ALLAASERISAQ AKILIGAQ
Umiatsiaararsortunut ilinniarfik nutaaq
Namminersorlutik Oqartussat aalisarnermillu inuussutissarsiuteqartut aalisarnerup iluani ilinniarfinnik siunissamut isumannaakkanik nutaanik ineriartortitsileruttorput. Ilinniarfik nutaaq umiatsiaararsortunut ilinniarfiunissaa naatsorsuutigineqarpoq, taannalu inuussutissarsiutigalugu aalisartunngornianut tunngaviusumik ilinniarfiussalluni.
Inuussutissarsiummik aallussisuneersunik. Kalaallit Nunaanni aalisarneq pillugu siunissami ilinniarfittaassaq Ilulissani apriilimi ulluni marlunni isumasioqatigiinnermi aalisartut kattuffii, umiarsuaatileqatigiiffiit, aalisarnermut siunnersuisoqatigiit peqataapput.
Assi: Ilinniartitaanermik naalakkersuisoqarfik.
"Inuussutissarsiutip pingaarnerpaap ilinniarfigineqarsinnaannginnera naleqqutinngilaq; aalisarneq."
Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfimmi pisortaq Trine Egede oqarpoq.
Ilinniartitaanermut Naalakkersuisoqarfik Aalisarnermut, Piniarnermut Nunalerinermullu Naalakkersuisoqarfik, aalisarnermik inuussutissarsiuteqartut, soqutigisaqaqatigiit ilinniarfiillu peqatigalugit aalisarnermut tunngasunik ilinniagaqarnissamut neqerooruterpassuit ineriartortinneqaleruttorput.
Ilinniartitsisut misilittagaqarluartuunissaat aamma aalisarnermi aningaasarsiorfiunerpaap avataani ilinniartitsisoqartarnissaa kissaatigineqarpoq, Ilinniartitaanermut Naalakkersuisoqarfimmi immikkoortortami pisortaq Trine Egede oqarpoq.
Assi: Nammineq pigisaq.
– Ilulissani apriilimi workshoppertitsineq aalisartut piniartullu kattuffiinit, ilinniarfinnit, inuussutissarsiortunit, oqartussanit, aalisartunit piniartunillu peqataaffigineqarpoq. Ilulissat Kalaallit Nunaanni aalisartoqarnerpaat ilagaat taamaattumillu piginnaasaqarnerup siunissami ineriartortinnissaanut qitiulluinnarluni. Pisariaqartitat, suliat nutaaliornerlu ulluni marlunni oqaluuseraagut. Naalakkersuisoqarfinnut isummanik anngussisinnaavugut, kisianni inuussutissarsiortut pisunik malinnaasuupput, pisariaqartitallu ilinniakkani matussuserneqartussaapput, taamaammat inuussutissarsiuteqartut peqataatinnissaat pingaaruteqarpoq, Trine Egede oqarpoq.
Inuussutissarsiortunit, atuarfinnit ilinniartitaanermillu suliaqartunit peqataaffigineqartunik workshoppertitsinerup kingorna suleqatigiissitaliortoqarpoq. Taakkulu isumasioqatigiinnermiit pissarsiat aallaavigalugit alloriarnissaq siulleq suliaqarfigileruttorpaat. Nuummi oktobarimi aamma workshoppertitsisoqartussaavoq.
Umiatsiaararsornermik ilinniarfik
Sulineq ilinniarfimmik nutaamik kinguneqassaaq; umiatsiaararsorluni aalisarnermut ilinniarfik, inuussutissarsiorneq pillugu ilinniagaq sivikitsoq. Taanna pilersaarutit malillugit ukiup affaanik sivisussuseqassaaq, ilinniartullu imaatigut isumannaallisaanermut, ikuallattumik qamitsinermut allarpassuarnullu tunngasunik piginnaanngorsarneqarsinnaalernissaat kissaatigaat.
– Nunat Kalaallit Nunaata aalisakkanik qalerualinnillu avammut niuerfigisai, soorlu Kina Japanilu, inuussutissanik passussinermut sukannersumik piumasaqaateqarput. Aalisarnermik suliallit tamarmik tamatumunnga piareersimanissaat piumasaqaatillu naammassinissaannut suut pisariaqarnersut ilisimanissaat pingaaruteqarpoq. Umiatsiaararsorluni aalisarnermik ilinniarfimmi avammut niuernermi piumasaqaatit ilinniarneqarsinnaaneranik qulakkeerinnittoqarsinnaavoq. Taamaattumik ilaatigut eqqiluisaarneq inuussutissanillu passussineq ilinniarnerup ilagissallugu, Trine Egede oqarpoq. Motoorilerinermik, imaatigut isumannaallisaanermik VHF-radiokkullu attaveqaatinik ilinniartitsineq pilersaarutinut ilaasut aamma oqaatigaa.
