Inuussutissarsiutigalugu uumasorujunniartartoq

Atuagaq tigummiarlugu issiavoq.

Quppernerit akornanni allagartaaqqanik qalipaatigissunik ulikkaarpoq. Allagartaaqqat quppernerit ilaanni allaniit amerlanerupput. Uteqqiaffigaa.

Atuagaq taanna, Oqaluttuat & assilialiat, siuaasaata Jens Kreutzmannip atuakkiaraa. Pigigamiuk tulluusimaarutigisarpaa, aammali suli atortarpaa. Atuarneranimi arlaannik aallartittoqarpoq.

Itsaq oqaluttuatoqqani pinngortitat, uumasut, uumasorujuit oqaluttuallu kingusinnerusukkut nammineq suliaminut iluaqutigisassani nassaarai.

Atuagaq taanna Mariap nammineq allanngilaa.

Taannaqanngikkaluarpalli Bestiarium Groenlandica pinngorsimanaviarunanngikkaluarpoq.

2013-imimi kalaallisut atuakkani amerlasuut nassarlugit Londonimiikkami uumasut pillugit atuakkiussalluni pilersaarutiginngilaa. Ilinniarsimasanimi atorlugu Londonimut nuussimavoq: Qarasaasiami 3D-mik ilusilersuineq. Pilerisaarutinik, pinnguaatinik assilissanillu computerimik suliarisanik sanasarpoq.

Unnukkulli atuartarpoq.

Oqaluttuatoqqat meeraanerminiilli ilisimasani pillugit atuartarpoq. Ikusik - oqaluttuatoqqani uumasorujuk - imaluunniit qivittoq pillugit. Siornatigut tusarsimanngisaminik naammattuuinissami tungaanut.

Uumasoq.

Arlaanninngaanniit ilisarisinnaavaa. Immaqa assiliaq siornatigut takunikuuaa. Immaqa oqaluttuaq tusareersimagaluarpaa. Annikitsualuilli puigorsimavai. Taava allattulerpai.

Siullermik allattaavinnut. Kingusinnerusukkullu Wordimut.

Eqqaamarusuinnarpaa. Naluaa allattukkani taakku ullut ilaanni Bestiarium Groenlandicanngortussaasut — kalaallit oqaluttuatoqaanni uumasut pillugit atuagaq assiliartalik.

Atuakkianngorpummi.

Marialu nammineq oqarnermisut uumasorujunniarnermik inuussutissarsiuteqalerpoq.

Kulturimut siuleqqiutitut

Marialli uumasorujuit kisiisa malersunngilai.

Uumasut taassumunnga tassaapput annerusumut aqqutit. Inuit kulturimik oqaluttuarisaanermillu ilungersunarsinnaasumik soqutiginnilernissaannut iluaqutaasut.

- Kalaallit oqaluttuatoqaat, imaluunniit uumasut oqaluttuatoqqaniittut, kulturitsinnut oqaluttuarisaanitsinnullu tunngatillugu siuleqqiutitsialaasut oqartarpunga.

Oqaluttuamut tiguartinneq qanoq misinnarnersoq nammineq nalunngilaa. Taamaammat uumasorujuit tiguaaniutitut atortarpai.

Inuummi uumasoq alapernaaffigileraangamiut suli sivisunerusumik piffissaqarfigissallugu kissaatigisarpaa.

- Inuit ima tiguarniartarpakka: Maanna uumasut oqaluttuatoqqatsinniittut paasivatit, taava oqaluttuarisaanitta sinnera paasisaqarfigiinnarsinnaavat, Maria Kreutzmann oqaluttuarpoq.

Oqaluttuap ilaa oqaluuserineq ajornarnerusoq aamma ilaavoq.

Nunasiaanerup oqaluttuarisaanera. Spiralilersuisimanermik kanngunartuliorneq. Inuiaqatigiinni ajornartorsiutit. Suut tamarmik artornarlutillu nuanniikkamik inunnik matutitsisinnaasut.

Taamaalilluni immaqa uumasorujuk soorlu Sassuma Arnaa qivittorluunniit tiguaaniutaasinnaapput. Ingammik meeqqanut.

