Qimaanermiit toqqissisimanermut

Qaammatini marlunni tuperluni pinngortitamiittussanngorluni paasigamiuk qisuariaataa ersarippoq.

Qimaavoq.

Kilaarsarfimmukarusunngilaq.

Qaammatini marlunni nalinginnaasumik angerlarsimaffeqartussaannginnini, siniffeqartussaannginnini avatangiisinilu sungiusimasani qimallugit angalanissani takorlooruminaatsilluinnarpaa.

- Aamma inuusuttuaranngornissannut ikaarsaarami qaammatini marlunni tupermi najugaqarneq qanoq iluaqutigisinnaanerlugu takorloorsinnaanngilara.

Nikoline Naane Kristiansen taama oqaluttuarpoq.

Ullumikkut meeqqani marluk ilagalugit Danmarkimi najugaqarpoq.

Meeraaneratali ilaa suli meeraalluni Nuummi meeqqat angerlarsimaffianni Tupaarnami najugaqarallarami aasarsiortarfimmini Kilaarsarfimmiippoq.

Nikolineli taamaakkaluartoq aallarpoq.

- Sapaatit-akunneri siulliit marluk tupermiiginnangajavippoq, taanna oqaluttuarpoq.

Aatsaat neriartuleraangami perusuersariartuleraangamilu anillattarpoq. Piffissap sinnerani sinittarpoq.

Meeqqat angerlarsimaffianni Tupaarnamiittut ukiuni 20-ngajanni Ameraliup qinnguani Kilaarsarfimmi aasarsiortarput. Nikoline taakkununnga ilaavoq. Tassani ulluinnarni inuuneq allanngorluinnartarpoq, qaammatinimi arlalinni pinngortitamut qanittumi najugaqartarlutillu tuttunniarnissaq ilinniartarpaat.

Anillakkiartuaartoq

Sapaatit-akunneri marluk qaangiummata allanngortoqarpoq. Atuakkani qaqippai.

Akunnerpassuarni atuartarpoq.

- Atuakkannut tiguartiivippunga. Nalunaaquttap-akunnerpassuini atuartarpunga.

Ullormiit ullormut allanngortoqanngilaq. Arriitsunnguamik ataatsimoortunut akuuleriartuaarpoq. Inersimasut ikiorlugu akuulersippaat. Arriitsunnguamik suliassanik suleqataasarnermut, pisuttuartarnermut oqaloqataasarnermullu akuliuppoq.

Soorlu suna pinerpoq qamuuna kaanngariartuaartoq.

- Soorlu naasutut imerterneqarlunga naajartoriartuaartunga. Arriitsumik sikkeriartuaarpunga, taanna oqaluttuarpoq.

Tuperli aamma milliartorpoq. Nunarsuarlu silatiminiittoq alliartuaarluni.

- Isumakkut allanngorpunga. Paasivara ataatsimoorneq suleqatigiinnerlu nuannaralugu. Kisimiinngitsutut misigiartuaarpunga, taanna oqaluttuarpoq.

Aallaqqaammut takornartatut toqqissisimananngitsutullu misigisani ilisarileriartuaarpai. Aqqutit, qaqqat tammaarfiullu eqqaaniittut ilikkarpai. Tupermit ungasilliartorpoq, iluaniitillunilu takusimanngisani tamaasa takusinnaalerpai.

Taava misigisaqartalerpoq.

Eqqaamasat nuannersut

- Ataasiarluta tammaarsimaffimmiit Kapisilinnut pisuppugut. Nalunaaquttap-akunnerini arfineq-pingasuni pisuppugut. Mp3-nik tusarnaarutinni nipilersuutinik tusarnaarpunga. Nuan! Puigunngisaannassavara, taanna oqarpoq.

Gummibådimit immamut nakkarsimanini, siullerpaamik uumasumik pisaqarnini aamma ullormi tuttumik qanimut takunini oqaluttuarai.

- Meerarpassuulluta tuttu takugatsigu tungaanut arpappugut. Uanga kuup eqqaatigut allakkoorpunga. Taava takuara. Unilluni orsuaasartorujoorpoq. Toqqorpunga allallu apuunnissaat utaqqilerlugu, apuutinngillalli, taanna oqaluttuarpoq.

