unammillernangaatsiarpoq.
- Siunissami pilersaarutigisinnaasavut tamarmik aningaasaliissuteqarnermik tunngaveqarput, pissutsillu maannakkut atuuttut aningaasaliinissamut kajumilersitsinissamut ajornartorsiutaapput.
Amerikamiit aningaasaliinerit
Naak tamanna eqqumiiginaraluartoq Amerikamiut Kalaallit Nunaanni aningaasaliinissaat anguniarlugu ilungersorluni ukiuni kingullerni suliniuteqartoqarpoq.
– USA-mit pisut tamarmik apeqquserneqarnissaat maanna pisariaqarpoq, USA-lli ukiorpassuarni Kalaallit Nunaannut ikinngutaalluarsimanera eqqaamasariaqarparput. USA-p maanga Nunatsinnut kajungilersinnissaa Naalakkersuisut ilungersorlutik sulissutigaat, aamma amerlasuutigut aningaasaliissuteqarnissamik suleqateqarnissamillu USA-mut kajumissaarisoqartarpoq. Amerikamiut aningaasaliissuteqarnerat maanna takusinnaagatsigu pissutsinut maannakkorpianut toqqaannartumik attuumassuteqarunanngilaq, aammattaarli siunissaq ungasinnerusoq eqqarsaatigalugu iliuuseqarnerup kinguneranik ersersitsivoq.
Nukittuffipput nunanit allanit suleqateqarnermiippoq
Christian Keldsen naapertorlugu Kalaallit Nunaata Danmarkimut EU-mullu attaveqarnera qularutissaanngitsoq politikerit ataatsimoorlutik erseqqissumillu takutissallugu aamma akisussaaffeqarput.
– Suleqatigisatta qularnaatsuunissaat ataatsimoorniarnitsinnik oqalunnermi aamma pineqartariaqarpoq. Aningaasaqarnikkut sakkutooqarnikkullu pissaanilissuunngilagut, taamaammat Danmarkimut EU-millu suleqateqarnerput nukittuffigaarput. Kalaallit Nunaat USA-p eqqaaniippoq, kiap allap Kalaallit Nunaannik soqutiginninnissaa eqqarsaatigigaanni namminiilivinnissamik kissaateqarnerput USA-mit qularnanngitsumik nalornissutigineqarsinnaavoq. Tamanna eqqumaffigisariaqarparput, aamma pissusilersornitsigut attaveqatigiinnitsigullu sunniuteqangaarsinnaavugut, Christian Keldsen oqarpoq.
