Toke Binzer Tusassimit Royal Greenlandimut nuulersoq

Pisortaq Toke Binzer maannamut qujasoq, sulinerminilu Royal Greenlandimi ingerlaqqittussanngortoq Tusass A/S tallimanngornermi nalunaarpoq. 

Tusass Toke Binzerip aqutsinerani kusanarluartunik assigiinngitsunik angusaqarsimavoq. Taakkulu suliffeqarfiup nunatsinni nunanilu allani inissisimaviata pingaarutaanik erserseeqataasimapput. 

- Suliffeqarfiup ingerlalluarneranut tunuliaqutaasutut tassa piginnittut siulittaasullu qanimut pitsaasumillu suleqatigilluarsimaneri assut pingaarutilimmik inissisimaqataasimapput, taamatullu minnerunngitsumik Tusassimi suleqatigiit piginnaasaqarluarlutik tunniusimallutillu suliaminnik takutitsilluarsimanerat pisooqataalluni, Toke Binzer oqarpoq.

Toke Binzer aningaasaqarnermut pisortatut 1. oktober 2022-mi atorfinippoq, tamatumalu kingorna 1. marts 2024-mi pisortaanertut atorfinitsinneqarluni, maannalu tassa taanna Royal Greenlandimut nuuttussanngorpoq.

- Soorunami Toke Binzerip Tusassimut tunniussimasai, aqutseqataasullu ilagalugit angusimasaat qujarunnarput. Suliffeqarfiullu ineriartornissaanut sunneeqataalluarsimavoq tamannalu qujanaqaaq, siunissamilu Royal Greenlandimi sulilluarnissaanik kissaapparput,  Tusassip siulersuisuini siulittaasoq, Bodil Marie Damgaard oqarpoq.

Jonas Hasselriis pisortaanerugallartutut atorfeqassaaq

Maanna pisortaanerup tullersortaa Jonas Hasselriis pisortaanertut inissinneqarallassaaq, taamaalillunilu periusissiaq maanna ingerlanneqartoq taassuma akisussaaffigilertussaassavaa.

Tamanna isumaqarpoq, nuna tamakkerlugu atuisut pitsaasumik sullinneqarnissaat, akit appasinnerusut, immap naqqatigut kabeli nutaaq aamma qarasaasiaqarfissuaq nutaaq, taakkulu saniatigut pitsanngorsaanerit allat allannguuteqaratik ingerlaannarnissaat qulakkeerniassallugit.

Bodil Marie Damgaard ima ilaliivoq: 

- Tusassip maannamut inissisimavia, ineriartortinneqarluarsinnaasoq aqutsisunillu ilusilersorneqarsimasoq, pitsaasumik toqqammaviulluarpoq. Siunissamilu qaninnermi, Jonas maanna pisortaaninngorallartussaq aqutsisoralugu, suliffeqarfimmi aalakkaatsumik ingerlaavartumillu aqutsinikkut inissisimasoqarsinnaanissaa anguneqarluarumaartoq qularnanngilaq.

Binzerip aqutsinerani angusat pitsaalluartutut nalilikkat ilaat makku Tusassip tungaanit immikkut taaneqarput:

• Suliffeqarfiup oqaluttuarisaanerani aningaasatigut inissisimavik pitsaanerpaaq anguneqarpoq, tamannalu suliffeqarfiup aalakkaatsuuneranik aammalu piujuartitsisinnaaneranik takutitsisuuvoq. 
• Illersornissamut isumaqatigiissut aqqutigalugu immap naqqatigut kabelimik pilersitsiniarnermik 3 milliardit koruuninik qulakkeerisinnaaneq - aningaasaliineq tamanna Nunatta siunissami digitalitigut inissisimavissaanik pitsaasumik qulakkeerinneqataasussaavoq. 
• EU-mit 400 millionit koruuninit ikinnerunngitsunik taperserneqarneq. Tamassumalu  Tusassip suliniutaanut  takorluugaanullu nunat tamalaat qanoq  tapersiilluartiginerat takutippaa. 
• ISAE 3402-uppernarsaasigaaneq, Tusassip ingerlatseqatigiiffimmik ingerlatsilluarnera aammalu isumannaallisaanikkut pitsaassutsikkullu inissisimalluarnera qulakkeerpaa.