Qajartortilluni eqqarsaatai unittarput

Karl Peter Jonathansen assigiinngitsunik inisseqattaarpoq.

Qaannamik Unammersuarneq Nuummi ingerlanneqartussaq aallartippoq. Allunaariaqattaarnermik Inussivimmi unamminissamut qisuit sanileriiaarlugit napparneqarsimapput. Karl Peter Jonathansen isiginnaartut naliliisartullu saanni allunaariaqattaarpoq.

Allunaariaqattaarnera ima sukkatigaaq allanngilaq ajornanngitsuaqqamik allunaariaqattaartoqarsinnaasoq. Isaali toqqarlugit isigigaanni allaasoq takuneqarsinnaavoq. Tinguartisimalluni aallussivoq.

Allunaariaqattaarnermik nalinginnaasumi minutsit 30-t iluanni pointinik amerlanerpaanik angusaqarniarnini siunertaraa.

Naammassigami 728-nik pointinnappoq. Ajugaavoq. Tulliuttumut pingajuattullu inissittumut sanilliullugu pointeqarneruvoq, taakkumi 544 pointinik 416 pointillu angusaqarput.

Karl Peter Jonathansenili ajugaaginnanngilaq – inuunermi pingajussaat rekortiliivoq.

Nammineq aamma tupaallaatigaa.

- Tupappunga, upperiuminaatsillugulu, Karl Peter Jonathansen unammersuarnerit naammassineranniit sapaatip-akunnera qaangiuttoq AG-p naapimmagu oqarpoq.

Inuusuttuaraalluni qaannamut ikeqqaarnerminiilli inuunermini aallutariniarlugu paasisimavaa. Piaarinaatsoornerinnarmilli tamanna pinikuuvoq.

Pilersaarutaanngitsumik qajartortoq

Karl Peter Jonathansen Sisimiuni 1987-imi februaarip 27-ani inunngorpoq. Angajoqqaani Lukas Jonathansen aamma Bolethe Jonathansen, aleqanilu Paninnguaq Jonathansen aamma Nuka Jonathansen blokkit ilaanni najugaqatigalugit peroriartorpoq.

- Nuannernerpaavoq, aqqaluaanini pillugu oqarpoq.

Ilaquttani ilagalugit asimi tupermut unnuiartortarput. Karl Peter Jonathansenip pingasut sisamallu akornanni ukioqarluni asimiinnerminni aalisakkamik perngarpoq, ammassak.

Meeraanermini meeraqatini ilagisarpai. Ikinnguterpassuaqarpoq aneerlunilu pinnguaqatigiuartarlugit. Ikinngutaasalu ilaata qaannamik misileeqqaartippaa.

Karl Peter Jonathansen 13-inik ukioqarluni ikinngummini tukkusussaasoq oqarasuaat sianerpoq. Qajartoqatiserineqarput. Karl Peter Jonathansenip taamaalilluni qajartornermik pilersaarutaanngitsumik perngaammik misiliivoq – qajartoqatiserineqarneq allamut qaaqqussutaagaluartoq.

Qaannamik ikeqqaarnini eqqaamaqqissaarpaa.

- Kinngunissara nangiarisorujussuuara, oqarpoq.

Ingerlaannarli kinngunaveersaarnissani ilikkarpaa. Isikkamik arsaattarluni assammik arsartarpoq, imaatigullu paarluni misigissuseq nallernissaqanngilaq.

- Eqqarsarpunga tassa taanna timersuutissara.

Rakortiliisoq

Karl Peter Jonathansenip Sisimiuni qajartortartoqatigiinni Emaanooraq Nathansen naapippaa, taannalu sungiusaasorilerpaa kingornalu ikinngutigillualerlugu.

Karl Peter Jonathansenip maligassaalluartutut isigaa, sungiusaasuatalumi piginnaasaqarluarnera takusinnaallugu.

- Saluttuullungalu eqaakkama allunaasat uannut tulluarput, oqarpoq.

Sungiusartariaqarporli.

- Aallaqqaammut nalorsarpunga, Karl Peter Jonathansenip allunaariaqattaaqqaarnini pillugu oqarpoq.

