Tusass teknikkimut attaveqaasersuutinullu pisortamik atorfinitsitsisoq

Tusass teknikkikkut pisortartaarpoq, taannalu tassaavoq Inooraq Brandt. Taanna Rambøll Grønlandimi pisortatut atorfimminit Tusassimut nuuppoq.

– Sineriammi tamarmi suleqatitta pikkorissut immikkut ilisimasallit, ullut tamaasa Kalaallit Nunaanni ilaqutariit, suliffeqarfiit sullissiviillu pitsaanerpaamik attaveqartinneqarnissaannut qulakkeerinnittuusut, suleqatiginissaat qilanaaraara, Inooraq Brandt oqarpoq.

Inooraq Brandt Teknikkimut Attaveqaasersuutinullu pisortatut Tusassip nuna tamakkerlugu attaveqaatinut atortuisa ineriartortinneqarnissaannut ingerlannissaannullu akisussaanerpaassaaq, taakkulu Kalaallit Nunaanni attaveqaatit tunngavigaat, Tusass ilisimatitsivoq.

Atorfinitsitsineq „peqqissaartumik sulisussarsiortoqareernerata kingorna“ pisimasoq Tusassimi pisortaaneq Jonas Hasselriis oqarpoq.

– Aqutsinermi misilittagaqarneq, suliamut tunngasunik ilisimasaqarneq, aammali nunap immikkoortuanik paasinninneq siunissamilu periarfissaqarsinnaaneq pingaartippagut Taamaammat Inooraq, nunatsinni inuussutissarsiornermi suliniuteqarnermilu misilittagaqarluartoq, atorfinitsissinnaagatsigu naammagisimaarluinnarpara.

Inooraq Brandt Tusassimi atorfittaamini oktobarip aallaqqaataani 2026-mi sulilissaaq.