Aallussilluartut nersorneqartut: Sisimiuni, Maniitsumi Napasumilu

Elisabeth Lynge Hansen Maniitsumeersoq, Anthon Davidsen Sisimiuneersoq aamma Petrus Jessen Napasumiu Qeqqata Kommuniani ataqqinaammik nersornaaserneqarput. Kommuni tusagassiuutitigut taamatut nalunaaruteqarpoq.

Qeqqata Kommunia ukiut tamaasa innuttaasunut immikkut suliniuteqarsimasut ataqqinaammik nersornaasiuttagaannik diplomimik aningaasanillu nersornaasiisarpoq.

Maniitsumi ataqqinaammik nersornaaserneqartoq tassaavoq 67-inik ukiulik Elisabeth Lynge Hansen. Taassuma ukiuni arlaqartuni peqatigiiffinni suleqataasarnera nersornaaserneqarneranut tunngavilersuutigineqarpoq.

- Elisabethip Neriuffik Maniitsoq 1990-imili suleqataaffigilerpaa, ulloq manna tikillugu pingaaruteqartumik inissisimasuulluni. Tamatuma saniatigullu nuna tamakkerlugu Neriuffiup Kattuffiani siulittaasutut ukiut arlallit inissisimanikuuvoq. Neriuffik Kattuffilerinermi saniatigut aamma Ikioqatigiiffimmi ukiut 17-it suleqataasuuvoq. Inuit innarluutillit pillugit peqatigiiffiani ukiut 14-it suleqataavoq, tamalumalu saniatigut aamma biiliutillit peqatigiiffiani suleqataasuulluni., kommuni allappoq.

Sisimiuni ukioq manna ataqqinaammik nersornaaserneqartoq tassaavoq 46-nik ukiulik Anthon Davidsen.

- Inersimalereerluni erinarsoqatigiit ukiorpassuarni peqataaffigisartakkamini erinarsoqataajutigaluni sungiusaasutut ikiuuttarpoq saniatigullu aalajaalluni eqiasueqalunilu erinarsoqatigiinnut ingerlatsiuartuulluni, kommuni nalunaarummini allappoq.

Kiisalu Napasormiu 82-inik ukiulik Petrus Jessen (Piitaannaq) aalisarnermi piniarnermilu suliniuteqangaarsimanera pillugu nersorpaa.

- Petrus Jessen inuusutseruttornerminili angajunilu pujortuleerartaarput, aalisarneq piniarnerlu inuussutissarsiornera taamalili aallartippoq Napasumilu ineriartortitseqataalluni, Qeqqata Kommunia allappoq.