Ilikkalertupallapporli – Emaanooraq Nathansen ikiortigalugu.

- Sungiusariaqatiseriuaannarpaanga, Karl Peter Jonathansen oqarpoq.

Qajartortartoqatigiit sungiusartarfiannut ullut tamaasa sungiusariartalerpoq. Allunaariaqattaarnermik 2014-imi siullermeerluni rekortiliivoq, tassani 574-inik pointinnalluni.

Allunaariaqattaartarunnaaneranilli kinguneqartumik pisoqarpoq.

Uummatip tusaaniarnera

Karl Peter Jonathansenip angutaa piniartuuvoq Sarfannguaneersoq, arnaa qalipaasuuvoq Itilliminngaanneersoq. Aqqanillit aqqaneq-marlullu akornanni ukioqartoq avipput, Karl Peter Jonathansenilu ataatamini najugaqalerluni. Karl Peter Jonathansenip inuunermini ingerlanerliulernissaa aallartippoq.

Angutaa piniartuugami angalakulasarpoq imigassartortorujussuusarlunilu. Taamaammat Karl Peter Jonathansen anaanaminut 2014-imi nuuttariaqalernikuulluni.

- Anaanagalu ataqatigiilluartuuvugut, ataatamali qimaqqanera artornarluni, Karl Peter Jonathansen oqarpoq.

Angunnilu qanittuararsuupput, maqaasivaalu. Sisimiuni GUX-imi ukioq taanna ilinniartunngorpoq.

- Ilinniarnerali ingerlaannaq unitsippara, Karl Peter Jonathansen oqarpoq.

Maqaasinermini artorsarpoq, naggataagullu ima tujormitigaaq ilinniarsinnaananilu sulisinnaajunnaarluni. Ikinngutiminiilli ikiorneqartilluni pitsanngoriartorpoq.

Ukioq ataaseq qaangiummat iffiortunngorniarluni aallartippoq, suliffimmilli ilinniarnerminut atatillugu suliffigisassaminik nassaanngitsoorluni. Taamani inuunermini aqqusaakkaminut eqqaassutissatut peqarpoq, paffimmini talerperlermi kakiorneq. Sungaartuuvoq takuneqarsinnaanngingajattoq.

- Attoraangakku uummatima tillernera malugisinnaasarpara, Karl Peter Joanthansen kulluminik saamerlermik attorlugu takutiutaa oqarpoq.

Asanninneq nassaarigaa

Karl Peter Jonathansenip Pia Jensen 2016-imi qaannamik unammiuaarnermi peqataanerminni naapeqqaarpaa. Ilulissaneersuummat imminnut unammipput. Piginnaasai torragalugit eqqaamavaa.

- Pisuttaleqqammerluni qajartortalernikuuvoq, Karl Peter Jonathansen aappani pillugu oqarpoq. Aappaata ilaqutai tamapajaamik qajartortartuupput.

Taakku aappariinnerat qajartortartunut Nuummi dommeritut 2017-imi pikkorissareernerup kingorna sukkaannaq ingerlavoq.

- Marsimi aappariilerpugut, apriilimilu nuullunga, Karl Peter Jonathansen oqaluttuarpoq.

Nutaamik angisuumik siniffittaaqqammeraluarpoq. Taannali Sisimiunut qimaannarlugu Karl Peter Jonathansenip uummatini malillugu Ilulissanut nuuppoq.

- Pilersaarutaanikuunngilaq, pisoqariasaaginnarpoq, oqarpoq. Taassuma siniffittaava aleqaata pivaa.

Allunaariaqattaarnermik ukioq taanna rekortileeqqippoq, 698-inik pointinnalluni.

Asannileqqasorujussuupput, sivitsunngitsorlu Pia Jensen ernerminnik naartulerpoq, Knud.

- Paasitimmanga nuannaartorujussuuvunga, oqarpoq.

Knud aasaanerani inunngorpoq, 2018-imi juunip arferngani.

Piffissarli taanna Karl Peter Jonathansenimut pilluarnerinnaanngilaq. Angutaa toqukkut qimaguppoq.

