Siiva Fleischer erinnamik saqqummersitsivoq: - USA-p nunatsinnik persarinninnera ernummatigisaqaarput

Pingasunngornermi januaarip 14-iani ualigaa kalaalerpassuit pissangallutik aqqaamaleruttortut Siiva Fleischerip angerlarsimaffimminut ammaappaatigut. 

Nunanut allanut naalakkersuisoq Vivian Motzfeldt, Danmarkimi nunanut allanut ministeri Lars Løkke Rasmussen, USA-mi præseidentip tullersortaa J.D Vance nunanullu allanut ministeri Marco Rubio Washingtonimi ataatsimiileruttorput. 

Ulloq ulluinnaammat inuit amerlanerit sulipput, Siiva Fleischerili ullumikkut sulinngilaq. 

 - Ullumikkut freerpunga, Siiva taama oqarsinnarluni TV-p saanut ingippoq pisunillu malinnaanini nangeqqillugu. 

Siiva Fleischerip erinaq "Kalaallit Nunaat - Kalaallit pigaat" nipilersortartut allat peqatigalugit saqqummerseqqammerpaa. Taannalu ilaatigut peqqutigalugu tusagassiortunit saaffigiteqattaarami pisunullu malinnaaniarluni ulloq taanna sulinngilaq. Erinnap qulequtaa takuinnarlugu sumut tunnganera paasinarsereerpoq. 

Piumasaqaatitalimmik iminneqarpoq

Nunatta USA-mit persarineqarnera siorna ingatseriarpoq, taassuma kingorna upernariartornerani Siiva taallioqqulluni nipilersortartunit saaffigineqarpoq. Nipilersortartummi Glenn Møller Steffen Lyngelu erinniorsimallutik iminniarlugu angerlarsimaffianut ornippaat. 

- Mappiuppakka qungujorujullutik, soorlu arlaannik nassaarsimasut, Siivap pisut malinnaaffini najummatsisimaffigigaluarlugit qungujulluni oqarpoq. 

Glennip Steffenillu erinniamik taallartassani "Kalaallit Nunaat - Kalaallit pigaat" ilaassasoq piumasaqaatigaat. 

- Nunatsinni ataatsimoornissarput saassunniarneqarlutalu pisiariniarneqarsarinitsinni aatsaat taama pisariaqartigilerpoq. Taava taamaleriarmat... Atagu una, susoqartoruna?, Siivap ataatsimiittut naammassillutik anillammata malinnaaqqilerniarluni oqalunnini unitsikkallarpaa.

Vivian Motzfeldt Lars Løkke Rasmussenilu J.D. Vancemik Marco Rubiomillu ataatsimeeqateqarsinnarlutik anillammata Siiva malinnaaqqissaalerpoq. Pissanganerminillu najummatseqqasinnarluni nunatta Danmarkillu aallartitai sikaritsimik ikitsisut ajorpasinngitsullu takullugit illalerpoq.    

- Qungujulapput. Pujortaguuillutik, Siiva oqiliallassimarpasilluni illarlunilu taama oqarpoq, ingerlaannarli ilumoorsaaqqilerluni ima nangilluni.

- Pissanganat qanoq oqassanersut.

Ernumasarpoq 

Naak ataatsimiinneq naammassimmat quiasaaraluarluni pisut ilungersunarneri peqqutigalugit eqqartuilernermini sunnertisimasoq qularutissaanngilaq.

- Inupparujussuit annilaangallutik pipput. Taavalu eqqarsarnartorujuulluni. Ilumut taamaassinnaava? Ilitta Amerikap taama annertutigisumik nukillip taama pisinnaagaatigut, Siiva oqarpoq. 

Atugarissaarnerup innarlerneqarsinnaanera ernummatigisaanut ilaavoq.

- Annilaangassutigaara assut Amerikap tiguaraluarunitigut ilinniartitaanerup tungaatigut atuartitaanerup tungaatigut allarpassuarnillu, soorlu peqqinnissap tungaatigut nammineq annertoorujussuarmik aatsaat ooriuteqarutta tamakkua tamaasa iluamik aatsaat attassinnaassallugit, Siiva oqarpoq. 

Siiva Fleischer maanna 66-inik ukioqarpoq. Imaaliarsaarninilu tunngavigalugu ernumalersilluni eqqarsaaterpassuaqartarpoq.

- Utoqqaliartorpunga, arlaatigut silarsuarput allanngussagaluarpat napparsimaveqarnerup tungaatigut allatigullu taava qanoq annertutigisumik peqqinnissap tungaatigut periarfissaqarpunga?, Siiva oqarpoq. 

Taallaq 

Ataatsimiittut naammassereersullu tusagassiortunik katersortitsinissaanut utaqqineq tullinnguuppoq. Taamaalinerani Siivap taalliani eqqartussallugu inissaqarnerulersitsisoq malunnarpoq. 

Siiva 15-it missaanilli ukioqarluni taalliortalerami ukiut 50-it sinnerlugit taalliortareerpoq, qatsunneqanngisaannartunillu arlalissuarnik suliaqarsimalluni. Taallaq suliani suliarisarsimasaminut ima sanillersuuppaa.  

- Allaanerussuteqarpoq aamma allaanerussuteqanngilaq. Aamma tamakkuninnga ajornartorsiutikujunnik taalliortarama. Uannut taanna taalliarissallugu tulluuttorujuuvoq, Siiva oqarpoq. 

Taallaq erinartassaqareermat taallartaata tulluussarniarsarinera suliaangaatsiarsimasoq Siiva oqaluttuarpoq, qaammatillu missaani suliarereerlugu naammassivaa. Taallalli imassaa nalornisigivallaarsimanngilaa.

- Nunatsinni inuit qanoq misiginerat eqqarsaatigalugu periarama taallat takkussoriartulerput.

- Nunatsinni inuusimasut nukeqassusiat eqqaavara, taamatut aamma nukeqartugut nunatsinni inuiaat takutinniarlugu, Siiva oqarpoq.

Nunatsinni erinarsortartut ilisimaneqarnissaannut ilaasoq pulaarlugu isernitsinniit najummatsisimanerujunnaaraluarluni piffissami aggersumi pisunut suli malinnaassamaarpoq. Nunattalu inissisimanerata ilorraap tungaanut saannissaanut taalliani aqqutigalugu iliuuseqaqataasinnaalluni neriuutigaa.

- Neriuppunga ataatsimoorfiulluni ullutsinni iluaqutaalaarsinnaassasoq, Siiva Fleischer naggasiivoq. 

Erinaq "Kalaallit Nunaat - Kalaallit pigaat" Apple Musicimi Spotifymilu pissarsiarineqarsinnaavoq.