”Nissit Nunaat” – ”Nissit pigaat”

Silaannaap kissakkiartornera allarpassuit pissutigalugit issittoq soqutigineqaraluttuinnarpoq, taamaammat inuppassuit takornariassallugu soqutigeqaat.

Takornariallumi pilimasut ilaasa Nissit Nunaat issittorlu ima kusagitigalugulu pilerigilersimatigaat, allaat nunamik imaluunniit nunaminertanik piserusulllutik sukataaleraluarlutik.

Nissilli amerlaqisut tamanna akerlerilluinnarpaat, tassami qangaaniilli nunaat, nunani allanisut inunnit ataasikkaanit aggulullugu pigineqarneq ajorpoq, nunaqavissulli nammineq ataatsimut pigalugu, aammalu illuutillit nunaminertat toqqavitik attartugariinnartarlugit. Nissit tamanna allanngortikkusunnginnamikku allaat ingerlaaqatigiissimapput allagartarsualerlutik ”Nissit Nunaat” - ”Nissit pigaat”-mik allannilinnik, taakkulu sinneri suli takussaapput. Tassami aamma siorna mittarfissuartaarnikuugamik allamiorpassuillu tikittalersimammata, tamanna ilisimaniassammassuk.

Aammattaaq Nissit Nunaanni marloriarluni qinersisoqarsimavoq, nissit inatsisartuinut, kommuuniinullu. Nissillumi oqartussaaqataarusukkamik qinersiarsiartukaalluarsimapput, inuusuttullu nutaarpassuit isumalluarfigineqarlutik qinigaasimapput.

Ukioq mannalu juulli qanillilivissoq nissit nunaqqataat, naggueqatigiit Inuit ulloqartinneqarnerat naqissuserneqarluni Naalakkersuisuisa ulloq 7. november pisortatigoortumik erfalasulerfissatut nalunaarutigaat. Tamannalumi aamma Nissit Nunaanni malunnartinniarneqarpoq, Inuit qulliat ukkusissaq ikinneqarpoq, inngertoqarlunilu. Tassami nissit naggueqatigiillu inuit ilaqutariikkamik imminnut tapersersoqatigiittuarput, qangarsuaaniillumi kinaassuseq akimorlugu peerariittarlutillu, ilarpassui ilaqutariilersimapput.

Nissit Nunaanni aamma allarpassuarnik pisoqarpoq, pisarnertut juullimut piareersarneq nuannersoq ingerlanneqarpoq. Taamaattoq nissit ilannguisa ukioq manna annaasaqarsimallutik maqaasisaqarlutik juulli ornippaat, taakkulu nukissanik juullillu tipaatsunnartuanik tunineqarluarnissaannik kissaanneqarput. Aammali ilaqarput juullisioqqaartoortussanik. Ila sunaana taama pilluarnartigisoq meerannguamik ukioq manna ilaqqissimalluni. Ilaqutaasuni, qanigisaasunilu qujamasunneq nuannaarnerlu, tipaatsunnerlu malunnaqaaq. Tassami nunarsuarmi eqqissiviittumi meerannguit taakkuupput inuunerup ingerlaqqinnissaanik neriuummik tunisisut.

Nissit Nunaanniit atuartartut tamaasa uummammik pisumik juullimi pilluaqquagut, ukiumullu nutaamut iserluaqqullugit.