Ulloriaq Grønvold 22-nik ukioqarluni politinngorniarfimmut qinnuteqarami iliuuseqarnissamik takorluugaqarpoq. Illoqarfianimi Qeqertarsuarmi hashimik ajornartorsiutit amerlasoorujussuupput.
- Pissutsit taamaattut inuppassuit eqqarsarput. Tamannali akiorusuppara, oqarpoq.
Politiitulli sulinerup qasusoortingajappaa. Politiitut sulilerluni ullunik sivisuunik, pikkunartunik ilaatigullu navianartunik sulisalerami, allamik aqqutissarsiortariaqarluni paasivaa.
Ulloriaq Grønvold politiinngorami assiga.
Assi: Nammineq pigisaq.
- Aqqusinermiilluni timimi adrenalineqarneq uannoortuunngilaq, Ulloriaq Grønvold oqarpoq.
Taamaammat inatsisilerinermik ilinnialerpoq, Ilisimatusarfimmilu ukioq manna februaarimi siullersaalluni cand.jur-inngorpoq. Politiitulli sulineq qaangiussinnaavoq. Iliuuseqarumanerli Ulloriaq Grønvoldip attappaa. Ullumikkullu Kalaallit Nunaanni inatsisitigut illersugaanerup pitsaanerulernissaa sulissutigaa.
Qeqertarsuarmi inunngortoq Ulloriaq Grønvold Qeqertarsuarmi peroriartorpoq. Anaanaata Nukaaraq Grønvoldip 28. juni 1986-imi 19-inik ukioqarluni ernertaaraa, ataataalu Aqqalooraq Jakobsen najunngilaa.
- pikkugisorujussuuaralu, Ulloriaq Grønvold, anaanami meeraani sisamani angajullersaasoq oqarpoq.
- Mikigallaratta ilinniagaqanngilaq, amigaateqarnerli ajorpugut, oqarpoq.
Qatanngutaasa angutaat piffissap ilaannaani najuuppoq, peroriartornerisalu sivisunersaanni kisimiippoq. Taamaakkaluartorli toqqissisimasumik meeraavugut, Ulloriaq Grønvold oqarpoq imalu nangilluni:
Ulloriaq Grønvoldip ilaquttami nalukkiaqatigisarneri nuannernerpaat ilaattut isigaa. Nalukkiarnerminni piffissami massakkumiittutut misigisarpoq.
Assi: Oscar Scott Carl
- Nammineq inersimasunngorluni angajoqqaanngoraanni tamanna eqqarsaatiginartarpoq, taanna oqarpoq.
Nuummi angerlarsimaffiani igaffimmi issiavugut. Nillataartitsivimmi atuarfimmi skema Spidermanimillu titartagaq nivingapput – ulluinnaat meerartallit takussutissaat. Tassani aappanilu Nivi Willumsen meeqqaatillu marluk Aqissiaq Ninalu najugaqarput.
Ataataanngorneq misigissutsiuvoq oqaluttuarineqarsinnaanngitsoq. Qularnanngitsumik qaammarlunilu paasinarsisarpoq maanna inuuneq pilersissimagit.
Ulloriaq Grønvold
- Amerlanernik meeraqassaguma nakkutigisinnaannginneri misigissavara, tamaasalu illersorsinnaassanngilakka. Anaanani sisamanik meeraqarpoq, oqarpoq.
Arnaa Qeqertarsuameerpoq angutaalu Arsummeerluni. Ulloriaq Grønvold meeraagami ataataminik attaveqanngingajappoq. Inuusuttuaraallunili annikitsumik attaveqartalerpoq. Ulloriaq Grønvoldip apersortinnerani peqataavoq, imminnullu annikitsunik allaffigisarput. Toquvorli. Kingullermik 2002-mi takuara, Ulloriaq Grønvold oqaluttuarpoq.
Arsallaqqissoq Ulloriaq qatanngutinilu aanaqqeertik Karen Grønvold peqatigalugu Qeqertarsuarmi najugaqarput. Taassuma ajugaanissamik ilinniartippaa – ajorsarnissamillu. Meeraanermini nallukattarlutik Olsenertuartarput. Ajugaaginnavittarpoq, anaanaata tamatumannga unitsitsinissaata tungaanut.
- Anaanama ajorsartittassagaanga oqarfigiuarpaa. Taamaattoqaraangallu aqutassaajunnaavittarpunga, Ulloriaq Grønvold oqarpoq.
Pannakaalli kisimik isumagissiteqqissinnaasarpaat.
- Tamanna erninni maanna takusinnaasarpara, Ulloriaq Grønvold oqarpoq:
- Ajorsarnini tigujuminaatsittarpaa.
