Takornariartitsisartoq umiatsialiornermik aallartitsisoq

Lars Anker Møller, Tasiilami takornariartitsisarfimmik Arctic Dreamsimik ingerlatsisoq, Anker Baade-mik taallugu umiatsianik immikkut sanaanik sanaartortalerlunilu tunisassiorluni aallartippoq.

Tunumi takornariartitsinermik ukiut 20-t sinnerlugit misilittagaqartoq, Litauenimi amutsivik Gliseri suleqatigalugu takornarianut aalisartunullu aluminiumik angallatinik pitsaanerpaanik ineriartortitsinermik suliaqarput.

Taassuma nammineerluni aluminiumik umiatsiaq siulleq, oqimaassusia aserfalatsaaliornissaalu pisariinnerunerat pissutigalugit, 2018-imi pisiaraa. Umiatsiap ineriartortinneqarneranut kingusinnerusukkut akuliuppoq, umiatsiap iluatungaa, atortorissaarutaalu siunertaamut anguniagaanut tulluarsarlugit.

– Umiatsiaq nutaaq Explorer 9-mik taaguuserneqartoq ilusilersorlugulu missigersuusiorparput. Tassanilu issiaviit assaannarnik mersukkat, umiatsiap aquuteralaanut nipikillisaatit, aquttullu issiavia sissingusalik pilersippavut. Taamaalilluta umiatsiaq piumasaqaatinik naammassinnittoq pitsaanerpaaq pilersipparput. Umiatsiaq takornariartaat siulleq aqqaneq-marlunnik ilaasoqarsinnaasoq 2018-imi naammassineqarpoq, Lars Anker Møller oqarpoq, innersuussutigalugu umiatsiaq sananeqarnermini nalinginnaasumik CE-mik nalunaaqutsigaassagunartoq.

Toqqagassat assigiinngitsut

Maannamut angallatit G9-Explorer tallimat aamma angallat ataaseq G8 Kujataani Ilulissanilu takornarialerisunut tunisimalereerpai.

– Umiatsiaq siulleq sanaartugarput Tasiilamut 2024-mi aasakkut tikippoq, 15.000 kilometerit sinnerlugit ukiup ingerlanerani angalavoq. Sikorasaartumi, mallersumi avatangiisinilu allani ilungersunartuni – pissutsini assigiinngitsuni misilerarneqarluni. Qularutiginngilluinnarlugu oqarsinnaavunga umiatsiaq taanna Kalaallit Nunaanni takornarialerisut umiatsianut sukannersunik piumasaqaatigineqartunut naammassinnippoq, Lars Anker Møller oqarpoq.

Ankerip umiatsiatsialaa

G12 sapaatit-akunnialuinnaat qaangiuppata saqqummersinneqassaaq.

Angallat siulleq sananeqarmat pisinikoq, Litauenimut amutsivimmut tikeraarluni misilittakkani oqaluttuaralugillu suut pitsanngorsaataasinnaanersut tikkuartorsimavai. Taamaammat G12-p sananeqarnerani suut tamarmik akuersissutigineqaqqaartussaammata sivisusimasoq, Lars Anker Møller oqaluttuarpoq.

– G12-i siulleq Ilulissani piffissami qaninnermi takusinnaalissavarput, Lars Anker Møller oqarpoq.

G12 12 meterinik takissuseqarpoq, 12 + 2-nik ilaasoqarsinnaalluni. Siuani aquanilu matoqarpoq, siornanilu perusuersartarfeqarluni. Umiatsiaq 350 hk-nik marlunnik motooreqarpoq, orsussaasivialu 1500 liiteriulluni, taamaalilluni umiatsiaq nunatsinni atugassarititanut pitsaasumik naleqqusarneqarsinnaavoq. Atortut tungaatigut G9-tut ippoq, aammattaaq angallatinut annerusumik piumasaqaatigineqartunik immikkut atortoqarpoq. – Isumaqarpugut tuniniaavinniittunut unammillersinnaasumik sanasimalluta, taakkualu akigititaata affaanut, Lars Anker Møller oqarpoq.

Takornariaqarnermik ingerlatsisut tunaartarineqartut

Lars Anker Møller naapertorlugu umiatsiat Europameersut benziinamut tankiisa mikivallaartarnerat ajornartorsiutaasarpoq.

- Amerlasuut ilisimavaat angalassatillutik dunkimik orsussamik peqqumaateqartariaqartarlutik. Taamaattumik G9-mi 500 literinik tankiuteqarpugut, G12-imilu 1500 literinik, nalinginnaasumit annertunerungaartumik.

Lars Anker Møllerip takornarialerisut, ingammik aallarnisaasut takornarianik angallassinissamut umiatsiamik aqqaneq-marlunnik ilaaffiginqarsinnaasumik pisariaqartitsisut, tunaartarai.

– Atortorissaarutit eqqarsaatigilluakkamik toqqarneqartarput. Naammaginanngitsoqanngilaq, pisariaqartinneqartut taamaallaat atorneqarput. Ilaasut aquttullu ilorrisimaarnissaat pingaartipparput. Aquttup issiavia sissingusaqarpoq, ilasaatillu tigummivii tigummineqarnissaannik tulluarsagaalutik, angallatillu nipituallaannginnissaa eqqarsaatigalugu angallatip ikerani nipaallisaasersugaallutik. Tamanna qitip siutillu ajoquserneqannginnissaannik pinaveersaartitsineruvoq, piffissap ingerlanerani tamanna pisinnaammat – immaqa maannakkut malugineqarsinnaanngilaq, kisianni ukiut qulit ingerlareerpata kinguneri malugineqarsinnaassapput, nangillunilu Lars Anker Møller oqaatigaa G9 aamma G12 sapaatit akunnerini 16-18-ini sananeqartartut.

- G9-lli pequusivimmi pigilernissaat anguniarparput, motoorimik annaassiniutinillu ikkussuinissamut piffissartuutiginerata sivikinnerusalernissaa anguniarlugu.