Inuunerminni puigugassarinngisaminnik misigisaqariartulersut

Simon Borgert Olesenip, Nuummi spejderit siulersuisuata, misigisaqariartorluni spejderit 34-t Nuummiit angalaqatigissavai.

Spejderit Spejderlejrimi, Danmarkimi spejderit tammaarsimaarnerisa annersami, kalaalertatuaallutik juulip 18-ianiit sapaatip akunnera ataaseq peqataassapput.

spejderit ukiut sisamakkaapajaarlugit tammaarsimaartarput, maannalu spejderit danskit nunaniillu tamalaaneersut 30.000-it peqataassasut naatsorsuutigineqarpoq. Taakku ilagaat inersimasut arfineq-pingasut meeqqallu 26-it (quliniit qummut ukiullit) Nuummi Spejderineersut.

- Spejderit taama amerlatigisut ataatsimoornissaat misigisassaavoq inuuneq tamaat eqqaamaneqartussaq, Nuummi spejderini siulersuisoq Simon Borgert Olesen oqarpoq, taannalu nammineq ukiuni 30-ni spejderiusimagami misilittakkani tunngavigalugit ima oqarpoq:

- Sumiuuneq naapertorlugu suleriaaseq assigiinngitsuusoq tammaarsimaaqatigiinnersuarni takuneqarsinnaasarpoq.

Piareersaatitut namminneq tammaarsimaarfissaminnik sananissartik sungiusarsimavaat. Nunatsinni qisussanik pissarsiniarneq ajornakusoorsinnaammat sanigutit ipui atorlugit allunaasamik qilersineq sananerlu sungiusarpaat.

Nuummi spejderit Fynip kujataanit spejderit, atortussaannik karsimik nassartussat, tammaarsimaaqatigissavaat. Ilaatigut ulimaatit, pilattuutit igallu karsimiissapput.

- Tamatuma saniatigut spejderit qiimaqqullugit nammattakkamillu nammassinnaasaminnik poortuuteqqullugit kajumissaarpagut, Simon Borgert Olesen oqarpoq.

aamma atuaruk

Spejderit atisaliortartup ilusilersugaanik annoraartaartut

Spejderit tammaarsimaffimminni nuannisaanerup saniatigut assigiinngitsunik sammisassaqartassapput. Ilaatigut Roskildemut, tammaarsimaffiup ungasinngisaanut, angalaassapput.

Simon Borgert Olesenip spejderit sapaatip-akunnera ataatsimoornerminni namminneq ineriartornissaat ingammik qilanaaraa.

- Angerlarunik peqataasutut misigissasut neriuutigaara. Spejderiuneq Nuummi spejderiunermit annerusoq, Simon Borgert Olesen oqarpoq.

Taassuma Nuummi Spejderit ullut ilaanni nunarsuaq tamakkerlugu spejderit tammaarsimaarneranni 50.000-it missaanniittunik peqataasoqartartumi ilaasinnaanissaat neriuutigaa.

Tuperni unnuisartussaagaluarlutik Danmarkimi tammaarsimaarneq akisuvoq. Taamaammat Nuummi Spejderit aningaasaliisussarsiornissamut ataatsimiititaliamik pilersitsisimapput, taakkualu aningaasartuutit ilaat matussuserniarlugit 300.000 koruunit sinnerlugit katersorsimavaat.

- Aningaasaliinerli ullunili arfineq-marlunni tammaarsimaarnermuinnaanngitsoq aningaasaliineruvoq, Simon Borgert Olesen oqarpoq.

- Taamaaliorneq spejderit eqimattanut ilannguttuarnissaannik piffissallu ingerlanerani amerlanerusunik peqataarusulernissaannut qulakkeerinnissutaavoq.