Naja Parnuuna Vahl Olsen, nipilersoqatigiinni Naja P-mi
erinarsortoq, ukiumoortumik Aarhusimi nipilersornermik
festivalertitsinermi kulturikkullu pikialaartitsinermi SPOT Festivalimi
tusarnaartitsissaaq.
Tassani
nipilersoqatigisani guitarertoq Jaaku Sørensen, bassertoq Qillaq Petrussen,
tumerparpaartoq Jens-Christian Lyberth-Lennert aamma pattattoq
Laura Lennert Jensen peqatigalugit tusarnaartitsissaaq.
Naja Parnuuna Vahl Olsen, nipilersoqatigiinni Naja P-mi
erinarsortoq, ukiumoortumik Aarhusimi nipilersornermik
festivalertitsinermi kulturikkullu pikialaartitsinermi SPOT Festivalimi
tusarnaartitsissaaq.
Tassani
nipilersoqatigisani guitarertoq Jaaku Sørensen, bassertoq Qillaq Petrussen,
tumerparpaartoq Jens-Christian Lyberth-Lennert aamma pattattoq
Laura Lennert Jensen peqatigalugit tusarnaartitsissaaq.
Taakkua Garden Stagemi maajip aallaqqaataani nal. 15:45 appissapput. Aqqulli
tungaanut ajornaatsuinnaasimanngilaq. Nipilersoqatigiimmi
peqataanissaminnut aningaasanik tapiissutinik qinnuteqaataat
itigartinneqarput.
- Qinnuteqaaterput
itigartinneqarmat pakatsivunga! Ullulli arlaqanngitsut qaangiummata
SPOT Festivalimit qaaqqusissut e-mailikkut pissarsiaraara,
eqqarsaqqaarlungalu: "ILU?!" erinarsortartoq Naja Parnuuna
Vahl Olsen oqaluttuarpoq, nangillunilu:
- Festivalernissaq
piareersarnerillu eqqarsaatinniilerput. Pissangaqqilerpunga, qamuuna
ikittoqarpoq, tassanngaannarlu suliassarpassuaqalerlunga.
Aningaasatigut
ajornartorsiutit
Nipilersoqatigiit
Aarhusimut angalanertik namminneq akilertussaavaat, taamaattumik
sapaatip-akunnerata siuliani qaaqqusisoqarmat Naja ulappuserpoq.
Najap NAPA aamma Eqqumiitsuliornermik Aningaasaateqarfik
tapiissutinik qinnuteqarfigai, tamarmilli itigartitsipput.
-
Aningaasaateqarfiit qinnuteqarfigisavut tamarmik ilisimatitsipput
tapiissutinik qinnuteqarnissamut piffissaliussaq qaangiutereertoq. Festivalimut qaaqqusaagaluarluta neriuutaarukkaluarpunga, Naja Parnuuna Vahl Olsen itisiliivoq.
Tapiissutinik
qinnuteqaatit itigartinneqarneri pissutigalugit suliffeqarfinnut
saaffiginnippoq, angalanermulli aningaasartuutit tamakkiisumik
matussuserneqanngillat. Naja Parnuuna Vahl Olsenip videoliaq inuit
attaveqaqatigiittarfiani siammarterpaa, tassani pissutsit
nassuiarlugit tapersersortissarsiorpoq, naggataatigullu iluatsillugu.
Aalborgimi
kulturikkut peqatigiiffik Tikiusaaq nipilersoqatigiit aningaasatigut
tapersersorniarlugit isumaqatigiissuteqarpoq, peqatigiiffimmi
tusarnaartitsinissaat piumasaralugit. Esme Lounge assingusumik
isumaqatigiissusiorfigineqarpoq. Nipilersoqatigiit
Esme Loungemi tusarnaartitsissasut, isertitallu nipilersoqatigiit
angalanerannut atorneqassasut isumaqatigiissutaavoq. Erinarsortartoq aamma Tupilak
Travel aamma Niinas Psykologi angalanermut aningaasartuutinik
tapiissuteqartut eqqaavai.
- Suliffeqarfinnut
assigiinngitsunut e-mailinik 300-t missaannik amerlassusilinnik
sapaatip-akunnerata ataatsip ingerlanerani nassiussivunga,
kissaatigisatsitulli kinguneqanngimmat inuit attaveqaqatigiittarfii
atortariaqalerpakka, tassanilu angalanissamut pisariaqartunik
aningaasanik pissarsivugut. Inuit ataasiakkaat namminneq aningaasaatiminnik tunissuteqartut assorujussuaq qutsavigaavut, erinarsortartoq Naja P. oqarpoq.
Naatsorsuuteqarluarneq
E-mailit 300-t,
saqqummersitsinissaminullu tapiissutinut qinnuteqarnermut
killigititaq saniatigut Najap pania piffimmi
tassani ataasiliivoq.
- Naluara qanoq
tamaasa ataqatigiitissimanerlugit. E-mailinik nassiussuivunga,
nipilersukkannik saqqummersitsinissara aningaasalersorniarlugu
qinnuteqarpunga panimmalu inuuissiorneranut atatillugu
kaffillernissamut piareersarlunga, Naja Parnuuna Vahl Olsen
oqaluttuarpoq.
Tusarnaartitsinissarsi tusarnaariat qanoq naatsorsuuteqarfigissavaat?
- Silarsuarmut
allamut, misigissutsinik tamanik siuaasattalu anersaavannik
pingaartitsiffiusumut minnerunngitsumillu inuit kulturiannik
ataqqinniffiusoq tusarfiginissaa naatsorsuutigissavarsi. Nunarsuarmi nipilersornerup silarsuaani
suliaqartunut qaaqqusissutitsinni taama allassimavoq.
Inniminniisartut,
nipilersortartunik nutaanik ujaasisartut, aaqqissuisartullu naapinnissai Najap
naatsorsuutigaa, naak maannakkut isumaginnittartumik
suleqatigisinnaasaminik oqaloqateqarneq ingerlakkaluarlugu.
- Atit
arlaannaalluunniit taasinnaanngilakka, kisianni siunissami
isumaginnittartussara oqaloqatigalugu aallartereerpara, neriuppungali
suli amerlanerusunik inniminniisartunik nittarsaassisunillu
naapitaqassallunga, Naja Parnuuna Vahl Olsen neriulluarluni oqarpoq, nangillunilu:
-
Tusarnaartitsinermi atugassavut suli inissinneqanngillat,
nalunngilarali erinarsuutima saqqummersinneqareersut ilaat aamma
tuluttut erinarsuutit marluk nammineq taalliarisimasakka suli
saqqummersinneqanngitsut atorneqassasut. Taakku tuluttut erinarsuutit
2027 ingerlanerani suliama saqqummertussat ilaanniipput.
Allanik
isumaqatigiissusiortariaqarsimaneq pissutigalugu Naja Parnuuna Vahl
Olsenip Aarhusimut angalanissami pilersaarusiornera
ajornaatsuinnaanngilaq.
- Arctic Sounds
Music Festivalimut billettinik pisinerup aqaguani aallarpugut,
taamaattumik SPOT Festivalimut peqataanissarput suli qamunga iluamik
pulanngilaq. Aatsaat maannakkut uppernarsiartorpara ilaannikkullu
panimma aatsaavissuaq peqatiginnginnissaa eqqarsaatigalugu
uummalliuummertarpunga, Naja Parnuuna Vahl Olsen naggasiivoq.
