Xploration Services misissuinissamut akuersissut pillugu suliffeqarfimmik Australiameersumik isumaqatigiissuteqarpoq

Kalaallit Nunaanni aatsitassarsiornermik assartuinermillu ingerlatsivik Xploration Services, Maniitsup eqqaani Qeqertaasami Qeqqata Kommunianiittumi, 64 km²-mik annertussusilimmik aatsitassanik misissuinissamut akuersissummik pissarsivoq.

Tigujartuaarneqassaaq

Akuersissummik ineriartortitsinissap pillugu Xploration Servicesip Australiamiut aatsitassarsioqatigiiffiat AuKing Mining kingullertut isumaqatigiissuteqarfigaa. Isumaqatigiissut Earn in-imik taaneqartartoq atorlugu misissueqqaarnerit aallartinnissaata tungaanut suliniummut 10 millionit eurot (75 millionit koruunit missaaniittut) aningaasaliissutigineqassapput. Xploration Services suliniummi immikkoortuni siullerni ingerlatsisuussaaq. Taakku naammassippata AuKing Mining suliniummi 75 procentinik piginneqataassaaq, sinnerilu 25 procentit Xploration Servicesip pigilissagai, Xploration Services tusagassiuutinut nalunaarummi ilisimatitsivoq.

- Xploration Services Qeqertaasami suliniummi sulianut allanut tunngatillugu annertuumik peqataareerpoq, nuannaarutigeqaarput nalorninartumut aningaasaleerusussusilimmik Kalaallit Nunaanni peqataatitsileratta, taakkulu Xploration Services suleqatigalugu nunami aatsitassanik periarfissanik ineriartortitseqataasinnaapput. Aukingimik isumaqatigiinniarnerit angusaqarfiulluarput. suleqstigiinnittalu iluatsinnissaa qilanaaraarput, Martin Sandy Shalmi Xploration Servisesimi pisortaaneq oqarpoq.

Australiami Afrikamilu suliani akuusut

Aatsitassarsiorfik AuKing Mining, Brisbanemi qullersaqarfeqartoq, aatsitassanik suliniutinut arlalinnut peqataavoq, ilaatigut Australiap kitaani Koongie Parkimi kanngussammik zinkimillu piiaanissamut aamma Tasmaniami tinimik piiaanissamut. Taakku saniatigut suliffeqarfik Afrikami suliniutini marlunni, Tanzaniami Malawimilu ingerlanneqartuni, akuuvoq.

- Qeqertaasami aatsitassanik qaqutigoortunik niobiumimillu misissuiniussamut earn-inimik isumaqatigiissusiarput naammagisimaaqaarput. Kalaallit Nunaata, USA-p Danmarkillu akornanni isumaqatigiissutip atsiorneqaqqammersup takutippaa nunat killermiut Kalaallit Nunaanni aatsitassat saffiugassallu mianernartut ineriartortinnissaannut soqutiginninnerisa annertusiartortinneqarnissaa periarfissaasoq, tassungalu peqataalernissarput qilanaaraarput. Suliniummik ineriartortitsinissami Xploration Services suleqatigissallugu qilanaaraarput. Xploration Servicesip angusaqarluartarnera sulianullu pikkorissuunera nuannaartunarmat suliniutip iluatsinnissaa qularutiginngilarput, AuKing Miningimi pisortaq Paul Williams tusagassiuutinut nalunaarummi oqarpoq.