Nuuk Centerimi kaffisorniartarfiit ilaanni minutsini 20-ni issiareersugullu Patrick Abrahamsen kiisami ingippoq. Naapinnissaanut isumaqatigiissuteqarfigereeraluarparput, oqarasuaataali iserattali ikinnerpaamik pingasoriarluni sianerpoq.
Utaqqinitsinni oqarasuaamminik oqaluussiutaa sumi tamani pisoqattaarpoq, pitsianngitsorlu qarasaasiaminukarluni mailit akiartortarlugit.
Nuuk Centerimi kaffisorniartarfiit ilaanni minutsini 20-ni issiareersugullu Patrick Abrahamsen kiisami ingippoq. Naapinnissaanut isumaqatigiissuteqarfigereeraluarparput, oqarasuaataali iserattali ikinnerpaamik pingasoriarluni sianerpoq.
Utaqqinitsinni oqarasuaamminik oqaluussiutaa sumi tamani pisoqattaarpoq, pitsianngitsorlu qarasaasiaminukarluni mailit akiartortarlugit.
- Ullormut nalunaaquttap akunneri sisamat saniatigut pisariaqartikkaluarpakka, Patrick Abrahamsen oqarpoq.
Saaffiginnittartut USA-p Venezuela januaarip pingajuani saassutereeraalu amerleriapiloorput.
– Taamanili saaffiginnittoqartualerpoq saaffiginnittullu amerliartuinnarput.
Nunarpummi ukkatarineqalersillugu tusagassiortut nunanit tamalaaneersut tikerarnerat suliassaqartitsingaatsiarpoq.
Suliaqarfik nutaaq
Fixeriuneq nunani tamalaani qangatsiarli takussaaleraluartoq nunatsinni nutaajuvoq. Tusagassiortut nunat allamiut angalatillugit nunani tikitaanni fixerit ikiuuttarput. Assersuutigalugu apersugassarsiorneranni imaluunniit sumiiffimmi kulturi pillugu ilisimasortaasarlutik.
– Tusagassiortut nunanit tamalaaneersut ikiortissarsiuleraangamik kikkunnut tamanut saaffiginnittaqattaalertarput. Ilaanni aqqutissaasinnaasut tamaasa atorlugit suliffeqarfiit allaat saaffigisaqattaalertarlugit.
Trump jr.-lu siorna nunatsinnukarmat aalajangersimasumik saaffissaqanngillat, tassani Patrick isumassarsivoq.
– Aalajangersimasumik saaffissaqanngilaq. Amigaataammallu fixer.gl pilersipparput, Patrick Abrahamsen oqarpoq.
Trump nunarput pillugu oqaaseqaqattaareersorlu fixer.gl pisariaqartinneqartoq paasinarsimmar pilersinneqarpoq. Tusagassiorfiit nunanit tamalaaneersut pisariaqartitsigunik saaffiginniffissaannik pilersitsinissaq siunertaavoq. Nutaarsiassiipallanniartut kisimik pineqaratik, aamma annertuunik piviusulersaarusiorniartut filmiliorniartullu sullissinnaanissaat siunertarineqarpoq.
Patrick nammineerluni fixeriusarpoq, freelancerinilli allanik saniatigut sulisitsisarluni. Naak arlariinnik suliaqartitsigaluarluni angummassinnaanngingajavippoq.
– Ikinnerpaamik qulinik pisariaqartitsigaluarpunga.
Patrickip mobiilia ulluni makkunani atorluavippoq.
Assiliisoq: Arnaq Nielsen
SAR-imi annaassiniartartumiit fixerimut
Patrick Abrahamsen fixeriunermi saniatigut allarluinnarmik inuuniuteqarpoq. Air Greenlandip qulimiguuliani ujaasinermi annaassiniarnermilu atorneqartartumi hoist-operatøriuvoq, tassa annaassiniartoqartillugu kivitsissutilerisuulluni. Tassani ullut 14-ikkaarlugit Kangerlussuarmi Narsarsuarmiluunniit sulisarpoq.
Fixeriuneq piffissani aalajangersimasuni taamaallaat suliffiuvoq, nunarsuarmi nutaarsiassat suuneri apeqqutaallutik suliassat takkullutillu unikaallattarput.