Mariap atuarfimmi oqalugiaraangami meeqqat uumasut soqutigileraat maluginiartarpaa. Tassami apersulertarput.

Kalaallit Nunaanni ilumut taamatut oqaluttuaqarpa? Suminngaanneerpat? Sooq oqaluttuarineqarpat? Qanoq isumaqarpat?

Tassanngaannarlu uumasorujuit kisimik pineqarunnaartarput.

- Kulturerput pillugu paasisaqarneruneq uannut uisitsivoq, Maria oqarpoq.

Inuit niaquisa saanii apummilu illuikkiat

Maria Kreutzmann Nuummi Qapiarfiusaami peroriartorpoq. Qaqqajunnat sivingasut sikkililu pingasunik assakaasulilik ilimagisaminit sukkanerusumik ingerlasoq eqqaamavai. Pinnguaartarfiit. Sioqqerisarfissuit. Kangerlummukartarnerit.

Tamatuma eqqaaniippoq aataata Jens Kreutzmannip illua.

Illuaqqami tassani atuagaqarlunilu, kiversimasunik uumasoqarlunilu inimi inuup niaquata saarnganik peqarpoq.

Mariamut tamanna nuannerlunilu ersinaannanngilaq. Soqutiginarpoq.

- Taanna inuup niaquata saarnganik iniminiittuuteqarpoq, taamanikkut inuup niaqorigaa ammasumik oqaatigisarpaat, Maria oqaluttuarpoq.

Aataavata ammassumik oqaluuserisarpaa. Taamaammallu toqumut tunngasut Mariap ersigisariaaruppai. Misissorsinnaanngorpai. Immaqa tassani soqutiginnilersimassaaq.

Titartaasarpormi. Titartaasangaarmat anaanaa meeqqerivimmi atuarfimmilu titartagaanik mappinut iliorarsimasaminik suli peqarpoq. Prinsessit ponyllu pappiaqqanut titartartarpai, uumasorujuillu aamma ilaasarput.

- Uumasorujuit nuannariuaannarnikuuakka, taanna oqarpoq.

Filmini titartakkanilu inuttaasut titartarpai. X-Men. Witchblade. Soqutigisani tamaasa titartarpai. Aqerluusarlu tiguguniuk silarsuup sinnera tamarmi tammartuusisarpoq.

- Aalajangersimasumik sammisaqarsinnaavutit, nipiliortullu tamaasa tusaajunnaarsinnaavatit, taanna oqarpoq.

Aammattaaq meeraanermi kangerlummiittuarpoq. Pinngortitami angalaartarluni, apummi illunnguusiortarluni Danmarkimilu aasarsiortarluni. Inersimasut oqaluttuartut qaqqanullu ungasippallaanngitsumut qimaannginnissamik oqaaqqissaarisartut ilagalugit. Tassami silami arlaannik soqartuaannarpoq. Ikusik qivittorluunniit. Oqaluttuaq. Mianersorfigineqartussaq.

Taamani Jens Kreutzmannip suliai qanoq pingaaruteqartigisut Mariap naluaa. Angut atuagaatilik, inuup niaquata saanianik pilik kiversimasunillu uumasuutilik oqaluttuatoqqat ilaannik tammatsaaliuisimasoq naluaa. Tamanna kingorna paasivaa.

Ullumikkut atuakkat nammineq pigai.

Uumasut meeraalluni oqaluttuarsiarisimanngisani ujartorpai. Titartartarpai. Aqqanik paasiniaasarpoq. Oqaluttuassaanik ujaasisarpoq. Niviarsiaraq Qapiarfiusaarmioq uumasorujunnik titartaasarpoq. Mariap inersimasup taakku ujatarpai.

Atuarfimmi oqaluasaartartoq

Titartanngikkaangami ASK-imi, kingornalu Qorsussuumi Danmarkimilu atuarpoq. Atuaqatimini inussiortortaavoq.

- Oqaluttortaagunarpunga, taanna illarpoq.

Maria qallunaajaqqani atuarpoq.

- Taamaammat ajoraluartumik kalaallisut oqqarluppunga. Oqalulaarsinnaavunga, oqallorinnerulernissaralu suli sulissutigaara, taanna oqarpoq.

