Kalaallit Nunaanni allakkerivik Tusass ukiuni 2025-miit 2028-mut nipitittakkanik naasunik assilialianik arfineq-pingasoriarluni saqqummersitsissaaq, taakkulu eqqumiitsuliortup Buuti Pedersenip qalipagarai. Sapaatip-akunnerani matumani nipitittakkat pingajuat sisamaallu sungaartuaqqakkut ilaannik aamma tungujortutsiamik assitallit saqqummissapput.
Nunatta naasui 520-upput, Buuti Pedersenilu naasunik soqutigisaqarluartoq Kalaallit Nunaanni naasut kusanartut qalipaatigissaartut marluk toqqarpai.
Kalaallit Nunaanni allakkerivik Tusass ukiuni 2025-miit 2028-mut nipitittakkanik naasunik assilialianik arfineq-pingasoriarluni saqqummersitsissaaq, taakkulu eqqumiitsuliortup Buuti Pedersenip qalipagarai. Sapaatip-akunnerani matumani nipitittakkat pingajuat sisamaallu sungaartuaqqakkut ilaannik aamma tungujortutsiamik assitallit saqqummissapput.
Nunatta naasui 520-upput, Buuti Pedersenilu naasunik soqutigisaqarluartoq Kalaallit Nunaanni naasut kusanartut qalipaatigissaartut marluk toqqarpai.
– Sungaartuaqqakkut ilaat Tasiilap eqqaani naasarpoq, aamma Ittoqqortoormiit Nerlerillu Inaata eqqaani nassaarineqarsinnaavoq. Tasiilap eqqaani qaqqarsuarnut qaqileraanni amerlasoorpassuarnik nassaartoqarsinnaavoq; pingaartumik aputip kingulliulluni aaffigisartagaata eqqaani, tassami isugutattumi naasarami, Buuti Pedersen Sermitsiamut oqarpoq.
Kunngikkormiut, tassa dronning Margrethe, prins Henrik, prinsesse Alexandra aamma prins Joachim, Kalaallit Nunaannut 1997-imi tikeraarput, taamanilu Buuti Pedersen Tasiilami 1995-imiit 2006-imut najugaqarpoq, illoqarfimmilu nerersuaaqatigiinnissamut naasunik pinnersaasuulluni.
– Nalunngilara dronningip sungaartukkut ilaat kusagigai, taamaammat nerrivimmi soorunami pinnersaataassapput. Kunngikkormiut tikeraareerpata qaqqami naateqqissallugit sorlai ilanngullugit naasortarpunga, Buuti Pedersen oqaluttuarpoq.
- Dronningip naasut toqqakkatit pillugit arlaannik oqaaseqarpa?
– Taamanikkut Naalakkersuisut siulittaasuata Lars-Emil Johansenip dronningip nerrivianut qaaqquaanga, tassanilu naasut kusanartut eqqartorpavut.
Kalaallisut atit
Naasut nipitittakkani saqqummersinneqartut aappaat tassaavoq tungujortutsiaq, Kitaani naasarpoq; ilaatigut Kangerlussuarmi illut akornanni mittarfiullu eqqaani.
Tungujortutsiaq Kitaani naasarpoq.
Tusass
– Iluamik takussaanngilaq. tungujortutsiat toqqoqqalaarlutik naasarput, tungujortumik qalipaatigissaarlutik seqinnarissumi aatsaat takussaasarput, Buuti Pedersen oqarpoq.
Naasut atii kalaallisut, qallunaatut latiinerisullu nipitittakkani allassimapput, nunallu assingani Kalaallit Nunaanni sumi naasarnerannik takutitsilluni.
Naasut nunap iluaniittut 520-t ilarpassui kalaallisut ateqanngillat.
Buuti Pedersenip Tasiilamiut sungaartukkut ilaat Tunumiutut ateqartinneqarnersoq aperai, imalu akineqarpoq: Nerisarinngikkaagatsigit atserneqarneq ajorput!
Taamaattumik allakkerivik Oqaatsilerivimmut attaveqarpoq, taakkualu naasut marluk nipitittakkat sapaatip-akunnerani matumani saqqummersinneqartut kalaallisut taaguuserpaat.
