Sulisut nunanit allaneersut ukkatarineqarnerulersut

Sulisut nunanit allaneersut nunami najugaqarnissamut sulisinnaanermullu akuersissuteqarlutik suliaqarfinni assigiinngitsuni agguataarsimasut 2025-mi juunip 30-ani nalunaarsorsimasut 669-iupput, kikkullu tamarmik sulisussanik amigaateqarnerup qaangernissaanut ikiuunnisamminnut tikilluaqqusaapput, Isumaginninnermut, Suliffeqarnermut, Nunamut Namminermut Avatangiisinullu Naalakkersuisoq Bentiaraq Ottosen oqarpoq.

Tamanna ilaatigut Inatsisartunut ilaasortamut Avannaata Kommunianilu borgmesterip tulliata siulliup Jens Napaattuup, Naleqqameersup, paragraf 37 naapertorlugu apeqquteqaataanut akissummi atuarneqarsinnaavoq.

Sofie Svendsen, Kalaallit Nunaanni sulinermik inuussutissarsiutillit kattuffianni annerpaami SIK-mi siulittaasup tullia naapertorlugu nunanit allaneersut tamarmik assigiimmik atugaqarnissaat qulakkeerniarlugu suliniuteqartoqarpoq. Taakkuli atorneqarnerisa annertussusaannik nakkutilliisoqarnerunissaa aamma pisariaqartinneqarpoq.

 Misissuineq siulliusussaatitaanerlu

Suliffeqarfinni assigiinngitsuni avataaneersut siullermeerlutik sulinissamut najugaqarnissamullu akuersissuteqartut 669-it nalunaarsorneqarsimapput. Suliffeqarfiit assigiinngitsut pineqarput, soorlu sanaartorfiit, neriniartarfiit, eqqiaanermi-, akunnittarfinni unnuisarfinni kiffartuussinerit assigisaanilu.

Qallunaat nunani allamiunut inatsisaat taavalu Kalaallit Nunaannut suliffissarsiortut killilersimaarnissaat pillugu lnatsisartut inatsisaat toqqammavigalugit, Kalaallit Nunaanni politiit, Akileraartarnermut Aqutsisoqarfik, Kommuni taavalu Namminersorlutik Oqartussat suleqatigiillutik nunanit allaneersut sulisinnaatitaanermut taavalu najugaqarnissamut akuersissuteqarnersut suliffeqarfinnut ornigunnikkut misissuineq ingerlattarpaat. Nakkutilliinermi nunanit allaneersut sulisinnaatitaanermut kiisalu najugaqarnissamut akuersissutip atuuffia misissussallugu qulakkeerneqartartoq, Bentiaraq Ottosen paasissutissiivoq.

Nittartakkatigut atorfinnik inuttassarsiuussinermi nittarsaassinikkut sulisinnaasut Kalaallit Nunaanniittut siulliusussaatitaanerat qulakkeerneqartartoq, naalakkersuisoq paasissutissiivoq.

- Suliffeqarfiit nunaqavissunik atorfinitsitsinissamut pissarsisinnaanngikkunik avataaneersunik sulisussanik atorfinitsitsinissamik kommunemut akuersissummik qinnuteqarsinnaatitaapput, Bentiaraq Ottosen paasissutissiivoq.

 Inatsimmik sukaterineq 

Naalakkersuisut suliffissuarni aalajangersimasuni nunanit allaneersunik sulisussanik imaluunniit sumiiffinni sulisussanik pingaartumik kiffartuussinermi eqqiaanermut isumaginninnermut tunngasuni killilersuinissamik pilersaaruteqarnersut Jens Napãtôᴋ'-p paaserusuppaa.

Naalakkersuisut sulisussanik killilersuinissamik pilersaaruteqanngitsut aamma sumiiffinni sulisussanik pingaartumik kiffartuussinermi eqqiaanermut isumaginninnermut piumasaqateqarnialersaanngitsut akissuteqaammi atuarneqarsinnaavoq. Suliffeqarfiit namminneerlutik sulisussarsiortarput.

- Naalakkersuisut innuttaasut sulisinnaasut tamarmik sulinissaat politikkerivaa, kisianni suliffeqarnermut aaqqissuusseqqinnissaq siunnerfiuvoq. Assersuutigalugu siullertut taaneqarsinnaavoq Suliffissarsiornermut ikiorsiissutinut inatsit sukaternissaa siusinnerpaamik upernaaru 2026-imi Inatsisartunut saqqummiunnissaa sulissutigineqarpoq.

