Danskit biskoppiisa amerlanersaasa ukiassakkut tussiarfissuaq, nalliussisoqartalernissaa isumaliutiginiarpaat

Biskoppit amerlanerit tussiarfissuaq ukiassakkut nalliussineqartalernissaa, ammaffigaat. Danskit naalakkersuisuisa nalunaarutigaat ulloq taanna 2030-mi nalliuttorsiutigineqaqqittalissasoq.

Tamanna aviisi Kristeligt Dagblad-imi allaaserineqarpoq.

Tussiarfissuaq 2023-mi atorunnaarsinneqarpoq, danskillu naalakkersuisuisa maanna atuutilerseqqinniarpaat.

Tussiarfissuup atuutileqqinneqarnissaannut ilagiit akuutinneqartut, ilagiit pillugit ministereqarfik aviisimut ilisimatitsivoq.

Danskit naalakkersuisui nalunaarput inatsisissatut siunnersuut 2027-mi upernaakkut saqqummiunneqassasoq.

Aalborg Stiftimi biskoppi Thomas Reinholdt Rasmussen Kristeligt Dagbladimut oqarpoq suliap qanoq ingerlanissaa utaqqineqartoq, aamma ilagiit akuutinneqarnissaat pingaaruteqartoq.

Taanna biskoppit ilaattut tussiarfissuup ukiakkut nalliussineqartalernissaa pillugu oqaloqatigiinnissamut ammavoq.

- Oqaluffiup aaqqissuusaanerani nalaani poorskip piinsillu akornanni nalliussineqartarnera naleqqutinngilluinnarpoq, taamaattumik oktobarip naanerani nalliussineqarnissaa pitsaanerussaaq, Kristeligt Dagblad-imut oqarpoq.

Taamatut isumaqarneq Lolland-Falster Stiftimi biskoppianit Marianne Gaardenip tapersersorneqarpoq.

Aammattaaq nassuerutigaa tussiarfissuaq iivangkiiliumut attuumassuteqarnavianngitsoq, taamaattumillu ukiakkut nalliussineqartalerpat silatusaarnerussasoq.

- Tussiarfissuarmi anersaakkut ittunik eqqarsaatiginneqqissaarneq pingaarnerpaatittariaqarparput. Tussiarfissuup nalliussineqartarnerata nuunneqarnissaa soorunami isumagineqarsinnaavoq, aviisimut oqarpoq erseqqissarlugulu upernaaq nalliuttorpassuarnik ulikkaartoq.

Fyensimi, Aarhusimi Viborgimilu biskoppit ullorsiornerup qaqugukkut nalliussineqartarnissaa pillugu, oqaloqatigiissutigineqarnissaanut tamarmik ammapput.

Amerlanerussuteqartut akerliannik Ribemi Roskildemilu biskoppit tamarmik isumaqatigiipput upernaakkut nalliuttorsiortarneq atuuttuassasoq.