Ilulissani apriilimi workshoppertitsineq aalisartut piniartullu kattuffiinit, ilinniarfinnit, inuussutissarsiortunit, oqartussanit, aalisartunit piniartunillu peqataaffigineqarpoq. Ilulissat Kalaallit Nunaanni aalisartoqarnerpaat ilagaat taamaattumillu piginnaasaqarnerup siunissami ineriartortinnissaanut qitiulluinnarluni.
Assi: Ilinniartitaanermut Naalakkersuisoqarfik.
– Ilinniartitsisut inuussutissarsiornermi misilittagaqarluartuunissaat inuussutissarsiortuniit kissaatigineqarpoq, aamma piffissami ulapaarfiunngitsumi atuartitsisoqarsinnaanissaa. Aamma ilinniagaq kitaani Tunumilu neqeroorutigineqarsinnaassasoq naatsorsuutigaarput, soorluttaaq atuartitsissutit pikkorissarnerillu ilaat internetikkut ingerlanneqarsinnaanerat sulissutigineqartoq, Trine Egede oqarpoq. Ilinniagaq tigulluarneqarumaartoq taassuma ilimagaa.
– 2026-mi 12-pax-imi pikkorissartitsinerit Kalaallit Nunaanni sumiiffinni assigiinngitsuni upernaaq ingerlanneqarput, piumaneqarluarlutillu. Eqqiluisaarneq pillugu Inuilimiit Avannaani pikkorissartitsisoqarmat aamma taamaappoq, tassani 66-it peqataapput. Taamaammat aalisarneq pillugu ilinniarfiit isumalluarfigilluarpagut, Trine Egede oqarpoq.
AalisarneQ PILLUGU ilinniarFIIT nutaat
Nalunaarusiaq "Aalisartoqarnerup iluani suliffeqarneq aamma ilinniartitaaneq" 2023-meersoq naapertorlugu suliffissuarni, kilisaatini sinerissap qanittuanilu aalisartuni nunaqavissut ilinniarsimasut amigaatigineqarput.
Nalunaarusiami siunissaq ungasinnerusoq eqqarsaatigalugu ilinniartitaanikkut suliniuteqarneq inassutigineqarpoq, ilinniarfinnut pioreersunut ilinniartut amerlanerusut ilanngunneqarnissaat, ilinniartitaanernik nutaanik neqerooruteqartoqarnissaa piginnaasanillu ineriartortitsinissaq tikkuunneqarluni.
Siunissaq ungasinnerusoq eqqarsaatigalugu aalisarnermi atorfiit amerlanerusut nunaqavissunik inuttalerneqarnissaat anguniarneqarpoq.
Ilinniarfiit akornanni ajornanngitsumik ikaarsaarsinnaaneq
Aammattaaq naalakkersuisoqarfiup inuussutissarsiortut kissaataat malillugu ilinniarfinnit allaniit ilinniakkanut allanut ingerlariaqqinnissap ajornannginnissaa qulakkeerniarlugu iliuuseqarpoq, tassa umiatsiaararsorluni aalisarnermik ilinniagaqarnermiit Imarsiornermik Ilinniarfimmi umiarsuarmik aquttutut ilinniakkamik imaluunniit Inuilimi fisketech-industrioperatøritut ilinniagaqarnermik imaluunniit ilinniartitaanerit nutaat ilaannik ingerlariaqqiffiusinnaasumik ikaarsaarfiusinnaaqqullugu.
– Imaani aalisarnermilu ataqatigiissumik ilinniartitsinermik pilersitsinissaq pingaaruteqartorujussuuvoq, taamaalilluni inuussutissarsiutitta pingaarnersaata, tassa aalisarnerup, iluani allamik suliaqarusukkuit ineriartoqqinnissamik periarfissaqalissagavit, Trine Egede oqarpoq.
Ilinniartitaanermut Naalakkersuisoqarfik suleqatigalugu allaaserisaq suliarineqarpoq
Allaaserisaq aviisimiit ilinniarneq pillugu sammisameersuuvoq, akeqanngitsumik una toorlugu atuarneqarsinnaavoq.
