NIFF pujortariarnermi pilersinneqarpoq. Maanna qulissaanik ingerlanneqassaaq

Pipaluk Kreutzmann Jørgensen aamma Amalie Lynge Lyngesen Nuummi allaffimmi qarasaasiami saanni issiapput.

Nuuk International Film Festivalip, qulissaanik ukioq manna ingerlanneqartussap, pilersaarusiorneqarnera naammassingajalerpoq.

Filmertitsinissamut pilersaarutit inissipput, festivalillu nittartagaani maanna saqqummiunneqarput. Qaaqqusanut timmisartumut bilitsit, avataani suleqataasussanik isumaqatigiissutit... aamma tusagassiuutitigut suliaqarneq, tamakku tamaasa aamma ilagissavaat.

Nalliuttorsiornermi tamatumani Pipaluk Kreutzmann Jørgensenip, festivalimik pilersitseqataasup ullumikkut filmiliortartoq, Emile Hertling Péronard peqatigalugu festivalimik aqutsisup, eqqarsaatit taamanikkut maannamullu festivalimut ilusilersuisimasut oqaluttuarai. Kulturip illorsuani Katuami festivalimi misigisassat ilaat ukioq manna septembarip 16-ianniit 19-iata tungaanut ingerlanneqartussat, saqqummiuppai.

Filmit Issittumiit nunallu inoqqaavinit suliarineqartut

Pipaluk Kreutzmann Jørgensen Karsten Heilmannilu Nuuk Nordisk Kulturfestival 2016-imi, eqqumiitsuliorneq piorsarsimassuserlu pillugit festivalimut maanna Suiaala Arts Festivalimik taaneqartartumut filmertitsinissamut pilersaarusiorneranni tamanna aallartippoq.

- Nikorfalluta pujortarpugut, Karstenilu oqariasaarpoq: "Soormi nunanit tamalaanit filmfestivalitut aaqqissuutinngikkipput?’“ Pipaluk Kreutzmann Jørgensen pilersaarusiornermit anillannermini oqaluttuarpoq.

Filminik suliaqartarnerminni ukiorpassuarni qanimut, suleqatigiippugut.

- Taamaammat nalunngilaa oqaraangat tigusariga, Pipaluk Kreutzmann Jørgensen oqarpoq

Aaqqissuussaanermik eqqarsaatit tassanngaannaq aallartipput. Qanoq festivalertoqassanersoq, qanoq iliortoqassanersoq minnerunngitsumillu filmit suut takutinneqassappat?

Nuuk International Film Festival festivaliuvoq imminut pigisoq, taassumalu issittumi nunallu inoqqaavi pillugit filminik sammisaqartarnini ilisimaneqaatigaa.

Aallaqqaammut Grønlandsbankenimi filmilianik takutitsineq ingerlanneqarpoq, tassanilu filmiliat seqersittaat atorlugu takutinneqarlutik. ´Maliglutit´ filmiliortup ilisimaneqarluartup Iqalunneersup Zakaria Kunup filmiliaa ammaanersiornermi takutinneqaqqaarpoq.

Ilitsersuisorlu filmip takutinneqarnerata kingorna nittartakkatigut attaviit aqqutigalugit apeqqutinik akissuteqartussaagaluarpoq.

- Ajoraluartumilli tamanna iluatsinngilaq, Pipaluk Kreutzmann Jørgensen oqarpoq.

Filmiliortartut festivalimi najuukkaangata suleqatigiilluarnerunissamut periarfissaqarlualersinnaaneranik tamanna ilinniarfigaat.

Tamatuma kingorna filmiliortartut tusaamasat allat, ilaatigut Zakarias Kunuk, festivalertoqarnerani tikittalerput.

Aningaasaliisoqarnerulernissaa neriuutigigaa

Nuuk International Film Festivalimi filmilianik pitsaasunik takutitsinissaq siunertaralugu aallartinneqanngilaq. Kalaallit filmiliortartut nukittunerulernissaat nunanilu tamalaani filmiliornerunissaat siunertaavoq. Pipaluk Kreutzmann Jørgensen filmiliornermilu akisussaasoq (filmproducer aaqq.) Emile Hertling Péronard festivalimik 2018-imiilli aqutsisuupput. Taakku aamma Polarama Greenlandimik ingrlatsisuupput.

- Filmfestivalerpassuarnut ukiuni taakkunani peqataasarpugut, Pipaluk Kreutzmann Jørgensen oqaluttuarpoq, filmiliortartuunermi saniatigut filmliortartut peqatigiiffianni Film.gl-mi taamanikkut siulittaasuuvoq.

Taakkuali kisimik maannakkut angalassanngillat, Nuuk International Film Festivalimi nunanit tamalaanit filmiliortartut aamma tikeraassapput.

Nuuk International Film Festivalip filminik pitsaasunik isiginnaartitsineq, nunanit tamalaanit filmiliortartut naapittarnerat aamma kalaallit filmiliortartut oqaluuserinninnissaannut periarfissiisoq siunertaraa.

