Rappertartut siunissaat pillugu isumakuluuteqartariaqanngilagut

- Ulluni taamak ikitsigisuni sapiillutik sassarlutik ilissi tamassi saanni tusarnaartitsinerat tulluusimaarutigeqaara.

Danskip nipilersortartup Bigg Kakap, Allattarl!-imi nipilersornermik aqutsisup arlaleriarlunilu Kalaallit Nunaanniissimasup, rappertartut inuusuttut piginnaanillit taamatut nersualaarpai.

Allattarl! suliniutaavoq nutaaq rap, taalliornew nipilersornerlu pillugit pinngorartitsilluni saqqummiussinissamik Nuummi, Paamiuni Nanortalimmilu inuusuttunut periarfissiisoq.

Suliniut Det Starter Med Musikken, Danmarkimi aningaasarsiutiginagu peqatigiiffik inuusuttunut, ingammik atugarliortunut, nipilersorneq, rap-imik workshoppertitsinerit aamma pinngorartitsilluni suleqatigiinnermik suliaqartoq, aamma Nunat Avannarliit Peqatigiiffiat (NAPA) suleqatigalugit ineriartortinneqarsimavoq.

- Ataasinngormat tikippugut. Marlunngornermi tamanut ammasumik sammisaqartitsigatta inuit takuniaasinnaapput. Pingasunngornermi inuit siullermeerlutik mikrofoni misilerarpaat – ilaat allallutillu immiussipput. Sisamanngormat tamakkerlutik immiussipput. Tallimanngormat sungiusarput. Arfininngormat nipilersuusiatik videoliaraat, ullumikkullu appisimaassapput, Bigg Kaka, peqataasut nersortariaqartut  isumaqartoq, oqarpoq.

Tusarnaariat isumaqataasut avaallattarlutillu ersaattaattarput.

Qullipinneq tulluusimaarnerlu

Naggataarnersiorluni tusarnaartitsineq Killuni, Godthåbip qulaanik aamma taaguuteqarsimasumi, ingerlanneqarpoq, tassanilu NAPA-mi pisortap Susanne Andreasenip ikinngutit, ilaquttat ilisarisimasat rappertartullu nuannaarlutik tusarnaariartut tikilluaqquai.

Susanne Andreasenip oqaaseqarnissaq kingorna $MALIKK-imut ingerlateqqippa, taannalu akunnerni tulliuttuni sukkasuumik nukissaqarluartumillu scenemi ingerlatsivoq. Aamma nammineq arlalinnik appippoq. Lukasilli appisimaarneq ammarpaa, taannalu Jamaicamiutut, danskisut, tuluttut kalaallisullu rapperpoq.

Kingorna Parnaq, rappertartut dronningiat, oqaaseqarpoq. Soorunami tulluusimaarpoq.

- Rappernermik sungiusaaqatigiinneq aatsaavissuaq niviarsiaqqanik taama amerlatigisunik peqataaffigineqartoq nuannaarutigalugu oqaatigissavara. Tamanna pisuunnguallaatigaarput. Taama oqarlunga kunngipo paniarai sisamat tikilluaqquakka!

Nipilersukkat niviarsiaqqat pissaaneqarnerannut tunngassuteqarput, aallaqqaammullu ittoorpasikkaluarlutik tusarnaartut nuannaartippaat, angajoqqaallu oqarasuaatitik angallattakkat qullarlugit sapinngisartik tamaat filmiliorniarsaralutillu, qitillutillu imaluunniit niaqqutik aalatippaat.

Niviarsiaqqat ilaat pikkunartumik appimmat killitsinnartumik pisoqarpoq. Anaanaasoq appisimaarnerat tamaat qungujulasoq, qiimmattartoq qitittartorlu tusarnaariat akornanniippoq. Qulliliitigaluni tulluusimaarpalullunilu panini appisimaaqqammersoq saniminiittoq oqarfigaa. Misigissutsit taamaattut angajoqqaat amerlanersaasa nalunngilluinnarpaat – qitornaq immikkut ittumik iliuuseqarsimasoq eqqamiittunut tamanut ingerlaannaq oqaluttuarusunneq. FiNNi taama oqarfigalugu paasineraa ilisimaneqanngilaq, angutilli tulluusimaarnera nuannaarneralu takusinnaagamiuk  nuaqqaatagialugulu pilluaqquaa.

Rapperit pikkorissut akornanni “Små’erne” eqqaamaneqarluarput. Taakkua tusarnaartut nuannarilluinnarpaat. Aammali appisimaartut. “Små’erne” tassaapput nukappiaqqat pingasut ukiut 20-t missaanni rappertarsimasutut appisimaartut. Inuusuttuarannguupput tupinnaannartut.

Nipilersorneq angutit inuusuttut aqqutigisaattut

NAPA-p atuakkiornermut unammisitsinerani Allatta!-imi inuusuttut – pingaartumik nukappiaqqat angutillu – peqataatinnissaat ukiorpassuarni ajornakusoortarsimagaluartoq rappernermik suliniummi Allattarl!-imi soqutiginninnerat allaanerulluinnarpoq. Niviarsiaqqanik peqataatitsinissaq matumani ajornannginneruvoq, suliniummilu aamma inuusuttunut immaqa allassinnaasutut imminut isiginngitsunut, nipilersuutinik taallanillu allalluni imminut ersersittartunut, periarfissaqartitsivoq.

- NAPA-p atuakkiornermik unammisitsinera ALLATTA! ukiorpassuarni ingerlanneqartarsimavoq, inuusuttullu, ingammik angutit/nukappiaqqat, kajumissaarniarlugit ajornakusoortartoq maluginiartarparput. Inuppassuilli allatut allattarput, assersuutigalugu nipilersukkanik. Taamaammat maanna inuusuttut eqqumiitsuliornermikkut pitsaasumik imminut ersersissinnaaqqullugit allamik neqerooruteqarpugut, NAPA-mi pisortaq Susanne Andreasen oqarpoq.

Taakkua taalliaat ataatsimut katersorneqarlutik atuakkatut kalaallisut, qallunaatut tuluttullu saqqummersinneqassapput.