Tanbreezip piiaanissamut akuersissutaata allamut tunniunneqarnissaa naalakkersuisunit akuerineqartoq
Australiamiut Amerikamiullu suliffeqarfiutaat Critical Metals Corp. Kujataani Killavaat Alannguanni piiaanissamut akuersissutinik tigusinissamut Naalakkersuisunit akuerineqarput.
Australiamiu Greg Barnes Killavaat Alannguanni ujaasinissamut 2001-imi akuerineqarpoq, suliffeqarfiutaalu tassani piiaanissamut akuersissummik 2020-mi tunineqarpoq. Akuersissut maanna Australiamiut Amerikamiullu suliffeqarfiutaannut Critical Metals Corpimut pisortatigoortumik tunniunneqarpoq. Greg Barnesili suliffeqarfimmi nutaami siulersuisuni suli ilaasortaavoq.
Assi: Greg Barnes
Greg Barnesip suliffeqarfiutaata Rimbal Pty Ltd-ip Killavaat Alannguanni piiaanissamut akuersissutaata Australiamiut Amerikamiullu suliffeqarfiutaannit Critical Metals Corp.-imut toqqaannanngitsumik tunniunnissaa Naalakkersuisut akuersissutigaat. Tamanna aatsitassanut naalakkersuisoqarfimmit tusagassiuutinut nalunaarummi saqqummiunneqaqqammersumi atuarneqarsinnaavoq.
Toqqaannanngitsumik nuunneqarnera ingerlatseqatigiiffiup akuersissummik piginnittup allanngortinneqarneranik, akuersissutilli Tanbreez Mining Greenland A/S-imi suli nalunaarsoqqaneranik isumaqarpoq.
Akuerineqartoq tamakkiisumik naliliineq tunngavigalugu
Aatsitassanut naalakkersuisuusoq nutaaq, Mute B. Egede (IA) toqqaannanngitsumik tunniussinermut atatillugu oqaaseqarpoq:
- Kalaallit Nunaanni ingerlatseqatigiiffik Tanbreez Mining Greenland A/S suli akuersissummut pisinnaatitsissummik pigisaqartuuvoq. Akuersissuteqarnermi matumani piginnittut tunuliaqutaasut taamaallaat allanngortinneqarput.Toqqaannanngitsumik allamut tunniussereernerup kingorna ingerlatseqatigiiffik Critical Metals Corp, Tanbreez-imi aalajangiisuusumik sunniuteqalerpoq, tassani akuersissuteqarnissaq sioqqullugu Rimbal Pty Ltd. inissisimasimalluni.
Naalakkersuisut aatsitassarsiornissamut akuersissummik tunniussigaangamik aatsitassanut inatsimmut naapertuuttumik pisoqartarnera pingaaruteqartoq nangillunim oqarpoq:
- Naalakkersuisut tassunga atatillugu toqqaannanngitsumik allamut tunniussinissaq ataatsimoortumik nalilersorpaat, ilanngullugu aningaasaqarnikkut teknikkikkullu pisinnaasaqarnissamut piumasaqaat suli naammassineqaannassanersoq. Suliassap allamut tunniunneqarnerani tassunga tunngaviusut imaluunniit siunissami periarfissat ajorseriartinneqassanngillat, ilanngullugit inuiaqatigiinnut, avatangiisinut mianerinninnissaq aammalu piujuartitsiviusumik ineriartortitsinerup suli qulakkeersimaneqarnissaa, Múte B. Egede oqarpoq.
2020-mi piiaanissamut akuerineqartoq
Tanbreez Mining Greenland 2020-mi ukiuni 30-ni aatsitassamik eudialytimik piiaanissamut akuerineqarpoq.
Ingerlatseqatigiiffik avatangiisinut sunniutinut naliliinissamut (VVM), inuiaqatigiinnut iluaqutaasumik piujuartitsinissamik nalilersuinissamut (VSB) kiisalu iluaqutaasumik sunniutissat pillugit isumaqatigiissuteqarnissamut (IBA) akuerisaareerpoq, piiaanerulli aallartinnginnerani piiaanissamut pilersaarut matusinissamullu pilersaarutit suli Naalakkersuisut akuersissuteqarfigisariaqarpaat.