Ulloriaq Grønvold meeraanerminni arsartuarpoq. Arsallaqqipporlu. Meeraqatini eqimattannguullutik arsamik malersuineranni, arsarnermi taktiki siusissukkut paasivaa. Allamut nikilluni tunineqarnissaminut piareersimajuartarpoq.
Atualerami arsaqatigiinni ilaasalerpoq Disko-76-imilu ilaasortanngorpoq.
Ulloriaq Grønvold klubbi nuannarinerpaasaamini Newcastlemit trøjea nutaaaq.
Assi: Oscar Scott Carl
- G-44-mulli nuunnermi pilersaarusiortut ilagaannga, oqarpoq.
G-44 aaqqissuussaalluarneruvoq, taamaammallu Ulloriaq Grønvoldip ikinngutaatalu arsaqatigisartakkatik allat klubimut allamut nuunnissaannik oqarfigiualerpaat. Tamatumalu nuannarineqarnera appartippaa.
- Kinguneqarporli Ulloriaq Grønvold oqarpoq, ukiualuillu qaangiummata nunatsinni pissartanngorpugut.
Ulloriaq Grønvoldip piffissaq annertooq arsarnermut atortarpaa, aasaaneranilu pilersaarutaanni arsarneq apeqqutaasarpoq.
- Ukiulli ilaanni Kalaallit Nunaani pissartanngorniunnissamut anngutinngitsoorpugut. Taavami sulerissanerlunga eqqarsaatigaara, Ulloriaq Grønvold oqarpoq, taannalu ilinniarnertuunngorniarnermini landsholdinut ilannguppoq.
Peqqissimissutigeqisaa Naak arsartarunnaarnikuugaluarluni arsarneq suli Ulloriaq Grønvoldimut inituvoq. Igaffiani naapikkatta ilaqutariit angalanerminnit tikeqqammerput, angalanerminnilu ilaatigut Newcastle tikeraarsimavaat. Taasanilu klubbi illersugaa inissisimavoq, taamaammallu soorunami arsaattarfimmi takuniaatinneqarput, klubbip qaqortumik qernertumillu ammukaartunik qalipaatilinnik trøjiinik pisillutik.
Ulloriaq Grønvoldi sinittarfimmut trøjimik takutitassanik aallerami errortat suli iliorarneqanngitsut utoqqatsissutigai.
Ulloriaq Grønvold Newcastlemik nuannaartorinnittuuvoq, arfininngornermimmi TV-mi tuluit arsaakkaangata takusarsimagamigit:
- Eqqaamavara angut qernertumik/qaqortumik ammukaartumik trøjilik måleraangami talimi aappaanik kivitsisartoq. Kinaanersoq, klubbiluunniit suna arsaattartuuffigineraa naluara.
Ilulissani arsamik pissartanngorniunnermi angut arsaattartut trøjiinik TV-mi arsartup takusartagaata trøjiata assinganik tuniniaasoq naapippaa.
- Trøji uannut angivallaarpoq, pissarsiarinerali nuannareqaara, naak klubbi sorliunersoq angutilluunniit trøjillip kinaanera nalugaluarlugu.
Ulloriaq Grønvold ilaquttanilu Newcastlep arsaattarfiani, St. James Park, juulimi takornariarput.
Assi: Nammineq pigisaq.
Ikinngutaasa ilaata Alan Sheareriusoq oqaluttuuppaa. Aqissiallu atiata ilaat Sheareriuvoq, tassunga atsiullugu.
- Arsartarnermi piginnaasakka tamakkerlugit misilerannginneri peqqissimissutimma annertuut ilagaat, Ulloriaq Grønvold issigaqatiginerani oqarpoq.
Imatorsuaq nanertuutiginagu erseqqissaavoq, taamaariarlunili Jyllandimi Hessel Gods fodboldkostskolemiissimagaluaruni qanoq ingerlasimassagaluarnini eqqarsaatigisarpaa.
- Kalaallit Nunaanni arsartartuni piukkunnarnerpaanut ilaanera pissutigalugu atuarfimmit tiguneqarpunga.
Aasaaneranili feeriarnissaq aallartingajalersoq Claus Nielsen Kalaallit Nunaanni timersoqatigiit kattuffianneersoq sianerpoq taarsiullugulu Frederikshavnimi sportscollegemi aallartinnissaa kaammattuutigalugu. Ulloriaq Grønvoldilu akuersivoq. Eqqarsaatiginngisaali tassaavoq nammineq imminut isumagisussaaneranik tamanna aamma kinguneqartoq.
- Nammineerlunga nerisassiortussaavunga, atisannik errorsillunga, tamannalu siornatigut misilissimanngilara. Taamaammat ukiup affaanaa tassaniippunga, Ulloriaq Grønvold oqarpoq.
