SIULERSUISUT PAASINIAANIARTUT

USA-p Kalaallit Nunaannut immikkut aallartitaa Avannaata Qimussersuanut qaaqquneqartoq – tamanna naleqqutinngilluinnartoq, KNQK-mit isumaqarput

KNQK-mi siulersuisut nunatta avataaniit politikikkut tatineqarniarneq akuerineqarsinnaanngitsoq, taamaattumillu Avannaata Qimussersuani nunanit allanit politikerit peqataasinnaanerat naleqqutinngilluinnartoq nalilerpaat, kattuffik paasissutissiivoq. USA-p nunatsinnut immikkut aallartitaa Jeff Landry Avannaata Qimussersuarmut qaaqqusaasimasoq amerikarmiut tusagassiortuannit saaffigineqareerlutik paasivaat.

USA-p præsidentiata aallartitaa ivertinneqaqqammersoq governør Jeff Landry Avannaata Qimussersuanut qaaqquneqarsimasoq KNQK amerikami tusagassiortumiik januaarip arfineq-pingajuanni allagarsivoq, KNQK-p siulittaasua Mikkel Jeremiassen paasissutissiivoq.

Assi: Arnaq Nielsen

Thomas Munk Veirum Thomas Munk Veirum Thomas Munk Veirum Tusagassiortoq

Saqqummersinneqarpoq 13. Januaari 2026 - 08:26

Annonse

Avannaata Qimussersua USA-p Kalaallit Nunaannik tiguaaniarluni soqutiginninneranut tunngasumik pissanganartumik ukioq manna sammisaqarfiussaaq.

USA-p Kalaallit Nunaannut immikkut aallartitaa Jeff Landry Avannaata Qimussersuanut qaaqquneqarsimasoq, qimussertartut kattuffiat KNQK ataasinngonerup unnuaani tusagassiuutinut nalunaarummi allappoq.

- Januaarip 8-ni 2026 Amerikami tusagassiortumiik allagarsivugut, USAp præsidentiata aallartitaa ivertinneqaqqammertoq Governor Jeff Landry Avannaata Qimussersuanut qaaqquneqarsimasoq, KNQK-p siulittaasua Mikkel Jeremiassen nalunaarpoq.

Kina qaaqqusisuua?

Siulersuisut taamatut qaaqqusisoqarnera naleqqutinngitsutut isigaat, KNQK-llu kina qaaqqusissummik nassiussisimanersoq maanna paasiniarniarlerlugu:

- Matumuuna ilisimatitsissutigissavarput, KNQK-mi siulersuisuunerit akuerinngimmassuk nunatta avataaniit politikkikkut tatiniarneqarnera, taamaattumillu nunatta avataaneersunik Avannaata Qimussersuanut peqataasoqarnissaa tulluanngilluinnartoq isumaqarpugut.

- Siulersuisut illersuisullu maanna qanimut suleqatigiillutik misissortippaat kikkut nunatta avataaneersunik aggersaassutinik nassiussisimanersut. Paasissutissallu pissarsiarineqarsimalerpata siulersuisut nalunaaruteqaqqikkumaarput.

Jeff Landry Louisianami guvernøriusoq Donald Trumpimit Kalaallit Nunaannut immikkut aallartitatut decembarimi toqqarneqarpoq. Kalaallit Nunaata USA-mut ilanngunnissaa sulissutigissallugu qilanaaralugu Jeff Landry toqqarneqarnermini oqarpoq.

2025-mi sukkaniunnermik aningaasaliisoq

Amerikamiut sinniisoqarfiat Avannaata Qimussersuanut aningaasatigut tapiissuteqarmat, amerikamiut Kalaallit Nunaannik soqutiginninneranni 2025-mi qaammatini siullerni aaqqissuussaq qitiuvoq.

USA-p præsidentiata tulliata nulia Usha Vance isiginnaariartussaagaluarpoq, tikeraarnissanili taamaatiinnarpaa. Amerikamiut sakkutuuisa qulimiguulii qimminik qimussinillu assartuutaassammata USA-p illersornissamut ministeria Pete Hegseth qaaqquneqassanersoq KNQK-mit aamma eqqarsaatersuutigineqarpoq.

KNQK USA-p tapiissutinik neqeroorutaanik 2025-mi akuersinera arlalinnit isornartorsiorneqarpoq, tamatumalu nalaani præsidenti Donald Trumpi Kalaallit Nunaata tiguarnissaanik oqariartuuteqaqattaarneranik Kalaallit Nunaat aamma tatineqaqqavoq.

Sukkaniunnissaq amerikamiut aningaasaliissuteqarfigisimanngikkaluarpassuk taamaatiinnarneqarsinnaasoq Mikkel Jeremiassenip Sermitsiamut siorna apriilimi oqaatigaa, taamaattumillu amerikamiut tapiissuteqarnerat peqqissimissutiginagu.