Greenland Airportsip aningaasaqarnini tamanut saqqummiuttariaqarpaa. Siulersuisut aamma akisussaaffeqarput, Naalakkersuisullu siulittaasuata Naalakkersuisoqarfiata erseqqissartariaqarpaa Namminersorlutik Oqartussat ingerlatseqatigiiffiutaannut naatsorsuutit pimoorunneqartariaqartut.
Taama isumaqarpoq Transparency International Greenlandip siulittaasua Inuk Lundblad, Greenland Airportsip 2024-mut naatsorsuutaani 130 millionit koruunit qanoq inissisimanersut nassuiarumaneqannginnerat aallaavigalugu.
Greenland Airportsip aningaasaqarnini tamanut saqqummiuttariaqarpaa. Siulersuisut aamma akisussaaffeqarput, Naalakkersuisullu siulittaasuata Naalakkersuisoqarfiata erseqqissartariaqarpaa Namminersorlutik Oqartussat ingerlatseqatigiiffiutaannut naatsorsuutit pimoorunneqartariaqartut.
Taama isumaqarpoq Transparency International Greenlandip siulittaasua Inuk Lundblad, Greenland Airportsip 2024-mut naatsorsuutaani 130 millionit koruunit qanoq inissisimanersut nassuiarumaneqannginnerat aallaavigalugu.
– Greenland Airportsip ingerlatseqatigiiffimmini suut tamarmik qanoq ingerlanneqarnersut eqqortumik saqqummiuttariaqarpai. 130 millionit koruunit naatsorsuutini eqqortumik allassimanersut imaluunniit ingerlatsineq pillugu eqqunngitsumik takutitsisimanersut erseqqissumik akissuteqarfigisariaqarpaat. Ammanerusumik iliuuseqartannginnerat ajornartorsiutaavoq, oqarpoq.
Inuk Lundbladip pingaartippaa suliffeqarfiit inuiaqatigiinnit pigineqartut tamanut naammaginartumik saqqummiunneqarnissaat.
– Innuttaasutut naatsorsuutigisinnaavarput suliffeqarfiit Namminersorlutik Oqartussanit pigineqartut iliuuserisaminnut nassuiaasinnaassasut, tassami innuttaasunut taama pingaaruteqartigigamik inuiaqatigiinnit pigineqarput.
Sumiiffimmi inissisimaneq iluaqutissartaqarlunilu akornutissartalik
Greenland Airportsip apeqqut erseqqissumik akissutissaqartinngilaa, tassami aningaasat taarsigassarsiat allanngortinneqarnerannit iluanaarutigineqartut 2024-mut naatsorsuutinut ilanngunneqarsimapput, ingerlatseqatigiiffiup ingerlatsinerata qanoq aningaasanik katersisimanera takutillugu.
Aningaasat isertitat aningaasanik anisunit amerlanerunersut naatsorsorneqaraangata, naatsorsuutitigut qanoq inissisimanerat aalajangiisuusarpoq.
2024-mi naatsorsuutit takutippaat ingerlatsinermi aningaasat kaaviiaartut 87 million koruunit missaannik sinneqartooruteqartut. 130 millionit koruunit taakkununnga attuumassuteqanngitsut ilanngarneqarpata, amigartoorutit 43 millionit koruunit missaanniissapput.
Inuk Lundbladip erseqqissarpaa aningaasat ukiumoortumik nalunaarusiami qanoq inissinneqarnerat kisiat apeqqutaanngitsoq.
– Greenland Airportsip naatsorsuutai pillugit apeqqutit aamma attaveqaatit pingaarnerusut qanoq artornartiginerat qanorlu aqunneqarluartiginerat pillugu paasisaqarnerunissamut tunngassuteqarput, oqarpoq.
Immikkut ilisimasaqarneq amigaataavoq
Greenland Airports taarsigassarsiat nalikilliartorneranni iluanaarutit mittarfinnik ingerlatsinermi isertitatut naatsorsuunneqarsinnaasut Sermitsiamit aperineqarami ima akivoq:
- Inatsisitigut naatsorsueqqissaarnermilu najoqqutassiani aalajangersakkat iluanni aningaasat ingerlaarneri qanoq immikkoortiterneqassanersut soorunami assigiinngitsunik isumaqarfigineqarsinnaavoq.
TRANSPARENCY INTERNATIONAL
Transparency International Greenland nunani tamalaani suliniaqatigiiffiup Transparency Internationalip Kalaallit Nunaanni immikkoortortaqarfigaa.
