Ataqqinaaserneqaqqippoq

Nuna tamakkerlugu tusaamasaq, Rasmus Lyberth alutornartumik nutaamik taaguutitaarpoq.

Det Danske Rockakademimi ukiumoortumik nersornaasiinermi Vegami Københavnimiittumi oktobarip tallimaanni ataqqinaammik ilaasortatut toqqarneqarpoq.

Facebookimi quppernermini Rasmus Lyberthip ataqqinaammik ilaasortanngorni ima qujaniutigaa:

- Ippassaq ataqqinaammik nersorniarneqarpunga. Nunaqqatikka Kalaallit sinnerlugit qujavunga, erinarsoqatigiinnikkummi nukissatsinnik aallertaratta ataatsimoornerlu nuannarisarigatsigu. Taamaammat: ikinngutikka, tamatta pilluarta.

Danskip folk-rockimik erinarsortartup taalliortullu Lars Lillottip ikinngutini ataqqinaammik ilaasortanngortippaa, ikinngutigiinnertillu pillugu Facebookimi quppernerminni nipilersoqatigiit sinnerlugit takisuumik kusanartumillu allappoq.

- Rasmusip 40-nik ukioqalernissaa aqaguttoq Hotel Hans Egedep imerniartarfiani naapippara, Lilholt Band nipilersoreersut. Aqaguani inuuissiorluni anaanami illunnguani tunguusami kangerlummiittumi nalliuttorsiornissamut qaaqquaanga. Taamanimiilli ikinngutigiillualerpugut maannalu Rasmus 75-inik ukioqarpoq, Lars Lilholt allappoq, taassuma aamma oqaluttuaraa ukiuni ingerlanerini suleqatigiissimanitik suliatillu naammassilluarsimariaraangamikkit ilaani susoqartarsimanersoq. Aalborgimi nipilersoreerlutik nuannisarsimanertik eqqaavaa.

- Iseratta aalakuualaangaatsiarpugut, rockererpalaartunik nikorfasoqarpoq, taakku ajorerpasinngilaat Lars Lilholt sanimorluni isertoq, kisianni sooruna kalaaliaraq aalakoortoq ilaagigaa? Nuannerunnaarpoq Brunollu nukini sukappai. Taava Rasmusip ornippaanga isussuffigalungalu: "Nipilersuut qamilaaruk, manna anersaapalaanik ulikkaarpoq."

Nipilersuut unimmat Rasmus qitittarfimmut pissippoq angakkorsalerlunilu, minutsini pingasuni taamaaliorpoq, Lars Lilholt allappoq. 

- Inuit imerniartarfimmiittut tupallutik nipaarupput, minutsillu pingasut qaangiummata Rasmusip ornippaanga assani patitillugit illaatigaluni oqarluni: "Anersaapilueruppoq", tamannalu ilumoorpoq. "Aalakoorniarta" Rasmus qungujuppoq, oqaluasaava ima naggaserneqarpoq: 

- Unnuup sinnera nuanneqaaq, rockerit allaat Rasmusimut ataasillerput. Det Danske Rock Akademimit nersornaaserneqarnissaa pissusissamisooqqissaarpoq.