Ulloriaq Grønvoldip suliffimmi ulapputeqarpallaarnikuunini killiliinissamik ilikkagaqarfiginikuuaa.
Assi: Oscar Scott Carl
Klassimi nutserisoq Qeqertarsuarmi qallunaarpassuaqanngilaq, Ulloriaq Grønvoldillu angerlarsimaffiani aamma qallunaatut oqaluttoqarneq ajorpoq. Taamaakkaluartorli oqaatsit paasiaarpai, atuaqatiminilu nutserisunngorluni.
- Napparsimagaangama atuartitsineq iluatsissinnaaneq ajortoq eqqaamavara.
Ulloriaq Grønvold Nuummi 2008-mi politinngorniarluni aallartippoq. Qaammatit arfineq pingasut atuareerluni Qaqortumi praktikkilerpoq. Politiitut sulineq pissanganartippaa. Ilaatigulli aamma pissanganarpallaalersarpoq. Ukiortaap unnuaanni vagtioreerluni qasulluinnarpoq, kingornalu nalunaaqquttap akunnerini 16-ini sinippoq.
- Atorfigiinnarsinnaanagu malugisinnaavara. Sulerissaangami taava, eqqarsalerpunga.
Ulloriaq Grønvoldip kalaallit oqaasiinik piginnaasai inatsisilerituutut aallartinnissaanut tunngavissiipput. Praktikernermilu nalaani eqqartuussivimmi unnerluussisussaatitaasutut sulineq misilippaa.
Nina aamma Aqissiaq Alan Shearerip eqqaassutissaata saani, taanna isertitsigaangami talimi qullartarnerani nalunnginneqaatigaa.
Assi: Ulloriaq Grønvold
Narsamimi angut tigummigallarneqarpoq, politiillu tamarmik danskiupput. Taamaammallu suliamik tigusilluni unnerluussisussaatitaarusunnginnersoq Ulloriaq Grønvold aperineqarpoq, oqaatsimmi marluk atorsinnaavai.
- Angut angummik allamik ujaqqamik niaquatigut anaasisimavoq. Qaammatit arfineq pingasut pinerluuteqarsimasunut inissiisarfimmiittussanngortinneqarpoq, Ulloriaq Grønvold oqaluttuarpoq.
Taamanikkut politiitut sulinermut ilaanerata saniatigut unnerluussisussaatitaasut sulinerannik annikitsuinnarmik ilisimasaqarpoq. Tassanngali oqaluttuunneqarpoq, suliarlu nuannarilluinnarpaa.
- Uppernarsaatinik saqqummiussinissaq suliamillu inaarsaasarnissaq uannoorluinnartuupput, taanna oqarpoq.
Nalunaarutiginninnermik tigusinermit eqqartuussisoqarnissaa angullugu suliami peqataaneq iluarisimaarpaa.
Ulloriaq Grønvold 2016-imi politiitut suli sulilluni uippallernermik eqqugaavoq. Nammineerlunilu tamanna maluginngilaa. Aatsaat tarnip pissusaanik ilisimasalimmik oqaloqateqareerluni ajortoqarnera paasivaa.
- Qanoq inninnik apeqqutinnguup anertikkartutut misigitippaa, Ulloriaq Grønvold, napparsimasutut imminut nalunaarutiginissamut kaammattorneqartoq, oqaluttuarpoq.
Taarsiullugu sulinngiffeqarpoq, atorfinnillu allanik misileraanermini politiitut sulinngilaq. Aalajangernerli oqitsuinnaanngilaq. Akerlianik aalajangerniarnera tamanit ajornakusoornerpaajuvoq.
- Suliffik nuannarisaq qimassallugu assut ajornakusoorsimavoq. Paasineqannginnerli tatineqarnerlu aamma misigiuminaapput.
- Politiitut suliassat suut suliarinissaat ernummatigivallaartarnikuunngilara - sinnakittarnerliuna ajornartorsiutaasoq, Ulloriaq Grønvold oqarpoq.
Assi: Oscar Scott Carl
Politiiujunnaartoq Ulloriaq Grønvold Ilisimatusarfimmi inatsisilerinermik bachelorinngorniarluni 2019-imi aallartippoq. Piffissap ilaa politiini sulinissani pilersaarutigaa. Taakkuli marluk imminnut ataqatigiissikkuminaapput. Politiit piffissani aalajangersimasuni sulisarnissaq kissaatigaat, ilinniarnerminilu piffissamik eqaatsuutitsinissamik pisariaqartitsivoq.
- Taava politiinit sulinngiffeqaqqissallunga qinnuteqarpunga, itigartitaallungali. Taarsiullugu soraarpunga, Ulloriaq Grønvold, allamik periarfissaqanngitsoq oqarpoq.
