Naalakkersuisut rappertartoq tusaamasaq suleqatigalugu erinnamik saqqummersitsisut
Inuusuttut kissaatigineqarnerannik, inuiaqatigiinnut pingaaruteqarnerannik siunissamilu periarfissaqarluarnerannik musikvideomi nutaami oqariartuutigineqarpoq. Tusarnaartitsinerit akeqanngitsut aamma pilersaarusiorneqarput.
Naalakkersuisut Josef Tarrak suleqatigalugu musikvideo “Pigalugu” saqqummersippaat.
Assi: Atorfissaqartippatsigit / Naalakkersuisut
"Uanga inuunera, illit aamma inuunerit. Ikioqatigiittussaalluta. Sunajaasiit angusaq, angusassat tullii. "
Rappertartoq Josef Tarrak musikvideomi nutaami taama erinarsorpoq.
Musikvideo inuusuttunut 14-nit 21-nut ukiulinnut tulluarsagaalluni taakku kissaatigineqarnerannik, inuiaqatigiinnut pingaaruteqarnerannik siunissamilu periarfissaqarluarnerannik oqariartuuteqarfiuvoq.
Musikvideo inuusuttut ulluinnarni inuunerannut tunngatillugu, siunissamilu ingerlalluarnissamik periarfissaqarnerannut, nittartakkatigut inuit naapittarfiini suliniuteqarnermi siulliuvoq.
Tusarnaartitsinerit akeqanngitsut sisamat
Inuusuttunut juullimut siusinaartumik tunissuteqarfigalugit Josef Tarraap tusarnaartitsinissai akeqanngitsut sisamat pilersaarusiorneqarput.
Tusarnaartitsineq siulleq Nuummi marlunngornermi pivoq. Sisimiuni sisamanngorpat tusarnaartitsisoqassaaq. Kiisalu Qaqortumi Ilulissanilu tusarnaartitsisoqarumaarluni.
Suliniummut tunngatillugu Facebookimi quppernermi tusarnaartitsinissat pillugit paasisaqartoqarsinnaavoq: Atorfissaqartippatsigit
Tusarnaartitsinermi inuusuttut tusarnaariat nunatsinni inuusuttoqatiminnik ambassadørinik naapitsisinnaassapput - ilaatigut Josef Tarrak aamma naapinneqarsinnaassalluni.
Musivideo Youtubemi takuneqarsinnaavoq.
