Film.gl nutaamik siulittaasortaarpoq

Mads Madsen Film.gl-ip maajip 30-ani ataatsimeersuarnerani siulittaasunngorpoq, taarserlugu Klaus Georg Hansen, ukiut arfineq-marluk siulittaasuusimasoq.

- Pingaarnertut ukkatarisara tassaavoq, kalaallit filmiliortuisa oqaluttuarerusutaasa oqaluttuarineqarsinnaanerannut periarfissaasa sinaakkutaannik nukittorsaanissaq, Kalaallit Nunaanni nunanilu tamalaani, Mads Madsen tusagassiutinut nalunaarummi allappoq.

Filmiliortarnermik ineriartortitseqqikkusuttut

Film.gl aamma Kalaallit Nunaanni filminstitut filmiliortartunut pitsaanerpaamik atugassaqartitsiniarlutik qanimut suleqatigiissallutik, Film.gl tusagassiutinut nalunaarumminni ilanngullugu allappoq.

Mads Madsen aamma Film.gl ataatsimeersuarnerata iluatsilluarsimaneranut pilluaqqullugit, suleqatigiinnissamullu qilanaarluni, Inunnguaq Petrussen, kalaallit nunaanni Filminstitut-imi pisortaq, allappoq.

- Upperilluinnarpara ataatsimoorluta nunatsinni filmiliortartunut suli pitsaanerusumik atugassaqartitsilersinnaasugut, Inunnguaq Petrussen allappoq.

Siulersuisut nutaat ukuulerput:

• Mads Madsen, siulittaasoq

• Peter Jensen, siulittaasup tullia

• Inuk Jørgensen, aningaaserisoq

• Ane Lena Fussing Rosbach, ilaasortaq