Kulturministerip danskit tusagassiuutaanni kalaallit pillugit allaaserisat amerlanerusut kissaatigigai

Danmarkimi tusagassiuutit pillugit isumaqatigiinniarnerit kalaallit savalimmiormiullu inuunerannik kulturianillu danskit tusagassiuutini sammisaqarnerunissaminnut periarfissanik misissuiffigineqassapput, danskit ministeriat oqarpoq.

Zenia Stampe Radikale Venstreneersoq 2026-mi juunip pingajuaniilli Danmarkimi kulturimut ministeriuvoq.

(Assi: Henning Bagger/Ritzau Scanpix)

Saqqummersinneqarpoq 16. Oktobari 2026 - 13:11

Ussassaarut

Naalagaaffeqatigiinni oqaloqatigiittarnerup pingaaruteqassusia ukiuni kingullerni ersersimasoq kulturimut ministeri Zenia Stampe isumaqarpoq.

Tamanna aamma tusagassiuutitigut sammineqartariaqartoq danskit kulturimut ministeriat folketingimi ilaasortamut Emilie Schyttemut akissummini erseqqissaavoq:

– Kalaallit savalimmiormiullu inuunerisa piorsarsimassusaasalu Danmarkimi tusagassiuutitigut sammineqarnerusariaqarnerat uannut pissusissamisuuginnarpoq, Zenia Stampe oqarpoq.

Aamma atuaruk

Kalaallit folketingimi ilaasortat: Aqqulli suli takivoq

Kalaallit Nunaat Savalimmiullu annertunerusumik sammineqarniassammata ministeri DR-imik TV 2-millu kiffartuussinissamik isumaqatigiissutiminik nutarterinissamut piareersimanersoq Emilie Schytte aperivoq.

Kulturimilli ministerip Atlantikup avannaani inuunerup kulturillu tusagassiuutitigut sammineqarnerulernissaanik kissaatini qanoq piviusunngortikkumaarnerlugu oqaatigerusunngilaa.

Ussassaarut

– Tusagassiuutinut isumaqatigiinniarnerni tulliuttuni Folketingimi partiit peqatigalugit qanoq tamanna piviusunngortinneqarsinnaanersoq pillugu oqaloqatiginninnissara qilanaaraara, taanna folketingimut akissummini itisiliivoq.

DR Naalagaaffeqatigiinneq pillugu Naalagaaffeqatigiinnermiillu aallakaatitassiassanik aallakaatitsisassalluni ullumikkut pisussaaffeqareersoq Zenia Stampep aamma erseqqissarpaa.