Assit: Qaannamik Kalaallit Nunanni pissartanngorniunneq

Ataaseq nukeerulluni qaannaminut paluinnarpoq. Alla kinngusaqattaarnermini makinnini iluatsillugu nipissani tamaat suaarpoq. Anaanaq qullilisoq   panimminik sisamat missaannik ukiulimmik tulluusimaarluni filmiliorpoq. Qaannamik Kalaallit Nunaanni pissartanngorniunnerni assiliissutiga nassarpara. Timersuut una assilissallugu kajuminnarpoq. Ilisarnartoq siumulli eqqoriaruminaatsoq. Avannaq qatsorpoq aasallu Nuutoqaq uummaarissisippaa. Nipaassuaq, nipiliortoqarnani ulapittoqarnanilu qaannat avatitsinni isiginnaariarpassuit saavanni immami ingerlapput. Amerlanerit kavaajaqanngillat qungujulallutillu.  

Inuk qajartortoq inuit oqaluttuarisaanerannik oqaluttuartutullusooq ippoq. Qangarsuaq pissutsit, ullumikkut pisut siunissarlu ataatsimoortinneqarput. Qaannamik nunatsinni pissartanngorniunnerit inuit piginnaasaannik takutitsipput. Kinngusaqattaarnerit takorannersut. Ungasissumut parrunneq ilungersunartoq. Peqataasut immami nilleqisumi eqqissisimanerat. Allaanngillat imaani balletertut.  

Peqataasut pingasut ataatsikkut kinngusaqattaarput. Isit taratsumit aappillersimasut nammineerlutik minutsit 32-t kingullit makittarlunilu kingusarnermik oqaluttuarpullusooq. Apeqqullu manna nillikarpoq: Sooruna taamaaliortartut? Apeqqullu imminut akivorlusooq. Qaannat saanniittut oqaluttuamik ingerlatitseqqipput. Ileqqutoqqanik ingerlatitseqqillutillusooq. Kinaassutsimik attassineq. Aap, unammineq sinaakkutaavoq, uagullu isiginnaartuusugut tamanna paasillugulu isummersorfigisussaavarput, tamannali peqataasunut pingaarnerorpasinngilaq. Patsiseqarlutik imaanut avalapput. Tamanna immaqa oqaatsit atorlugit nassuiarsinnaavaat, nassuiarsinnaanaguluunniit, qaannaminnulli ikinerisa namminneerluni oqaluttuaq ingerlateqqippaa. 

Umiarsuarsuaq iluserissoq Nuup umiarsualivianit avalappoq, saavanilu qaannat kusanartut timmisutullusooq ittut nipeqaratik ingerlaarput. Assigiinngissuserujussuaq. Peqataasut ungasissumut parrupput, taannalu unammersuarnerni unammissutit kingulliit ilagaat. Ataaseq sikiimilluni ilungersorpoq, allalu isiginnaarianut qungujunnissaminut nukissaqarpoq. Taamaalillutillu qaannamik pissartanngorniunnerni peqataasut naassaanngiusattutullusooq ungasitsigisumi qanoq misigineq eqqissisimasumik nittarsaappaat. Aamma aappaagu Qaannamik Kalaallit Nunaanni pissartanngorniunnerni ilioqqissarput. Aamma ukiup tulliani. Kinguaariippassuillu ingerlaneranni tamanna piviuarsimavoq.