Ilaqutariit nuttarput. Siullermik Nuummi Naalakkap Qaqqaanut kingusinnerusukkullu Danmarkimut.

- Peroriartorluarlunga misigaanga. Soorunami arlaannik pisoqartuaannarpoq, taanna oqarpoq.

Meeqqat atuarfianni atuareerluni efterskolelerpoq, ukioq ataaseq USA-mi ilinniariarpoq, ukiunilu tulliuttuni inuunera ulapinnerusutut ippoq.

- Taamanikkut USA ullumikkumut naleqqiullugu allaaneruallaarsimagunarpoq. Nunaavoq periarfissarpassuaqartoq, tamannalu tv-kkut takuneqarsinnaasarpoq. Amerikamiut piorsarsimassusaat assigiinngitsullu soqutigigakkit aallarpunga, misigisarlu nuanneqaaq.

Meeraasoq angajoqqaavi avipput, arnaalu napparsimalerpoq. Tamanna inuunerani sunniuteqangaarpoq.

- Ukiuni marlussunni sumi tamaaniippunga. Ukiut taakku piumasaarsorfiupput. Inuusuttuaraaninni nalimmassaruminaatsitsillungalu pisariukujuppunga, taanna eqqaamasarsorpoq.

Maria 18-inik ukioqarluni Afrika Kujallermut qaammatialunn aallartinneqarpoq. Arnaami tassani sulisumik qatannguteqarpoq.

- Afrika Kujallermut pigama imminut naakkiginnginnissara ilinniarpara, taanna oqarpoq.

Aamma nunami najukkamini piviusoq angerlarsimaffimminit allaanerusoq misigaa.

- Taamani ilisimanngisara, tassa nunasiaanerup kingunera ajorluinnartoq, paasivara, Maria Kreutzmann oqaluttuarpoq.

Afrika Kujallermi inunnik piorsarsimassutsimillu naapitsinini allannguutigaa. Inuunerminut allatut isiginnittaaseqalerpoq.

Tamanna inuuneranut allannguutaavoq. Ajornartorsiutai tammanngillat, taakkununngali isiginnittaasia allanngorpoq.

Oqaluttuat ingerlateqqinneqassasut

Maria ullumikkut aappassiani aalisartoq qitornatillu marluk Nuummi najugaqarput.

Meeqqani kangerlummeeqatigigaangamigit aamma oqaluttuuttarpai. Uumasut pillugit oqaluttuuttarpai. Mianersornissaq pillugu. Oqaluttuatoqqat peroriartornermini tusarsimasani, maannalu ukiorpassuarni ujartarsimasani pillugit oqaluttuuttarpai.

Qitornai kalaallisut oqaaseqarput. Taakkulu nammineq ilikkaqqinniarlugit ilungersuutigisimasaminik maannamut peqalereerput.

Oqaluttualli ingerlateqqissinnaavai.

- Immaqa peroriartuutigisimasama ilarpassui qitornannut ingerlateqqittarpakka.

Mariap angerlarsimaffiani sumi tamani atuakkanik ulikkaarpoq. Meeqqat inaanni. Sinittarfimmi. Inimi. Allaat uffarfimmi.

Piffissaqartilluni meeqqani atuffattarpai. Ernera aatamisut Jens Kreutzmannimik ateqarpoq.

Tamanna tulluusimaarutigisarpaa.

Siulimi oqaluttuaat pissarsiarisimavai. Katersorlugillu, misissorlugillu allappai. Maanna nammineq meeqqaminut oqaluttuarisarpai.

Aamma atuagaq taanna saqqummersippaa.

Oqaluttuat & assilialiat, siuaasaata Jens Kreutzmannip saqqummersitaa suli atuakkat akornaniippoq. Taanna qalipaatigissunik quppernerit akornanniittunik allagartaararpassualik. Atuagaq taanna Mariap uterfigiuaannarpaa.

Ammaqqippaa.

Sunaluunniit taamatut ingerlateqqinneqartarunarpoq. Taamaattoqarnissaaq aalajangerneqanngikkaluartoq arlaata atuagaq quppeqqittuarmagu.