Aaqqiissutissarsioqqipallapporli: Ataasinngornermi soraarpoq. Pingasunngornermi eqqartuussissuserisoq Finn Meinel politeeqarfimmi naapippaa. Taakku marluullutik suliani arlalialunni illuatungeriittarsimapput.
- Inatsisilerituunngorniarlunga allarteqqammillunga politiinilu soraarlunga oqaluttuuppara. Finn Meinel minutsit tallimaanngitsulluunniit sianerpoq suliffissaanillu neqeroorfigalugu, Ulloriaq Grønvoldilu Nunatsinni illersuisuni taamanili sulilerpoq.
Ukioq siulleq ullup ilaannaanni sulisarpoq, Ulloriaq Grønvoldilu 2022-mi inatsisilerinermi bachelorinngorami piffissami tamakkiisumi sulilerpoq. Tamannalu 2024-mi inatsisilerinermik kandidatinngorniarluni aallartikkami nangippaa.
Suliatigut ajornartorsiutaanngilaq – Ulloriaq Grønvold 11,2-mik agguaqatigiissillugu karaktereqarluni soraarummeerpoq– piffissarli eqqarsaatigalugu uippallernarsimaqisoq, oqaluttuarpoq.
Naak politiiujunnaaraluarluni, Ulloriaq Grønvold suli inuiaqatigiinni iluaqutaarusuppoq.
- Inatsisitigut illersugaanerup pitsaanerulernissaa sulissutigerusuppara, oqarpoq.
Kandidatinngorniutimini Kalaallit Nunaanni Politiit apersuisarnerat allaaseraa.
- Apersuinermi nalunaarusiat arfineq-pingasut apersuinerit immiunneqarnerannut sanillersuuppakka. Imaat assigiittussaaniaraluarput, tamatigulli taamaanneq ajorpoq. Tamannalu eqqarsarnalaarpoq, oqarpoq.
Suut tamarmik uninngasut Ulloriaq Grønvold Qeqertarsuarmut angerlarluni politiiunissaminut 2018-imi periarfissarsivoq – tamannalu siunnerfigiuarsimavaa. Nuummi tamanna sioqqullugu najugaqarfigisamini Nivi Willumsen naapippaa, naartulersimavorlu. Taamanikkut aappariinngillat, Ulloriaq Grønvoldilu qinigassinneqarpoq.
- Ataatannit ataataalluarnerussallunga aalajangersimavunga, oqarpoq imalu nangilluni:
- Sapaatillu akunneranut ataasiaannarlunga sianertarnissara kisimi periarfissaavoq.
Aqissiaq 2019-imi inunngortoq najorusuppaa. Taamaammallu inunngornerani najuunniarluni Nuummut uterpoq, Nivi Willumsenilu ernereeruni Qeqertarsuarmut uteqatigalugu erninerminut atatillugu sulinngiffeqarnermini tassaaneeqqullugu siunnersorpaa.
- Qujanartumillu akuersivoq, Ulloriaq Grønvold oqarpoq. Sulinngiffeqarneratalu nalaani inooqatigiilerput, ilaqutariillu Aqissiap najaanik Ninamik meerartaaqqipput.
- Ataatanngornermi misigissuseq nassuiarneqarsinnaanngilaq, Ulloriaq Grønvold oqarpoq. Inuunerup pinngortitavit anaasutullusooq ittarpaatit.
Meerartaqarluni ilaqutariittut inuunermi ulluinnaat sukkasuumik ingerlasarput, aallertoqartarluni, meeqqanukaassisoqartarluni, sunngiffimmi sammisaqartarluni nerisassiortoqartarlunilu. Suullu tamarmik ataqatigiinnissaanni nukissaalatsinarsinnaasarpoq.
- Akuttunngitsumik aqagu ullumikkornit ataataalluarnerussallunga eqqarsartarpunga, Ulloriaq Grønvold oqarpoq.
Ilaqutariit nalukkiaraangata Ulloriaq Grønvoldillu nammineq meeqqamilu immami aqqarsimaarnissaat kisiat eqqarsaatigissagaangamiuk ataataalluartutut misigisarpoq. Aqissiaq nalukkaangat Ninalu suli nalussinnaanngikkaluarluni qunusuilluni imaanut tingisarnerani ilagalugit.
- Arfininngornikkut naluttarfiliartarneq nuannareqaarput. Taamaalinerani weekendi aatsaat aallartittarpoq, arlaannillu angumerisassaqarneq ajorpugut, Ulloriaq Grønvold.
Taamaannerani kiisami piffissaq uninngasutullusooq ittarpoq.