- Misigissutsikka assigiinngitsupilussuupput. Ataataarunnera aliasuutigalugulu ernertaarnera pilluaatigaara.

Knud Qaannamik Unammersuarnermik ukioq manna peqataavoq.

- Allunaariaqattaarnermik, ungasissumut parrunnermi iligiikkaarlunilu parrunnermi ajugaavoq. Naatsumut parrunnermi normu 2-nngorpoq, Karl Peter Jonathansen tulluusimaarluni oqarpoq. 

Timersuutaannaanngitsoq

Pia Jensen 2023-mi juulip aappaani erneqqippoq. Aappariit marlunnik meeraqalerlutik Kira panittaaraat.

Qaannami Unammersuarnermut ilaquttani assigalugit peqataasinnaalerluni aappaagu ukiui naammalissapput. Karl Peter Jonathansenimulli unammersuarnerinnaananilu ajugaanissaq kisimi pineqanngilaq.

- Qajaq uannut ilaquttannullu pingaaruteqartupilussuuvoq. Timersuutaannaanngilaq ileqquuvorli ilaquttatsinni ingerlateqqittagaq.

Inuttullu pingaartitaa aamma pineqarpoq. Kiffaanngissuseq allani misigineq ajukkani tassani misigisarpaa.

- Qajortortillunga eqqarsaatikka unittarput, oqarpoq,

Ilaqutariit Ilulissani illuanni allunaasamik nivingasoqarpoq, taannalu ullut tamapajaasa sungiusarfigisarpaa. Qaammatikkaapajaarlugit pointit qanoq amerlatigisut angusinnaanerlugit misilittartarpaa.

- Sungiusartuarnissaq, unittoornaveersaarluni, taannatut qanoq pikkoritsigilertoqarsinnaanersoq aperineqarami akivoq.

- Allunaariaqattaartillunga timera malugisinnaasarpara. Nukikka manngertuinnanngorlutik sukattarput, uninnaveersaarnissarlu unammillernarnerpaasarluni, Karl Peter Jonathansen oqarpoq.

Karl Peter Jonathansenip meeqqanut tunngassuteqartunik suliffeqarnissani nuannaraa. Meeqqanut qajartornermi sungiusaasuunikuuvoq, meeraaqqerivimmilu sulinikuulluni. Teknikimut tunngasunik aamma ilisimasaqarnini iluaqutigalugu Elgigantenimi sulisuunikuuvoq.

- Kammalaatima oqarasuaatinik angallattakkaminnik arlaatigut ikiugassaagaangamik saaffigisarpaannga, uangalu ikiortarpakka, Karl Peter Jonathansen oqarpoq.

Ilulissat Timersortarfiani maanna sulisuuvoq, tassanilu assigiinngitsunik suliaqartarluni.

Qajartortarnermi saniatigut arpattarpoq, ilaquttanilu aamma qaqqamut pisuttuaqatigisarlugit. Siunissamut takorluugai tassaniipput.

- Meeqqama timersortuunissaat kissaatigaara, oqarpoq nangillunilu:
- Uannut iluaqutaanikooqaaq, taannalu ingerlateqqikkusuppara.

Mallersoq ingerlaarfigilluartaraa

Qaannamik Unammersuarnerup ulluisa kingulliit ilaanni takisuumut parrunnermi unammisoqarpoq. Karl Peter Jonathansen tassani aamma peqataavoq.

Qaannamik kilometerit 16-it ingerlaareerluni qaqigami assai qungujussimapput, timaalu nukissameerluni.

Tamulugassamik muslibarimik sukkaannaq nerivoq, qarlinilu joggingit qaasertut peerlugit.

Silap allanngorarnera pissutaalluni ullaap-tungaani unamminissaraluaq kinguartinneqarnikuuvoq. Kangerlullu maanna qillariinnanngorsimalluni silagippoq.

- Maleqalaarsimasuuppat uannut pitsaanerusimassagaluarpoq, tamuarusaajutaa oqarpoq.

Immap aalanera ingerlaarfigilluartarpaa.

Karl Peter Jonathansenip allunaariaqattaarnermini rekortiliilluni pointinnannera takujuk (minutsit 25-t missaanniit).