Qulliit nipilersukkallu atorlugit nuannersumik inuulluaqqusisut

Pisariunngilaq. Sunniuteqarluarporli. 

Ualeq eqqissisimasumik aallartippoq.

Scenemi nipilersortut erinarsortullu tunuanni qulliit ataasiaakkaaginnaagaluarlutik sunniuteqarluaramik inersuaq angakkuagarpalaartutut tiguartinnangajattumik isikkoqalersippaat.

Naggammik tusarnaartitsineq, Jim Milnemit, ukiuni 17-ini suleqatigisarsimasaanit, aaqqissuunneqartoq Josef Josefsenip 45-liinerani aamma pivoq, tassanilu tusarnaartartunut qujaniarluni naggammik tusarnaartitserusussimavoq.

Josef Lund Josefsen tusarnaartitsinissap tungaanut ulapingaarami scenemiilerami misigissutsinni maluginiassallugit piffissaqarfigisimanngisani aatsaat maluginialerpai.

- Scenemut pigama misigissutsikka qaffakaariasaarput. Tusarnaartitsinerit, pikkorissaanerit… tassani qiassannik tupippunga. Jim (Milne, aaqq.) ilagalugu scenemiilerama naggammik tusarnaartitsilerlunga uppernarsilerpara, Josef Lund Josefsen oqaluttuarpoq.

Nipilersornerup silarsuaata qimannissaa ilaatigut nammineq aalajangigaraa. Kisianni nipilersornermi, aammali ilinniartitsisutut sulinera suli atorfissaqartinneqaraluartoq naqissuserpaa.

Suliai pillugit tapersersuinerup ukiuni kingullerni annikilliartuinnarsimanera ajoraluartumik malugilluarsinnaavaa.

- Taamaammat nammineq oqassaguma inuuniutigalugu erinarsortartutut sulinera tamaanga killeqarpoq. Tusarnaartitsinerit pikkorissaanerillu ikiliartuinnartillugit ajornarpallaalerpoq, taanna nassuiaavoq.

Maannamuugallartoq oqaatigisinnaanngisaminik pilersaaruteqarpoq. Suliffilli nalinginnaasuussaaq, tassanilu inuussutissaqarumalluni aningaasanik qinnuteqartarunnaassaaq.

- Allarluinnarmik suliaqassaanga. Erinarsornermut ilinniartitsinermulluunniit tunngassanngilaq. Uannut nutaarluinnaavoq. Pissanganarpoq, eqqarsarpasilluni oqarpoq eqqarsaatinilu oqaatigalugu:

- Namminermi aalajangigarigakku taamaassaaq.

Juullernissaanut pikkorissaanerit tusarnaartitsinerillu ikittuinnaat kiserngoruppai, kingornali allarluinnarmik suliaqalissaaq. 

Piviusunngunngitsuungajattoq 

Naggammik tusarnaartitsinermi erinarsuutit tusarnaartitsissutigineqartut assigiinngitsorpassuupput, soorlu kalaallit, Italiamiut tuluillu erinarsuutaat aamma pop-imik erinarsuutit tusaamasat Josef Lund Josefsenip assigiinngitsorpassuarnik piginnaaneqarneranik ersersitsisut.

Pattagiartartup Jim Milnep, sungiussisimalluni tusarnaartunut attaveqarluartup, nipilersoqatigiit ikittut ukuusut aqutsisuuffigai, Fabrizio Barzanti bassertutut, Jonas Lundsgaard Nilsson tumerparpaartutut, Hanne Sandvig Imannuelsen agiartutut, Najannguaq Qvist aamma agiartutut, Tobias Van Der Pals agiarsuartutut aamma Titken Jakobsen qatitoortut tulliattut saksofonertutut, taamatullu nipilersoqatigiinneq nipilersortunit tusarnaariartunillu nuannarineqartoq ersarippoq.

