Kilteqartalissaagut

Kalaallit Nunaat inuiattut nutaamik sapaatip-akunnerani kingullermi ilisarnaatitaarpoq.

Tuluit inatsisartuini ilaasortat aallartitat Kalaallit Nunaannut tikeraarmata taama pisoqarpoq. Skotlandimiu politikeri Brian O´Hara taakku ilagaat, taannalu immikkuullarissumik tunissutissamik nassarpoq - skotsit annoraaminernut allalersukkanut nalunaarsorsimaffiannit uppernarsaatit marluk, kalaallinummi annoraamerngup ilusaa aalajangersimasoq nalunaarsorneqarsimavoq.

Annoraamerngup allaa immikkuullarissuuvoq, ilaatigut skotsit angutitaasa assuutaannut kiltinut atorneqartarluni. Ilaqutariit tamarmik immikkut aalajangersimasunik allalinnik peqartarput, ilaat sakkutuunut peqatigiiffinnullu tunngassuteqarput allallu sumiiffinnut aalajangersimasunut tunngassuteqarlutik.

Kalaallinut allaq pigititaq ukioq manna februaarip pingajuanniit nalunaarsorneqarpoq. Uppernarsaatit marluk nunanut allanut tunngasunut ilisimatusarnermullu naalakkersuisumut Vivian Motzfeldtimut, Inatsisartunullu siulittaasumut Kim Kielsenimut tunniunneqarput.

Aappaluttoq, qaqortoq tunguusarlu qaamasoq

Annoraamineq kalaallinut pigititap qalipaatai aappaluttoq qaqortorlu Erfalasutsinnut tunngatinneqarput, tunguusaq qaamasorlu niviarsiamut tunngatinneqarluni - nunatta inuiattut naasuanut.

Tuluit aallartitaat Kalaallit Nunaanni politikerinik inuussutissarsiortunillu arlaleriarlutik aataatsimeeqateqarput, ilaatigut Demokraatineersoq Justus Hansen ataatsimeeqatigineqarluni, taassumalu ataatsimiinneq pissanganartoq oqaluttuaraa.

- Skotlandimiut Kalaallit Nunaat assigalugu namminiilivinnissartik kissaatigingaarpaat – aamma Kalaallit Nunaanni qanoq namminiilivinnissaq sulissutigineripput paasisaqarfigerusuppaat.

- Attaveqaqatigiittuarniarluta isumaqatigiippugut, immitsinnut ilinniarfiginissarput siunertaralugu, Justus Hansen oqarpoq, kilt-imillu atuilernissamik taanna pilersaaruteqanngilaq.

- Kalaallit inuiannut tunissutaat nuannerluinnarpoq, tamannalu qujamasuutigaara. Kiltimilli atuinngisaannarnissara qularinngilara. Isumaqarpungami nillerpallaartoq - naak niugikkaluarlunga, illarluni oqarpoq.

Pisortaq kiltilisartoq

Aallartitalli Sulisitsisunut pulaarmata allarluinnarmik pisoqarpoq. Sulisitsisut pisortaat Christian Keldsen, Tuluit Nunaata Kalaallit Nunaanni sinnisuattut aamma atuuffilik, kiltimik 2010-mi Skotlandimiut uuliasioqatigiiffiata Cairn Energyp kitaata sineriaani qillerinerata nalaanni sanatinnikuusani atorpaa.

- Anaanaga Tuluit Nunaata avannaaneersuuvoq, ilaquttavullu Skotlandimiunik aamma akoqarlutik. Kalaallit Nunaanni Danmarkimilu peroriartoraluarlunga Tuluit Nunaannut qanittumik attaveqarpunga, aamma Tuluit Nunaannit sinniisuunera nuannaarutigeqaara.

- Taamaattumik kilteqarnissara pissusissamisuuginnarpoq, taannalu Cairn Energyp Kalaallit Nunaannut tikinnerani Glasgowimi pisiaraara. Kiltera Black Watchimik taaneqartartoq kikkunnit tamanit atorneqarsinnaasoq – ilaqutariinneq sumiiffimmilluunniit suminngaanneerneq apeqqutaatinnagu.

- Taamanimiilli kilt nalliuttorsiornerni atortalerpara – aamma DHL-Stafettenimi atortarpara. Takussagaluarpat kilteqarluni arpalluni ilualaannguakaseqaaq, atoruminarlunilu.

- Kiltera atortaruttorakku maannakkut aserfallakkiartulerpoq. Maannalu kalaallit annoraaminermik allamik peqalernerat nalunaarsorneqarmat soorunami kilt nutaaq kalaallisut qalipaatiliussaaq. Pisaarnissara qilanaareqaara, kusanassaaq.

Christian Keldsenip kiltimi iluani suut atortarnerlugit oqaatigiumanngilaa, paasiuminaalaartumilli akivoq:

- Angut ikiaquteqarani kiltimik atuisoq, kilteqartarpoq - Angut kilteqarluni ikiaquteqartoq tassaaginnarpoq atequtilik, Kalaallit Nunaannili najugaqarpugut, tamaanilu qiianarsinnaasaqaaq.