Aleqa Hammond: Taamaammat naalakkersuisooqataajunnaarpugut

Siumut sooq naalakkersuisooqatigiit qimnnerlugit tallimanngornermi tusagassiortunik katersortitsivoq. Partiip naalakkersuisooqatigiinni akisussaaffiit ilaanni aalajangersimasumik naalakkersuisuutitaqanngitsuni peqataasinnaanngitsut Siumup siulittaasuata erseqqissarpaa.

Aleqa Hammond ulapinnermi qaavatigut tusagassiortunik katersortitsivoq.

Assi: Arnaq Nielsen

KASSAALUK KRISTENSEN KASSAALUK KRISTENSEN Digitalredaktør

Saqqummersinneqarpoq 13. martsi 2026 - 15:33

Annonse

Siumut politikkikkut ulapaarfiusumi ualikkut tusagassiortunik katersortitsivoq.

Siumut naalakkersuisooqatigiinnit aniniarluni aalajangersimasoq nalunaaqutaq 11.00 missaani nalunaarutigineqarpoq. Maannamut Demokraatit, Inuit Ataqatigiit aamma Atassut naalakkersuisooqatigiilersut nalunaaquttap akunnera ataaseq qaangiuttoq Naalakkersuisut siulittaasuata uppernarsarpaa.

- Naalakkersuisooqatigiinnut akisussaafferujussuarnik inuttaqartitsinngitsunut ilaanissarput takusinnaajunnaarsimavarput, Aleqa Hammond oqarpoq.

Anna Wangenheim (D) kingusinnerusukkullu Naaja H. Nathanielsen (IA) Folketingimut qinigassanngortimmata pissutsit ajornerulerput.

- Inuiaqatigiit politikkikkut soqutigisaannik suliaqarnissarput soqutigivarput, naalakkersuisooqatigisattali Naalakkersuisuni sulinissaq pinnagu Folketingimut ilaasortanngornissaq isigiinnarsinnaanngilarput. Atorfiit pingaaruteqarluinnartut marluk inuttaqanngillat. Tamanna akuersaarsinnaanngilarput, Aleqa Hammond oqarpoq.

Taassumattaaq Bentiaraq Ottosen Maasi Pedersenilu, Naalakkersuisuni ilaasortaajunnaartut, innersuussutigai.

Siumumit atorfigineqartut pingaarutillit arlallit

Siumut ulloq manna tikillugu nunanut allanut tunngasut Naalakkersuisuni akisussaaffigaat.

Siumut naalakkersuisuutitaqarnerup saniatigut Inatsisartuni ataatsimiititaliani marlunni pingaarutilinnik inissisimaffeqarsimavoq.

Erik Jensen Aningaasaqarnermut Akileraartarnermullu Ataatsimiititaliami siulittaasuuvoq, Lars Poulsenilu Aalisarnermut, Piniarnermut Nunalerinermullu Ataatsimiititaliami siulittaasuulluni.

Tamatuma saniatigut Siumut aamma Kim Kielsenip atorfigisaanik Inatsisartuni siulittaasuutitaqarpoq.

Siumut Inatsisartuni sisamanik ilaasortaatitaqarpoq. Vivian Motzfeldt Naalakkersuisunit tunuarmat Inatsisartunullu uteqqimmat Anders Olsen sinniisussatut tunuartariaqarpoq.

- Inatsisartuni sulinitsinnik ingerlatitseqqissaagut. Qinersisartullu naleqartitavut tunuliaqutaralugit sulinitsinnik ingerlatitseqqittuassasugut qularutigissanngilaat, Aleqa Hammond oqarpoq.