Pride Month 2026: Sapaatip akunnerata tulliani ingerlanneqassaaq
Arfininngornermi juunip 13-ni Nuuk Pride 2026 ingerlanneqalerpat oqalugiarnerit aliikkusersuinerit pilersaarutaapput pisoqatigiittoqassallunilu. Ukiormanna qulequtarineqarpoq “Pride tamanut”.
Gay Pride Nuuk 2014-mi ingerlanneqarmat pisoqatigiinnermi assilisaq takuneqarsinnaavoq. Ukiormannalu assingusumik aaqqissuussaq Nuuk Pride 2025 taajuuteqarpoq "Pride tamanut", aaqqissuisut Sipineq+ tusagassiutinut nalunaarumminni allapput.
Assi: Leiff Josefsen
Sapaatip akunnerata tulliani juunip 13-ni Nuuk Pride 2026 ingerlanneqarnissaaq. kulturikkut assigiinngitsunik sammisassaqassaaq aliikkusersuisoqassallunilu.
Sipisaq+ aaqqissuisoralugu Nuuk Pride 2026 ingerlanneqalerpat “Pride tamanut” qulequtaritinneqassaaq.
Kikkut tamarmik, suiaassuseq, suiaassutsikkut kinaassuseq, qassinik ukioqarneq inuunermilu inissisimaffik apeqqutaatinnagit aaqqissuussamut peqataasinnaasut naqissuserlugu, Sipineq+ tusagassiutinut nalunaarutimini allappoq.
SIPINEQ+
Sipineq+ tassaavoq Kalaallit Nunaani LGBTQIA+-it pisinnaatitaaffiinik malunnaateqarnerulernissaannik atugarissaarnerunissaannik, inuiaqatigiinnilu akuutitsinermik pilersitsiniarluni suliniaqatigiiffik.
Pilersaarut
Aaqqissuussineq “Pride tamanut” nalunaaqutaq marlunut, imerniartarfiup Killuut/Brewhouse Greenlandip eqqaani, Imaneq 30-miittumi aallartissaaq.
Ingerlaaqatigiinneq sioqqullugu nipilersukkanik appisimaartoqassaaq, kiinnanik qalipaatitsisoqassaa aamma allagartarsuarnik sanasoqassalluni.
Nalunaaqutaq 14:40 Kommuneqarfik Sermersuumi borgmesteri Avaaraq Olsen (IA) aamma Meeqqanut, Inuusuttunut, Inatsisinik Atuutsitsinermut Naligiissitaanermullu Naalakkersuisoq Mariane Paviasen Jensen (IA) oqalugiassapput.
"Pride tamanut" pisulluni ingerlaaqatigiinneq aallartissaaq naammassissallunilu Killut silataani.
Assi: Sipineq+
Unnussiuaaqatigiittoqassasoq
Ingerlaaqatigiittoqareerpat nalliuttorsiorneq Killut/Brewhouse Greenlandip silataani ingerlaqqissaaq. Ivaana Kristiansen Olsen tusarnaartitsissaaq Islandimeersorlu drag-imik takutitsissalluni.
Killut suleqatigalugu Nuuk Pride 2026 unnukkut nangeqqinneqassaaq “Pride aften”-mik (Pride unnukkut, aaqq.) taallugu. Tassani tusarnaagassiortartut 'Homoholdet' aliikkusersuissapput, Naja P-lu tusarnaartitsissalluni.
Nuuk Pride 2026 ingerlanneqarnerani aaqqissuussani peqataasut toqqissisimatinneqarnissaat anguniarlugu Matu Security-minngaanneersunik nakkutilliisoqassasoq, aaqqissuisut ilisimatitsipput.
Pisussat allat
Sapaatip akunnerata ingerlanerani aaqqissuussat assigiinngitsut ingerlanneqassapput.
NAPA-p allaffeqarfiani Arnanguak Skifte Lynge aaqqissuisoralugu, marlunngornermi pingasunngornermilu juunip qulingiluaani qulinganilu, sapangaaqqiortitsisoqassaaq, nalunaaqutaq arfineq marluniit qulingiluat tungaanut.
Pride qulequtaralugu Quiz (eqqorniaatitsineq, aaqq.) Brewhousemi sisamanngornermi ingerlanneqassaaq.
NAPA, NIKK (Nordic Information on Gender) aamma Islandimiit Jon Gnarr Nunat Avannarliit Siunnersuisoqatigiinnit aningaasaateqarfiit qinnuteqarfigineqarsinnaasut aningaasaliissuteqartarnerlu pillugit, NAPA-p allaffeqarfiani tallimanngornermi juunip 12-ni nalunaaqutaq sisamaniit arfernup qeqqata tungaanut saqqummiussissapput.
Sipineq+ facebookkimi quppernera pisussanik alaatsinaaffigineqarsinnaasoq ilanngullugu kaammattuutigineqarpoq.