Josef Lund Josefsen Jim Milnelu tusarnaartitsinermi aamma tusaamasanik peqateqarput. Erinarsortartut Josefip nammineq nersortagai Pernille Kreutzmann-Larsen, Nick Poulsen, Arnarissoq Beck Vetterlain aamma Inunnguaq Petrussen Nuummi kulturikkut illorsuarmi Katuami scenemut qaaqquneqarput.

Aningaasaliissuteqartartut ikiliartornerat, siusinnerusukkut eqqartukkani, erseqqissumik takusinnaavaa, ingammik aningaasaateqarfinniit aningaasaliissutit sullitallu ikiliartorneratigut. Tusarnaartitsinerit pikkorissaanerillu aningaasalersornissaat ajornakusoorpallaalersimavoq.

Josef Lund Josefsenip inuunermini ukiut 17-it kingulliit pikkorissaanernik tusarnaartitsinernillu aaqqissuinermut atorpai.

- Tusarnaartitsissaguma pikkorissaassagumaluunniit nammineq aningaasanik ujartuisarpunga. Aningaasaateqarfinnut kommuninullu qinnuteqartarpunga. Pikkorissaassaguma kikkut pikkorissarneqassanersut, kikkut suleqatigineqassanersut paasiniartariaqarpara. Sineriammi ingerlatsissaguma angalanissamut pilersaarusiortarpunga. Missingersuusiornerit. Aaqqissuussakka tamaasa nammineerlunga suliarisarlugillu aningaasartuutit matussuserniartarpakka, Josef Lund Josefsen nassuiaallunilu assersuuteqarluni erseqqissaavoq: naggammik tusarnaartitsinera. Tamanna piviusunngunngitsuungajavippoq.

- 400.000 koruuningajannik akeqarpoq. Aningaasartassai pissarsiarinngitsuungajavippai. Tusarnaartitsinissamulli ullut pingasuinnanngortut aningaasat amigaataasut matussuserneqarput. Taamaatiinnarnissarput eqqarsaatigigaluarpara. Imaluunniit kinguartitsinissarput. Kisianni attaveqaasersuutitigut pissutsit pissutigalugit aamma kinguartissinnaanngilarput, taanna oqarpoq.

Tipsimut Lottomullu qujamasoqaaq, taakkuami tapersersortuarsimavaat. Aamma suliffeqarfiit namminersortut suliniutinut assigiinngitsunut tapersersuiuarput, soorlu Matas, ILJ ENTERPRISE aamma Ittu.net. Ukiuni 17-ini erinarsortartutut inuuniuteqarnermini suliffeqarfinnit amerlasuunit tapersersorneqartarluni erseqqissarpaa.

- Tamanna qujamasuutigeqaara. Taakkua tapersersuinngikkaluarpata juullimut poorskimullu saqqummersittakkakka saqqummersinnaasimanavianngikkaluarput, taanna oqarpoq.

Tapersersorneqannginneq assersuutigalugu Kalaallit Nunaanni Eqqumiitsuliortunut Aningaasaateqarfimmit, nammineq oqaatsini naapertorlugit eqqumiitsuliortunik ilinniartunik tapiissuteqartartumit, maluginiarsimavaa.

- Ukiut kingulliit tallimat ukiut tamaasa qinnuteqartarpunga, akuerisaanikuunngisaannarpungali, Josef Lund Josefsen, Islandimi operamik erinarsortartutut ilinniarsimasoq, oqarpoq.

Kapitali nutaaq

Josef Lund Josefsenip soralussani marluk, Arnakkuluk Arnannguarlu, arfineq-pingasunik aqqaneq-marlunnillu ukiullit, naggammik tusarnaartitsinermi scenemi peqatigai. Akkartik Arnarissoq Beck Vetterlainilu peqatigalugit Abbakkut erinarsugaat Slipping Through My Fingers erinarsorpaat. Niviarsiaqqat arlaata mikrofonia nipilulerpoq, kisianni tamanna unissutiginngilaat. Erinarsornertik tusarneqisumik ingerlatiinnarpaat.

