Arnannguaq tusarnaartitseqqaarnissaminut qilanaartoq

Aalborg Symfoniorkesterimit, nipilersortartunik 65-inik atorfilittaqarpoq, taakkunanngalu erinniarsuaq minutsinik aqqaneq-marlunnik sivisussusilik inniminnerneqarpoq. Erinniarsuaq ataasinngornermi misilinneqarmat, Arnannguaq Gerstrømip siullerpaamik tusarnaarpaa. Tassami erinniarsuup suliarinerani eqqarsaataani qarasaasiarlu iluaqutigalugu suliaraa.

- Nipilersukkap eqqortumik taamatut atorneqarnissaatut kiisami tusaassallugu pissanganaqaaq, Arnannguaq Gerstrøm oqaluttuarpoq.

Atortorissaaruterujussuaq

- Nipilersoqatigiissuarnik atorneqartussamik erinniarsuarmik suliaqarluni atortorissaaruterujussuaq aallartittarpoq. Nipilersortartorpassuaqarpoq, aammali atortorissaaruterujussuaqarpoq tusarnaartitsinerup kingorna atorneqartartoq, taamaattumik kukkusoqarsinnaanngilaq annertuumillu allanngortoqarsinnaanani. Misileqqaarneranilu iluatsittariaqarpoq.

Erinniarsuartut nipilersukkat partitutitut allanneqartarput. Tassa erinniortup nipilersuutinut ataasiakkaanut imaluunniit nipilersuutinik nipilersoqatigiinnut assigiinngitsunut nutaanik nuusiussisarpoq. Assersuutigalugu qarlortaap tumerparpaalluunniit qanoq nipilersornissaa — qanoq nipitutigisumik, qanoq sukkatigisumik il.il. partitumimi allassimasarpoq — taavalu nipilersoqatigiissuarni aqutsisup suliassaraa nuutit tamarmik erinniortup isumaatut nipilersorneqassasut.

Arnannguaq Gerstrømip Aalborg Symfoniorkesterimi aqutsisut pisoraat amerikamiu, Joshua Weilerstein, ataasinngornermi ullaakkut nalunaaquttap-akunnerani ataatsimi ataatsimeeqatigaa — taavalu tusarnaartitsisarfimmut nipilersoqatigiit piareersimaffiannut iserput.

Aqutsisoq tusarnaartitsivimmut appakaappoq, erinniortorlu inersuarmi issiaviit isorlerpaannut ingippoq erinniarsuami nipilersoqatigiissuarniit appinneqarnissaa utaqqillugu.

- Naammagisimaarluinnarpara. Nipilersugaq eqqarsaatigisimasattut nipeqarpoq. Appisimaarnissaq sisamanngornermi unnukkut pitinnangu, sungiusarnerit marlunngornermi pingasunngornermilu ingerlateqqinneqassapput. Tusarnaariallu qisuariarnissaata tusaanissaa qilanaaraara. Toqqissisimalluinnarpungali. Nipilersortartut inuussutissarsiutigalugu nipilersortarput nunanilu tamalaani tusaamasaasumik aqutsisoqarlutik, taamaattumik suliara eqqortumik atorneqarpat ajornavianngilaq.

Erinniortoq misilittagartooq

Arnannguaq Gerstrømip siullerpaamik taamaaliunngilaq, Lines of Belonging tassaammat erinniarsuarni suliaasa sisamaat.

- Erinniorneq ullumikkut inuussutissarsiutigaara, suliassaqaqaangalu. Tamatumunnga pissutaanerpaavoq inuussutissarsiummi matumani tusaamaneqarluarnissara pilersissimagakku – aamma kalaaliunera pissutaaqataavoq.

- Taamaattumik isumaqanngilanga nipilersuusiakka nipilersoqatigiissuarnit soqutigineqarnerat Trumpip Nunatsinnut soqutiginninnerata piliarigaa.

- Tusarnaarialli soqutiginninnerat erinarsugassiarsuarnik tusarnaaraangamik tamanna aallaavigalugu soqutigisassagaat, miserratigissanngilara.

Arnannguaq Gerstrømip erinarsugassiarsui nunarsuaq tamakkerlugu — allaat Venezuelami — nipilersoqatigiissuarnit tusarnaartitsissutigineqartarput.

- Partiturimik nipilersukkat kusanaqataa tassaavoq, nipilersoqatigiissuarnut suna tamarmi nuusersugaavoq – taamaasillunilu nipilersoqatigiissuit najuutinnanga tusarnaartitsisinnaapput, Arnannguaq Gerstrøm nassuiaavoq.

Sulaq nutaaq

Lines of Belonging nunarsuaq tamakkerlugu pissutsinut tunngatillugu eqqarsaatersuutigineqarpoq: nunat, kulturit inuillu akornanni, aammali oqaluttuarisaanerup kinaassutsillu akornanni.

Inuiaqatigiinnut ilaasutut misigineq qanorlu nukittutigisoqarsinnaanersoq, qajannaatsigisinnaanersoq assigiinngitsorpassuarnillu sunnerneqarsinnaanersoq — ingammik inuk kulturinik, oqaaserpassuarnik nunallu immikkoortuinik arlalinnik tunuliaqutaqaraluaruni, suliami sammineqarpoq.

Erinniarsuaq nipilersuutinik taallartaqanngitsumik oqaasertaqanngitsumillu atungassiaavoq. Taamaattumik erinniarsuaq aalajangersimasumik oqaluttuassartaqanngilaq, tusarnaartulli tamarmik immikkut misigisaqarsinnaapput namminnerlu isiginnittaatsiminnit isummersorfigalugu.

Tusarnaartitseqqaarnermi Arnannguaq Gerstøm sisamanngornermi allanik aamma ilaqassaaq. Aalborg Symfoniorkesterip Gerstrømip Lines of Belonging tusarnaartitsissutiginerata saniatigut aamma finlandimiup erinniortup Jean Sibeliusip biolinimut tusarnaagassiaa, russisullu erinniortup Sergej Rachmaninovip simfoniiata aappaa tusarnaartitsissutigineqassapput.

- Sibelius aamma Rakhmaninow erinniortuni nuannarinerpaamasama ilagaat, taamaattumik tulluusimaarnartupilussuuvoq, Arnannguaq Gerstrøm oqarpoq.