Nikoline toqqorsimaffimminit nikuippoq tuttorlu siggarfigalugu. Arriitsumillu imminnut qanilliartorput.

- Qanillilluinnaratta tuttulu marluulluta immitsinnut tupatsippugut. Taava qimaavugut.

Oqaluttuarami illarpoq, eqqaamasanilu suli uummammiugigai ersarippoq.

Kilaarsarfik qimaaffissariunnaarpaa.

Tassani pisuttuartarlunilu, allat illaqatigisarlugillu allani misigisimasinnaanngisaminik misigisaqarsimavoq.

Nuannarilluinnarlugu paasivaa.

- Illoqarfimmit ungasissumiilluni iluarpoq. Eqqissilluni imminuinnaq eqqarsaatiginissaq iluaqaaq, taanna oqarpoq.

Nunarsuaq kimilluunniit attorneqarsinnaanngitsoq

Kingumut qiviaraangami Kilaarsarfik imminut qanoq pingaaruteqartigisoq aatsaat paasilertarpaa.

Tassani toqqissisimasutut misigiartuaarsimalluni oqarpoq. Naleqartutut paasitinneqarpoq, aammali allat ilagigaangaminni qanoq eriaasiatigut malugaa.

- Naleqartutut misigisimatittarpaannga. Allat naleqarluartumik tunniussassaqartutut pissusilersorfigisarpaannga. Taanna misigiuaannarpara.

Misigissut taanna inuunermini ingerlateqqippaa.

- Kilaarsarfimmi kimilluunniit attorneqarsinnaanngitsumik qamuuna silarsuaqalerpunga. Toqqissisimaffigingaakkannik, taanna oqarpoq.

Oqaluttuaritillugu nipaallivoq. Ullumikkummi taamanimiilli qanoq allanngortigisimalluni malugisinnaavaa.

- Uannut pingaaruteqartorujussuuvoq, pinngortitamullu taama qanitsigisumi inuuneq ineriartornarpoq. Ingammik misigissutsikkut naalliuuteqartumut.

Inersimasut uummatigissut

Nikoline Naanu Kristiansenip Kilaarsarfik ullumikkut eqqarsaatigigaangamiuk sulisut eqqaamanerpaasaasa ilagisarpaat.

Inersimasut najuussimasut uummammigut assut asavai. Uummatigissutut taavai — taakkualu ilassilluarmanni qujamasungaarpoq.

Inersimasunngorami toqqissisimaneq Kilaarsarfimmi misigisimasani ukiuni taakkunani tammaarsimaaqataasarsimanngikkaluaruni ullumikkut inuunermini ilaasimanavianngikkaluartoq paasivaa.

- Kilaarsarfimmiissimanngikkaluaruma toqqissisimanannginnerussagaluarpunga.

Qujamasunnerulli suut tamaasa ajornannginnerulersissinnaanngilai.

Ullumikkut meeqqat angerlarsimaffiannut Tupaarnamut isernissaq suli ajornakusoortissinnaavaa. ’Tupaarnaq’ inuunermini inunnut misigisanullu pingaarnerpaanut, aammali inuunermi nalaani erloqinartorsiorfiusumut, attuumassuteqarpoq.

Taamaakkaluartoq sumiiffimmik suli eqqaamasinnaasaminik tunissutisiffigisaminik oqaluttuarinnissaguni Kilaarsarfik uterfigisarpaa.

Meeraalluni Kilaarsarfimmukartussanngorami qimaasimavoq. Taamani qaammatini marlunni tupermiitilluni qanoq iluaqutaatiginersoq paasisinnaanngilaa.

Ullumikkut allaanerulluinnarpoq.

Maannakkut qitornani ilagalugit Kilaarsarfimmut uternissani takorloorpaa. Taakku aamma tammaarsimaffimmut siullermik tikimmatut ukioqarput. Ilaaqqullugit qanoq akuersitissinnaanerlugit takorloortarpaa - soorlu inersimasut taamanikkut akuersitinniarsimagaanni.

Taamanikkummi takusinnaanngisani maannakkut takusinnaavai.

Kilaarsarfimmi sumik pissarsinerluni. Aamma suna suli nassatarinerlugu.

- Aamma ullumikkut nikallungagaangama Kilaarsarfik sulisuilu qaammaqqutigisarpakka.