- Nunat allamiut inatsit Danmarkimi oqartussaasut suli akisussaaffigaat. Taamaasilluni iliuuseqarfigisinnaasanut Naalakkersuisut suliffeqarnermut inatsisitigut aaqqissuusseqqinnissamut ilaatippaa inatsit nutaanngilisoq Kalaallit Nunaanni avataaniit suliartortut killilersimaarnissaannut inatsit nutarsassallugu, Bentiaraq Ottosen paasissutissiivoq.

Inatsisissap nunaqavissut salliunneqarnissaanut qulakkeerinnittussaammat suliffeqarnermut attuumassutillit inatsisiliornissamut akuutinnissaat aamma naatsorsuutigineqarpoq.

Kikkut tamarmik tikilluaqqusaapput 

lsumaginninnerup iluani eqqaavilerinermullu tikisitanik sulisoqarsinnaanera pillugu eqqarsaatersuuteqartoqartoq saqqummiunneqareernikuuvoq, taamaammat Naalakkersuisut tamakku takorloorneraat Jens Napãtôᴋ'-p paaserusuppaa.

- Naalakkersuisut isumaqarput suliffeqarfiit pisortanit pigineqartuuppata immaqaluunniit namminersortuuppata, sulisitsisut akisussaaffigigaat suliffeqarfimminni sulisussarsiortarnissaminnut atorfinitsitsisarnissaminnullu. Sulisussanik amigaateqarnermi kivitseqataasinnaasut tamarmik tikilluaqqusaapput, Bentiaraq Ottosen paasissutissiivoq.

Tikisitat nunaqavissut assigalugit akileraartarput.

Naligiimmik atugassaqarneq 

Nunanit allanit tikisitat 200-t missaanniittut, Kalaallit Nunaanni suliffeqarfinni assigiinngitsuni sulisut, SIK-mut ilaasortaasut, Sofie Svendsen oqarpoq. Taakkulu nunaqavissut assigalugit atugassaqartinneqarnissaat kattuffimmit pingaartinneqarpoq.

- Nunanit allaneersut suliffimminni atornerlunneqartartut takusareerpagut. Suliffeqarfinni namminersortuni nakkutigineqannginnerusuni ajornartorsiut tamanna nalinginnaanerpaasarpoq, taamaattumik atugassarititaasut atuuttut naapertorlugit sulinissaat qulakkeersinnaaniassagatsigu SIK-mut ilaasortaanissaat kissatigisarparput.

- Sulisut nunanit allaneersut amerlanerusut ilaasortanngortinniarsaraavut, ilaatigut quppersakkat aalasulianillu paasititsiniaanikkut, oqarpoq.

Kalaallit Nunaanni sulisartunik allamiunik nakkutilliineq sukaterneqartariaqartoq, Sofie Svendsen, siornatigut Nuummi immikkoortortaqarfimmi siulittaasoq qanittukkullu nuna tamakkerlugu kattuffimmi siulittaasup tulliatut qinigaasoq, isumaqarpoq.

Mianersornissaq pisariaqartoq 

Jens Napatôĸ’-p Kalaallit Nunaanni suliffinni sulisussaaleqiffiusuni nunanit allaneersut sulisorineqartarnerat ajornartorsiutiginngilaa.

- Inuilli taakku piffissami killilimmi Kalaallit Nunaanniittarmata suliffiit taakkua nunaqavissunik inuttalerneqarnissaat sulissutigisariaqarparput pingaaruteqarpoq oqaatigissallugu.

- Taamaattumik suliffissat taakkua nunaqavissunit inuttalerneqarsinnaanersut qulakkeeqqaartinnagu nunanit allanit sulisussarsiornissarput mianersuutigisariaqarparput.

Jens Napãtôk-p suliaq malinnaavigissallugu tamatumunngalu atatillugu Naalakkersuisunit akissutinik amerlanerusunik pissarsiniarluni, ilaatigut inuit taakkua ilaat qassit Kalaallit Nunaanni najugaqalivissimanersut pillugu paasiniaaniarluni, oqarpoq.