Kattuffiuvoq politikkikkut attuumassuteqanngitsunik ilaasortaaffigineqartoq, ilaatigut pisortat ingerlatsineranni ammasumik periuseqarneq, namminersortut niuerneranni ammasumik periuseqarnissaq, inuiaqatigiinnilu tamanut ammasumik periuseqarluni ingerlatsinissamik sulissuteqartoq.
- Tamatumali ukiumoortumik nalunaarusiap tamarmiusup, eqqortumik saqqummiussineranik naliliisimanerput allanngortinngilaa, allakkatigut akissummi allassimavoq.
Greenland Airports-ip aamma ingerlatseqatigiiffiup kukkunersiuisuisa Grønlands Revision-ip februaarimiit ingerlatseqatigiiffimmut, Grant Thornton Danmarkimut ilaalersut, tamanna isumaqatigaat.
Mittarfiliuteqatigiit kukkunersiuisullu nassuiaarusunngillat naatsorsuinermi tamatumani aalajangerneq ilisimatuussutsikkut qanoq tunngavissaqarluartiginersoq.
Greenland Airports-illi 2025-mut naatsorsuutaani kukkunerit nassuerutigineqarput. Kukkunerit ilaat pissutigalugu ingerlatsineq aningaasanut nakkaatitsivimmut 364 million koruuninik amerlanerusunik tapiissuteqartutut isikkoqalerpoq.
130 millionit koruunit apeqquserneqarnerat oqaatigineqartutut ukiup siuliani pivoq. Aningaasat taakku aamma kukkusumik inissinneqarsimappata, ukiumoortumik nalunaarusiani marlunni tulleriinni aningaasat qanoq amerlatigisut ingerlatsiviup karsianut ikisimaneri pillugit pitsaasumik takutitsisoqarsimavoq, pissutsit piviusut akerlianik.
Siulersuisut tikkuarneqarput
Greenland Airportsip siulersuisui akisussaaffimmik maanna tigusisariaqartut, ingerlatseqatigiiffiullu naatsorsuutai pillugit iliuuseqartoqartariaqartoq, Inuk Lundblad isumaqarpoq.
– Siulersuisut pisussaaffigaat ingerlatseqatigiiffiup tamanut ammasumik nalunaarutiginissaa. Ingerlatseqatigiiffiup iluani kukkunersiuisoqariinngippat, peqalertariaqarnersoq siulersuisut tamanna eqqarsaatigisariaqarpaat. Aamma soorunami Siulittaasup Naalakkersuisoqarfiata ingerlatseqatigiiffik nakkutigisariaqarpaa.
Naalakkersuisut ingerlatseqatigiiffiit aalajangigaannut akuliuttussaannginnerat siunertaassannginnami?
– Ilumoorpoq, tunngaviusumik suleqatigiinnermut najoqqutassiaq atuuttoq. Naalakkersuisulli Siulittaasuata Naalakkersuisoqarfia ammasuunissamik politikkeqarnissamik qulakkeerinnittuusinnaavoq. Naalakkersuisoqarfiup nammineq aqutsinermut allagaani ammasuunissaq pingaaruteqartutut taaneqareerpoq, Inuk Lundblad oqarpoq.
Naalakkersuisut ingerlatseqatigiiffinnut Namminersorlutik Oqartussanit pigineqartunut aqutsinermut allagaataani erseqqissarneqarpoq ammasuunerup pingaaruteqassusia, ilaatigut sulisut, pisisartut pilersuisullu ingerlatseqatigiiffiit ingerlatsinerat, aningaasaqarnerat siunissamilu periarfissaat pillugit isummersinnaaqqullugit.
Allaaserisami aamma allassimavoq suliffeqarfiit sapinngisamik ammanerpaasariaqartut, tamannali ingerlatsinerminni atugassarititaannut ajoqutaasinnaanngilaq.
– Naalakkersuisoqarfik Greenland Airportsimut ingerlatseqatigiiffinnullu allanut tamanut suli pimoorussinermik ersersitsisariaqaraluarpoq, Inuk Lundblad oqarpoq.
Transparency Internationalip Greenland Airportsimut isumaa Sermitsiap saqqummiuppaa, siulersuisunilu siulittaasumit Jens Wittrup Willumsenimit akissutisivoq. Taassuma akissutai allaaserisami allami saqqummiunneqassapput.