- Kalaallit filmiliortartut festivalimi suliamik takutinneqarnissaat ullumikkut pingaartittorujussuuaat. Festivalinut allanut peqataanissaannut tamanna aallarniutaasarpoq, Pipaluk Kreutzman Jørgensen oqarpoq.

Filminik takutitsisoqaannarani aamma filmiliortartut pillugit isumasioqatigiisitsisoqartarpoq, ilinniartitsisoqarpoq oqallittoqartarlunilu. Kiisalu aamma nersornaasiisoqartarluni

Festivalimik aaqqissuussineq imaannaanngitsuusoq, suliarli pingaaruteqartoq, Pipaluk Kruetzmann Jørgensen oqarpoq.

- Kalaallit Nunaanni filmiliornermut aningaasaliisoqartariaqartoq oqarpoq nangillunilu:

- Kalaallisut filmiliortoqarpianngilaq, tamannalu malugisinnaavarput.

- Qanoq ililluta ingerlaqqissinnaavugut?

Nuuk International Film Festival 2017-imi aallartimmat, Pipaluk Kreutzman Jørgensen erningajalernerata nalaani pivoq, taamaattumillu meeqqanut sammisaqarnissani pingaartittuaannarpaa.

- Meeqqat pingaarnerpaatittuaannarpavut, inuiaqatigiinnullu kivitseqataasinnaanissarput kissaatigalugu, Pipaluk Kreutzman Jørgensen oqarpoq

Meeqqat atuarfiini, meeqqerivinni inuusuttullu ilinniarfiini kalaallit filmiisa nunalluunniit inoqqaavisa filmiisa, pingaartumik Iqalunnit Canadamiilluunniit inuktitut oqaasillit, takutinneqartarnerat malunnaarsaarluni ingerlanneqartarpoq.

- Meeqqat ilisarisinnaasaminnik, imminnut atassuteqarfigisinnaasaminnik imminullu ersersissinnaasaminnik isiginnaartariaqarput, Pipaluk Kreutzmann Jørgensen oqarpoq.

Nuummi meeqqat atuarfianni atuartut namminneq filmiliaaqqanik festivalimi takutinneqarsinnaasunik ukioq manna suliaqassapput, Nuullu Katersugaasiviani filmeeqqanik matoqqasumik takutitsissapput.

Nuuk International Film Festival ukioq manna qulissaanik ingerlanneqarpat, filmi ’Erfalasorput’ Johannes Müllerimit suliarineqartoq ammaanersiornermi takutinneqassaaq. Filmi kinaassutsimik, neriuuteqarnermik ataatsimoornermillu oqaluttuaavoq, Kalaallit Nunaata erfalasua pinngortitsisorlu Thue Christiansen oqaluttartoralugu oqaluttuarineqartoq.

- Filmi nuannerluinnarpoq, Pipaluk Kreutzmann Jørgensen oqarpoq nangillunilu:

- Misigisagut ukiuni kingullerni pisut eqqarsaatigalugit takutissallugu tulluartuuvoq.

Filmimi katsorsaataavoq, oqarpoq, taassumalu oqaloqatigiinnermik isiginnaagassiaq aallartitsisinnaassasoq neriuutigaa.

- Qanoq ililluta ingerlaqqissinnaavugut?

Festivali periarfissanik pilersitsisoq

Nuuk International Film Festivalimi franskit kalaallillu filmiliaat ‘Greenland’ ukioq manna aammattaaq takuteqqaarneqassaaq, tassani kalaallit isiginnaartitsisartut arlallit peqataapput, ilaatigut Aka Niviâna annertuumik inuttaaffeqarpoq.

- Nuuk International Film Festivalip nunarsuaq tamakkerlugu takutitseqqaarfigineqarsinnaanera pingaartorujussuuvoq, festivalillu ullumikkut inissisimaffianut, ersiutaavoq, Pipaluk Kreutzmann Jørgensen oqarpoq.

Filmiliortarnerup silarsuaa immikkut ukioq manna sammineqassaaq, tassani Canada Media Fund, Det Danske Filminstitut, Indigenous Screen Office aamma Kalaallit Nunaanni Filminstitutti peqataassapput.

- Kalaallit filmiliortartut ulloq naallugu ataatsimoortissavagut, tassanilu kalaallit suliniutaat sammineqassapput, nunanilu tamalaani filmiliortartut aningaasaliisullu aamma ataatsimeeqatigineqassapput, Pipaluk Kreutzmann Jørgensen oqarpoq nangillunilu:

- Festivalimi filmilianik takutitsiinnarani aamma piginnaasaqaleriartortunut kalaallinullu filmiliortartunut pioreersunut nunanit tamalaanit filmiliortussanik naapitsinissamut, attaveqatigiinnissamut suliniutiminnillu ingerlatitseqqinnissamut periarfissanik pilersitsineq ukiuni kingullerni qulini ineriartortinniarsimasatsinnut ilaavoq.

Pilersaarut tamaat uani takuuk: niff.gl