Qeqqata Kommuniata qaannamik pissartaq kulturimillu siuarsaasoq eqqaaniarpaa

Qaannamik pissartaq qaanniortorlu Maligiaq Johnsen Padilla toqukkut qimaguppoq. Qaanniortarnermigut qajartortarnermigullu Kalaallit Nunaanni annertuumik sunniuteqarpoq, kulturikkut kingornussatsinnut pingaarutilik, inuusuttuunerminiilli maligassiuisoq, Qeqqata Kommunia allappoq.

Maligiaq Johnsen Padilla qaannamik pissartaavoq qaanniortuullunilu. Kalaallit Nunaanni inuusuttunut maligassiuilluartoq annaaneqartoq, Qeqqata Kommunia allappoq.

Assi: Qeqqata Kommunia

KASSAALUK KRISTENSEN KASSAALUK KRISTENSEN Digitalimik aaqqissuussisoq

Saqqummersinneqarpoq 16. Oktobari 2026 - 11:16

Ussassaarut

Maligiaq Johnsen Padillap toqukkut eqqissinera pillugu Qeqqata Kommunia eqqaaniummik allappoq. Qaanniornermut, qajartornermut, qaajartortartunullu sunniuteqarsimanera Kommunip ilanngullugu eqqaaniummini allappaa.

Maligiaq Johnsen Padilla arlaleriarluni Kalaallit Nunaanni qaannamik pissartaasarpoq, suliniuteqartarnermigullu kalaallit qaannamik angalasarnermik ileqqutoqaat attatiinnarniarlugu ingerlateqqinniarlugulu suliniuteqartarluni.

Ilisimasani piginnaaninilu inunnut kinguaariinni kulturinilu assigiinngitsuneersunut ingerlateqqittarpai taamaalillunilu ileqqutoqqat kinguaariinnut nutaanut ingerlateqqillugit.

Pissartanngorniunnerit amerlasuut

Qeqqata Kommuniata eqqaaniummi allakkamini oqaluttuaraa inuiaqatigiinnut kalaallillu kulturikkut kingornussaannut qanoq sunniuteqartigisimasoq.

Ussassaarut

- Maligiaq tassaavoq inuk Qeqqata Kommunianut, Kalaallit Nunaannut nunarsuarlu tamakkerlugu sunniuteqarluarsimasoq. Inuunermini kalaallit kulturikkut kingornussassaat qaanniorneq qaannamillu atueriaatsimik pingaarutilimmik suliaqarluarsimalluni. Taamaalilluni attatiinnarneqarnissaa, ingerlateqqinneqarnissaa minnerunngitsumillu nunarsuaq tamakkerlugu siammarterluarneqarnissaanut suliamut pingaarutilimmut peqataasimalluni.

- Inuusuttunnguullunili timersuutini ilungersunartuni assigiinngitsuni peqataasarnermigut timersornikkut annertuumik aamma nunatsinni maligassiuisuusimavoq. Sisimiuni Arctic Circle Racemi, Kujataanilu Greenland Adventure Racemi arlaleriarluni peqataasarsimavoq, Qeqqata Kommunia Facebookimi quppernermini allappoq.

Aammattaaq Maligiaq Johnsen Padillap qitornai, ilaqutai ikinngutaalu kommunimit eqqaamaneqarput.

- Qeqqata Kommunia sinnerlugu Maligiap suliaanut pingaarutilimmut ataqqinninnerput qujamasunnerpullu takutikkusupparput. Qimagunnera kommunitsinnut, Kalaallit Nunaannut aammalu qajaq pillugu suleqatigisimasaanut tamanut annaasaq annertuvoq.

- Qitornai, ilaqutai, ikinngutai qanigisaalu tamaasa misiginneqatigingaarpagut nukissamillu annertuumik kissaallugit. Maligiaq maqaasissavarput, suliaali nunatsinni kulturikkut tunniussai tammajuitsorissavagut. Qeqqata Kommunia allappoq.