Peqatigiiffik nutaaq kulturit marluk naapiffiannik sanarfiniartoq

Erinarsoqatigiit sisamat – kalaallit pingasut danskillu ataatsit – arfininngormat Jyllandip avannaanni illoqarfeeqqami Skørpingimi Rold Skoverujussuarmi upernaakkut qorsooqqissisumi inissisimasumi nipilersortarfimmut ataatsimoorlutik qaqimmata, kulturikkut, inuit akornanni nipilersornikkullu naapiffimmik sanarfisoqarpoq. 

Erinarsoqatigiit sisamat tassaapput Arsarnerit Aalborgimeersut, Ikinngutigiit, Neriuut Randers kiisalu Skørpingimi erinarsoqatigiit De Rytmiske Unoder, Arsarnernik aqutsisumit Birger Lundholmimik siulersorneqarlutik erinarsuutinik 40-ngajannik appisimaarput. 

Nipilersornikkut naapiffimmik sanarfineq aaqqissuussap Arktisk Pulsip ilaagaa, Skørpingimi MusikStationenimit Aalborgimi Kalaallit Illuannit kiisalu Jyllandip avannaani kulturikkut peqatigiiffimmit Tikiusaamit ikiorneqarluni aaqqissuunneqarpoq. 

Paasinninnermik nukittorsaasoq

- Kulturi inuit akunneranni naapeqatigiiffimmik sanarfeqataasinnaasoq upperigatsigu, siorna Tikiussaq pilersipparput, Ivalo Lyberth, Tikiusaami siulittaasoq oqarpoq.

- Kalaallit danskillu akornanni paaseqatigiinnerup nukittorsarnissaa kissaatigaarput, inuillu naapeqatigiiffigisinnaasaannik, misilittakkaminnik paarlaateqatigiiffigisinnaasaannik angerlarsimasutullu misigiffigisinnaasaanik pilersitsinissaq kissaatigaarput. Aaqqissuussinerni arlalinni peqataasareerpugut, Arktisk Pulsili maannamut aaqqissuussatsinni annersaavoq. Naak silaginnera nalaanngikkaluarlutigu ulloq nuannersumik ingerlanneqarpoq. 

- Takuniaasut piffimmeersut amerlanerit kulturitsinnik tusagaqarnissaq annertuumik soqutigaat. Kalaallit Nunaannut tunngasut suulluunniit annertusiartortumik soqutigineqariartornerat malugilluarsinnaavarput. 

Kulturikkut aaqqissuussinermi ilaatigut naalagiaqatigiinneqarpoq, qilaatersortoqarluni, Inuit games ingerlanneqarluni, eqqumiitsulianik saqqummersitsisoqarluni, filmertitsisoqarluni, assassukkanik kalaallillu atuakkiaannik tuniniaasoqarluni, taamatullu aamma Nikie Isaksen, Julie Rademacher Henrik Saxgrenilu oqalugiarput. 

Nunguttut 

Arctic Street Lab ilaatigut saarullinnik immikkanik slidersinik sassaallerpoq. Slidersit 430-t mamarunavissut sananeqarput - nalunaaqutarlu ataasinngortoq tamarmik nungoreerput. Taamaakkaluartorli takuniaasut kaallutik angerlanngillat. Ullormi naallugu kalaallit kaagitalimmik kagemanditalimmik bollulerlugulu kaffillertoqarpoq. 

- Ullup ingerlanerani aaqqissukkamut akeqanngitsumut inuit 500-t missaat takkukkunarput. Tamatumalu saniatigut 200-t tallimanngornermi Rasmus Lyberthip Julie Berthelsenillu tusarnaartitsineranni akiliillutik tusarnaariarput, Jes Kristophersen, MusikStationenimi siulittaasoq ilisimatitsivoq. 

Aaja Chemnitzip ammaanersiorluni oqalugiarnissaa pilersaarutaaqqaarsimagaluarpoq, taannalu aamma Naalagaaffeqatigiinnermi politiki pillugu oqalugiartussaagaluarpoq. Folketingimili ilaasortaasimasoq piffissaq kingulleq atorlugu pisinnaanani nalunaarpoq, pingasunngornermilu unnukkut oqalugiariartorluni Skørpingimukarnissani neriorsuutigalugu.