– Pisut pilluinnaleraangata ulapinnartorujussuuvoq, nutaarsiassalli ukkatarineqartut allamut saakkaangata suliassat akuttusisarput. Tassa taamaappoq.
Saaffiginnittut 100-t sinnerlugit
Sapaatilli-akunnera kingulleq saatassaaleqinngilaq, mailikkullu allattut imaaginnavipput.
- 100-nit amerlanerusunnik mailisillungalu saaffigineqarpunga. Ullormut mailit 30-t 50-llu akornanni allagarsisarpunga. Taakkua saniatigut WhatsAppikkut siarngupput. Ingasavippoq, taanna oqarpoq.
Patrick Abrahamsenip oqarnera naapertorlugu nunarput ukkatarineqalersillugu nutaarsiasseeriaatsit assigiinngitsuupput. Nutaarsiassat sukkasuumik suliassat, soorlu aqqusinermi apersuipallannerit siulliullutik takkuttarput. Kingusinnerusukkut oqaluttuat takinerusut suliarineqalersartut.
- Oqaluttuat sivisunerusumik suliassat, takinerusut itisiliinerusullu kingorna takkunnerusarput. Taakkua tusagassiorfinnit angisuuneersuukkajuttarput.
Ileqqorissaarnermi killissat
Naak ulapaarneq suliffeqarfimmut isaatitsisutaalluaraluartoq suliassat assigiinngitsut fixer.gl-imiit nalilersoqqissaartarpaat.
– Ileqqorissaarneq pingaartipparput. Tusagassiortut iserfigeqqusaanngisaminnut ataqqinninngitsut sullikkusunngilagut.
Inuimmi apersorneqartussat fixer.gl-imiit illersornissaat aamma pingaartitaraat.
– Tusagassiorfiit peqatigalugit apersuiartoraangatta apersorneqartussat ileqqorissaartumik pineqarnissartik apeqqutinillu isumaqatigiissutaareersuinnarnik aperineqarnissartik naatsorsuutigisinnaasariaqarpaat.
Taamaammat tusagassiorfiit ilaat itigartittariaqartarpaat, ingammik isumapiloqarnerannik naliliisimatillutik.
– Tusagassiorfeqarpoq sunniiniarnermik suliaqartunik. Taakkua itigartittarpagut. Kikkut suleqatiginerlugit Kalaallit Nunaallu pillugu sunik oqaluttuarniarnersut ilisimasariaqarpoq.
Nunarput pillugu ilisimasaqarneq tuluttoorsinnaanerlu fixeriussagaanni pingaaruteqarluinnartut Patrick Abrahamsenip oqaluttuaraa.
Assiliisoq: Arnaq Nielsen
Oqaluttuat sunniuteqarfigisinnaaneri
Fixeriuneq kiffartuussinerinnaanngitsoq Patrick Abrahamsen isumaqarpoq.
- Uagutsinnut najugaqartunut periarfissatsialaavoq. Nunatta siuarsagassaannaannginnerata takutinnissaata saniatigut tusagassiorfinni nunani tamalaani suut oqaluttuarineqarnissaannut sunniuteqaqataasinnaavugut.
Tusagassiortorpassuimmi nunatsinni pissutsinik ilisimasaqarpiaratik tikittartut amerlapput.
– Oqaluttuarisaanerput, inuiaqatigiit politikkikkullu pisut ilisimasanngilaat. Pissutsinik piviusunik paasisaqarluarnissaannik ikiuussinnaavugut.
Soqutiginninneq nikerartoq
Fixer.gl siorna pilersinneqaraluarluni suli aallartisarneqarpoq. Suliassat takkusimaariarlutik tammakaqittarput. Nunarsuarmilu nutaarsiassat suut ukkatarineqarneri aalajangiisuukkajuttarpoq.
- Nutaarsiassat allat sammineqaleraangata suliassaaruttarpugut. Tamatigulli misilittagaqarnerulertarpugut tullissaani atorluarsinnaasatsinnik.
Tullissaalu qaqugukkulluunniit takkussinnaavoq.
- Politikkikkut pisut apeqqutaapput. Avissaartuunnerit anneruleraangata soqutiginninneq aamma annerulersarpoq, Patrick Abrahamsen oqarpoq.
