KL

DK

Kalaallit Nunaat Tivolimi ukiunik 50-inngortorsiussammat pisussarpassuit  

Akunnaattuliineq malunnartinniarlugu erinarsortartut tusaamaneqarluartut ilaatigut tusarnaartitsissapput sammisassarpassuaqassallunilu. Tusarnaartitsisussat ilagaat Mariina Schmidt, Kimmernaq Kjeldsen, Enok Poulsen Siiva Fleischerilu.

Aaqqissuussaq Kalaallit Nunaat Tivolimi tuusintilippassuarnit peqataaffigineqartarpoq, nunattalu avataani kulturikkut aaqqissuussani annerpaalluni. Kalaallit Nunaat Tivolimi nalinginnaasumik juulip 31-ani aggustillu aallaqqaataani pisararaluarpoq, juulilli 31-at ukioq manna tallimanngornerummat aaqqissuussap ulluata aappaa aggustip aappaanut nuunneqarpoq.
Arnaq Nielsen Arnaq Nielsen Tusagassiortoq
Saqqummersinneqarpoq

Tivoli Københavnimiittoq kalaalerpassuarnit kateriffiusussaq pilerpat nipilersortussarpassuaqarpoq, kulturikkut aaqqissuussat arlalissuullutik sammisassarpassuaqassallunilu. Pisussat saqqummiunneqaqqammisut qiviaraanni tusarnaartitsisoqassaaq, qilaatersortoqarluni uaajeertoqarlunilu. Taakkua saniatigut erinarsoqatigiinnik tusarnaartitsisoqassaaq saqqummersitsisoqassallunilu.

Ukiuni 50-inngortorsiornermi Tivolimi Plænenimi sapaammi aggustip aappaani tusarnaartitsinissarsuaq qilanaarineqarsinnaasut ilagaat. Unnummi taanna nipilersortartut aalajangersimasut erinarsortartunik pulaarteqarlutik tusarnaartitsissapput, tusarnaartitsisussat tassaallutik: Mariina Schmidt, Kimmernaq Kjeldsen, Miké Thomsen, Knud Mathiassen, Frederik Elsner, Siiva Fleischer aamma Enok Poulsen.


Kaffillerneq qummoroortartornerlu

Tivolimut takuniaasussat kaffillerneq, tuniniaasut, meeqqanut sammisaqartitsinerit kulturikkullu aaqqissuussat misigisinnnaasaannut ilaapput.

Kalaallit Tivolimi naapittarnerat 1976-imi aallartippoq. Kalaallimmi Danmarkimi ilinniartut ataatsimoorniarlutik taamani naapipput, sunaaffa kingusinnerusukkut ileqquliunneqarumaartumik.

Maanna aaqqissuussaq alliartuinnarluni kulturikkut assigiinngitsunik pisoqarfiusalernikuuvoq. Meeqqanut inersimasunullumi tusarnaartitsinerit, eqqumiitsuliortut tuniniaallutillu saqqummersitsineri allallu pisut pilersaarutinut ilaajualernikuullutik.

Nalliuttorsiornermi tusarnaartitsinersuaq sapaammi pissaaq, arfininngornermilu qummoroortarnersuaqarumaarluni.

Pisussat tamakkerlugit takorusukkukkit Tivolip nittartagaani takusinnaavatit.

inuiaqatigiit nalliuttorsiorluni koncerti kalaallit kulturiat kulturi Kalaallit Nunaanni Tivolimi

Atorfiit tamaasa takukkit

PODCASTI

Powered by Labrador CMS