Sorlaqarfiit ujartorlugit

Kalaallit Nunaat kalaallillu kulturiat ullup affaata ingerlanerani nersorniarneqarpoq,  Aalborgimi kalaallit illuat, peqatigiiffik Tikiusaaq aamma Nordjyllandimi nipilersortarfik Skråen ataatsimoorlutik kulturikkut aaqqissuussinermik annertuumik ulloqeqqaniit unnuaqeqqata tungaanut ingerlanneqartumik aaqqissuussimmata. 

Aaqqissuussineq annertooq Arctic Rootsimik qulequtalik kalaallit atisaannik, kalaallisuuniit Nickie Isaksenip atisaliaanut nutaanerpaanut tunngasunik paasisaqarfiuvoq, kalaallillu nipilersugaannik erisarsoqatigiinniit Andachanip DJ-erpalaartumik atugaanut tusarnaarfiulluni.

Tamakku tamarmik pilersaarummi imarisatigut ulikkaartumi tulleriiaaginnavillugit misigineqarsinnaapput, assigiinngitsorpassuarnillu periarfissiillutik.

Aput tungujortoq

Aviana Steinbacherip kisimiilluni isiginnaagassiaa Blå Sne nalunaaquttap akunnerata affaanik sivisussusilik maluginiagassaavoq. Tassani oqaluttuarineqarpoq kalaallip danskinik ilinniartunik qaapiaannarluni inuullutik imertartunik naapitaqarnera, ammip qalipaataanik assigiinngisitsilluni quiasaarneq, ammut isigisaaneq angerlarsernerlu.

Naleqannginnerusutut imminut isiginissamut pissutissaqartoqanngilaq.

- Inuuniallaqqissusera tulluusimaarutigaara, silatussusera, anersaanisimaarsinnaanera, pinngortitaq silalu pillugit ilisimasakka, sunilluunnit aamma eqqumiiginarsinnaasunik paasinnissinnaanera, arlalinnik oqaaseqarpunga, timiga atorlugu takutitsisinnaavunga oqaatsillu atunngikkaluarlugit attaveqarsinnaallunga, sallaassuseqarpunga tusarnaarsinnaallungalu, allamut saannanga massakkumiissinnaavunga, pisut tulleriiaarnerannut tatiginnittuuvunga naleqqusallaqqillunga, kalaaliuvunga tamannalu tulluusimaarutigaara. 

Isiginnaariat kalaallit imminut ilisarisinnaasaannik isiginnaariallu dansit ilikkagaqarfigisinnaasaannik Aviana Steinbacher misigissutsikkut attortinnartumik isiginnaartitsivoq.

Kisimiilluni isiginnaagassiap ilaa aamma quianaaluppoq, nannut Kalaallit Nunanni aqqusinermi angalaaginnartut Aviana Steinbacherip takorloormagit.

- Ilaqutariit tamarmik marlunnik nanuuteqartarsimagaluarput, Greenpeacemiilli tatisimaneqarerup kingorna ataasiinnarmik nanuuteqarsinnaalerput.

- Meeraagallarama aamma nanuuteqarpunga. Allakkerisoq qimussinik pajuttuigaangat aallertarnissaanik ilinniuppara. Aallaqqaammut ajornartorsiutaagaluarpoq, nannummi allakkerisup qimmii nerisoorpai, Aviana Steinbacher piumasarsorpoq.

Paamiuniit atisaliullaqqinnerpaanut

Blå Sne isiginnaartitsissutigineqareermat Nickie Isaksen qaqivoq, Paamiuni meeraanerminiit London College of Fashionimi ataqqisaasumi ilinniariarluni atisaliullaqqinnerpaanngornissaminut aqqusaakkani pillugit oqaluttuarluni.

- Kalaaliussusera kingornussakkalu uannut pingaaruteqaqaat, anersaap silarsuaa, pinngortitaq oqaluttuarisaanerlu uanni initupput, Nickie Isaksen oqaluttuarpoq.

Taassuma saqqummiinera ukiaq manna atisaliaasa isiginnaartunut takutissorneqarnerannik naggaserneqarpoq. 

Soorunalumi naggataagut fistertoqarpoq. Andachan minnerunngitsumillu nipilersoqatigiit nuannarineqarluartut DDR Anda Uldum siuttoralugu tusarnaartitsillutik.

- Suut tamarmik iluatsimmata nuannaaqaagut. Suminngaanneerneq pillugu, allanngortoqarnera pillugu aamma piffissaq sumiiffillu akimorlugit ataqatigiinneq uummaarissumik sammerusussimavarput, Ivalo Lyberth kulturilerinermik peqatigiiffimmi siulittaasoq Arctic Rootsillu ingerlanneqarnerani annertuumik suliaqartoq taama oqarpoq.