Kalaallit kinaassutsimik paasinninnerannut tunngatillugu isumaat AWG-mi isiginnaartitsissutigineqassasoq
Isiginnaartitsisartut inuusuttut tallimat timertik nipilersornerlu atorlugit takutitsinikkut 2026-mi Arctic Winter Gamesimi, tassa issittormiut unammiuaarneranni, anersaaq allanngornerlu pillugit oqaluttuassaapput.
Inuusuttut Whitehorsemut aallartinnatik kulturikkut aaqqissuussaq Nuummi aputinik ilusilersuisoqarneranut atatillugu Katuap inersuaaraani sisamanngornermi marsip tallimaani nalunaaqutaq 16.30 aamma nalunaaqutaq 17.30 takutissavaat. Iserneq akeqanngilaq, inissalli killeqarput.
Assi: Ulannaq Ingemann
Sivitsunngitsoq kalaallit timersortartut Canadami Whitehorsemi 2026-mi Arctic Winter Gamesertoqarnerani, tassa issittormiut unammiuaarneranni timersuutini assigiinngitsuni unammissapput. AWG marsip arfineq pingajuani ammaanersiorluni nalliuttorsiornermik aallartinneqassallunilu sapaatip akunnera ataaseq ingerlassaaq.
Kalaallit Nunaatali timersornikkut pisinnaasat kisiisa takutissanngilai. Inuusuttut kalaallilt tallimat Kalaallit Nunaanniit kulturikkut takutitsinerit marluk piareersarpaat, taakkulu AWG-mi kulturisiornermi takutinneqassapput.
NAPA tusagassiutitigut nalunaarummi taama allappoq.
Isiginnaartitsissut Ikaarsaarneq-mik qulequtaqarpoq, qitillunilu kiinarpaqarluni atisalersorlunilu timi nipilersornerlu atorlugit isiginnaartitsissutaavoq.
Isiginnaartitsinermi kalaallit kulturikkut kinaassusaat, anersaalerinermik pingaartitsinerat allanngorsimanerallu inuusuttut nammineq nipaat aalanerilu atorlugit oqaluttuaralugit sammineqarput.
Aallannginnermi Katuami takutinneqassasoq
Uilu Jakobsen, Nikku Kanuthsen, Ayla Larsen, Smilla Vahl aamma Zoe Løvstrøm isiginnaartitsisartutut toqqarneqarput. NAPA naapertorlugurnaq, Angut, Nanoq, Tulugaq aamma Arsarnerit, taakkulu silamiut inuit, pinngortitap aamma anersaakkut inuunerup assigiinngitsumik isiginniffii saqqummiutissavaat.
Isiginnaartitsisartut inuusuttut suliap ingerlanerani peqataapput, isiginnaartitsinikkullu namminneq oqaluttuassaminnik oqaluttuarnissamut periarfissinneqarput.
Inuusuttut Whitehorsemut aallartinnatik kulturikkut aaqqissuussaq Nuuk Snow Festimut atatillugu Katuap inersuaarannguani sisamanngornermi marsip tallimaani nalunaaqutaq 16.30 aamma nalunaaqutaq 17.30 takutissavaat.
NAPA-p Kalaallit Nunaanni Timersoqatigiit Kattuffiat peqatigalugu AWG-mi kalaallit kulturikkut sammisassaata ineriartortinnissaa saqqummiunnissaalu akisussaaffigai.
- NAPA-mi suliniutini assigiinngitsuni inuusuttut piginnaanillit ineriartortinnissaat ukkataraarput. Takusinnaavarput inuusuttut amerlasuut AWG kulturi ukiut ingerlanerini eqqumiitsuliortunngorniarnermut kulturilerisunngorniarnermilu inuuneqarnissaannut alloriarnerusartoq siulleq, NAPA-mi pisortaq Susanne Andreassen oqarpoq.
Kulturikkut takutitsinerit saniatigut kalaallit timersortartut Kalaallit pinnguaatannut Arctic Sportimut, eqqillit pinnguaataannut Dene Gamesimut, sulorarnermut, nerrivimmi arsaararnermut snowboardernermullu peqataassaput.
