UNNIA
Kalaallit filmiliaat arlallit CPH:DOX-imi takutinneqassasut
Arina Kleist filmiliamik ‘Qajaq Man’-imik, ukioq manna aamma CPH:DOX-imi takutinneqartussamik, sanaqataanermi saniatigut aamma filmiliami naatsumi “Tamatta Ataqatigiippugut”-mi, piviusulersaarutinut festivalimi marsip 11-ani takutinneqartussami, ilitsersuisuuvoq.
Assi: Tamatta Ataqatigiippugut (still)
Arina Kleist aamma Johannes Ujo Müller, filmiliornermi ilitsersuisut, filminik marlunnik ukioq manna Københavnimi piviusulersaarutit pillugit festivalernerit annersaata CPH:DOX-ip ingerlanneqarnerani takutinneqarsinnaasunik suliaqarput.
Filmit allarpassuit Kalaallit Nunaanneersut Kalaallit Nunaallu pillugit filmiliat aamma takutinneqassapput.
- Filmiliara naatsoq nutaaq 'Tamatta Ataqatigiippugut' CPH:DOX-imi takutinneqassasoq ataqqinaatigalugu nalunaarutigisinnaavara, Arina Kleist filmiliornermi ilitsersuisartoq Qaqortormioq Facebookimi allappoq.
Filmi festivalimi marsip 11-ani, filmi naatsoq 'Erfalasorput' ilitsersuisumit assiliisumillu Johannes Ujo Müllerimit suliarineqartoq peqatigalugu, takuteqqaarneqassaaq.
Filmimi “Tamatta Ataqatigiippugut”-mi kulturip upperisallu annaanerisa silap pissusiata allanngoriartorneranut qanoq atassuteqarnerat sammineqartoq, filmimi “Erfalasorput”-mi nunatta erfalasua erfalasuliortorlu Thue Christiansen oqaluttuarineqarput.
Johannes Müllerip aamma Arina Kleistip naatsumik filmiliaasa saniatigut kalaallit filmiliaat arlallitukioq manna CPH:DOX-imi takutinneqassapput. Ilaatigut Joe Derricksip filmiliaa 'Qajaq Man'.
Assi: Filmimit ”Qajaq Man”-imit assilisaq
- Erfalasoq pillugu oqaluttuaq kulturikkut anersaakkullu sorlaqarluarluni kinaassutsimik, tulluusimaarnermik ataatsimoornermillu ersersitsisuuvoq,“ Johannes Ujo Müllerip filmiliaa naatsoq CPH:DOX-imi taama allaatigineqarpoq .
Filmi inuttallu ‘Erfalasorput’-mi peqataasut qaammammi matumani siusinnerusukkut nunanit tamalaanit peqataaffigineqartumik filmiliornermik unammisitsinermi ‘Oniros Film Awards 2026’-mi New Yorkimiittumi pingasunik nersornaaserneqarput.
Filmilli naatsut taakku marluk ukioq manna festivalimi takutinneqartut Kalaallit Nunaanneersut Kalaallit Nunaallu pillugu filmiliat kisiartarinngilaat.
Joe Derricksip filmiliaa ‘Qajaq Man’ siorna Nuuk Filmfestivalimi takutinneqarlunilu naammassillugu immiunneqartoq CPH:DOX-imi marsip aqqarnani nunarsuaq tamakkerlugu takuteqqaarneqassaaq. Filmi naammassisaq pillugu pilerisaarut filminut festivalip nittartagaani takuneqarsinnaavoq.
CPH:DOX Københavnimi sumiiffinni assigiinngitsuni marsip 11-aniit 22-anut ingerlanneqassaaq.