- Akkanngua, juullimut tusarnaartitsiseqqikkusuppugut, kingorna akkaminnut oqarput.

Taama ajornanngitsigisoq illartilluni nassuiaattariaqarsimavai. Tusarnaartitsinissamummi qaammatini arlalinni piareersartoqartariaqarpoq. Josef illarpoq.

Imminut suliniutiminullu tapersersuineq annikilliartortoq misiginngikkaluaruni nipilersornermik ingerlataqaannassagaluarluni qularinngilaa, maannali aalajangereerami, inuunerminilu kapitali nutaaq aallartittussanngoramiuk, qilanaarpoq.

- Erinarsortunngorlaalli siunnersorneqarumasut ikiorneqarumasullu saaffigiuaannarsinnaavaannga, taanna naqissusiivoq.

Misigisat

Josef Lund Josefsen ukiorpassuarni nipilersortartuusimagami soorunami assigiinngitsorpassuarnik misigisaqartarsimavoq. Tusarnaartitsinerup kingorna arlalippassuariarluni qujaffigineqartarsimavoq, misigisalli ilaat puigunngisaannarpai.

- Jimilu Københavnimi peqqissartut illuanni tusarnaartitsivugut. Aappariit utoqqaat 70-it sinnerlugit ukioqarpasittut saarliullutik issiapput. “Qaammarpoq nuna” erinarsorniaripput ippassartut eqqaamavara. Jimip pattaagissamik aallarniisarnera aatsaat erinarsuleraangama ilisarineqarsinnaalertarpoq. Arnap uia erinarsuut ilisaralugu aqussinnaanngisaminik qissaserpoq. Nipilimmik qiavoq. Sajuttuinnaammallu nuliata eqillugu sapinngisaminik tuppallersarniarsaraa.

Josefip tamanna eqqaagamiuk qullilillunilu imermik najorsivoq.

- Misigisaq killitsinnaqaaq. Killitsinnangaarmat misigissutsikka nunusariaqarlugit, taanna oqaluttuarpoq.

Josefip pisoq alla aamma eqqaamavaa. Tamatumuuna Qaqortumiilluni “Ataatarpooq” erinarsorpaa. Saarlermi issiasoq annernartumik nilleriarluni qissaserpoq.

- Tassani aamma qiassara iiginnarpara, taanna oqaluttuarpoq.

Nipilersortartuunini eqqarsaatigigaangamiuk Jim Milne eqqaanngitsoorsinnaanngilaa, taannalu nersualaarujussuaannarpaa. 

- Pattattartutut qaffasissumik ilinniarsimasuuvoq, erinniorsinnaasutullu allagartaqarluni. Nipi aalajangersimasoq paasigaangamiuk apperiaannanngortarpoq. Nuutersortariaqanngilaq.

- Ilinniarnerma nalaani erinniarsuarnik pattattartut ilinniarsimasut suli nuutinik atuisariaqartarput. Jimittaaq versimiit versimut suna pineqarnersoq paasilluarsinnaasarpaa. Taamaammat versit tamaasa tassunga oqaluttuarisarpakka. Tamanna pikkorilluarpaa. Pattattartorpassuit suleqatiginikuuakka, Jimili anguneqarsinnaanngilaq, taanna naqissusiivoq.

- Tamatuma saniatigut inussiarnersuullunilu oqaloqatikkuminartuuvoq, aamma suleqatitut, ikinngutitut inuttullu immitsinnut asanninnermik annertuumik peqarpugut, taanna oqarpoq.

Josefip nipilersortartuujunnaarnera pissutigiinnarlugu attaveqatigiikkunnaarnavianngillat.

Naggammik tusarnaartitsineq tiguartinnartoq naanialerpoq. Tusarnaartut nalunaaquttap-akunnera ataaseq affarlu qaangiutereersut inuunermi ajornartorsiutit qimallugit maannakkut pisartut qimalaarlugit nuannisaannarsimasut, inuunertik ingerlateqqippaat.