Ilulissani toqutsisoqarnikuunerani suliaq allaaserisami uani eqqartorneqarpoq.
Blok 5-imi pisimasoq Eqqartuussisoqarfik Sermersuumi suliarineqarnerata ullut sisamassaannut uterpugut, suliarlu naammassineqariartorusaalerpoq.
Ilulissani toqutsisoqarnikuunerani suliaq allaaserisami uani eqqartorneqarpoq.
Blok 5-imi pisimasoq Eqqartuussisoqarfik Sermersuumi suliarineqarnerata ullut sisamassaannut uterpugut, suliarlu naammassineqariartorusaalerpoq.
Angutip 42-nik ukiullip politiinut 2024-mi oktobarip qaammataani nassuiaatiginikuusaa ullaarnganiik tusagaqarfigaarput. 20-nik ukiulik kinaasoq nalunagu, Frelsens Hærimilu takusarsimallugu oqaluttuaraa. Toqutsisimasunut taamani aamma maanna pinngitsuunerarpoq.
Aalakoortilluni kamaqqajaasarnikuunersoq politiit killisiuinermi naammassilernerani apeqqutigaat. Taamaattarsimalluni oqarpoq, amerlanertigulli nuannataartoqartarsimanerarlugu.
Toqutsisimasutut 2018-imi eqqartuunneqartoq
Ilulissani 2016-imi toqutsisoqarnikuunera aamma tusagaqarfigaarput, angut unnerluussaasoq 2018-imi suliami tassani pisuutinneqarnikuuvoq.
Angut alla peqatigalugu toqutaasoq niaquatigut igamik tigussaasumillu noorissumik anaasimavaa, angutip aappaa pisumi immiussisuliullugu. Pinerlineqartoq ruujorit aqqutaannut ledningimik nivinngarpaat. 42-nik maanna ukiulik toqutsisimasutut eqqartuunneqarnermi saniatigut timimut ileqqussaanngitsumik iliuuseqarsimasutut pisuutinneqarpoq.
Eqqarsartaatsimigut napparsimasutut taamani nalilerneqanngilaq. Ukiuni arfineq-marlunni pineqaatissinneqarsimasunut inissiisarfimmiittussanngortinneqarpoq, 2023-milu iperagaalluni.
Unnerluutigineqartoq 42-nik ukiulik pineqaatissinneqarsimasunut inissiisarfimmiinnermini allatarisartagai titartagaalu eqqumiitsut isumakuluutigineqarput. Guuti, pineqaatissiineq pillaanerlu pillugit allassimavoq, taannali qanoq isumaqarnersoq paasiuminaatsinneqarsimalluni.
Oqaaseqaat: Angut 42-nik ukiulik skizofrenimik nappaateqartoq
Unnerluutigineqartoq ullumikkut 42-nik ukiulik Aarhusimi tarnikkut nappaatillit immikkoortortaqarfianni R3-mi 2024-mi decembarimi uninngavoq. Aarhusimi immikkoortortaqarfik R3 pinerluuteqarnikunik tarnikkut nappaatilinnik Kalaallit Nunaanneersunik immikkut ilisimasaqarfiuvoq. Nakorsat angut skizofrenimik nappaateqartutut tassani nalilerpaat.
Allanut sioorasaarisimavoq isumaalu sakkortuumik allanngoriataarsinnaasarluni. Tarrarsortilluni angut isigisani ilisarisinnaasimanagu sulisunut aamma oqaatiginikuusimavaa.
Tarnikkut nappaatilinnut inissiisarfiittussanngortinneqarnissaa innersuussutigineqartoq
Aarhusimi nakorsat eqqartuussinermilu siunersiorneqartartut angut pisuutinneqarpat Danmarkimi tarnikkut nappaatilinnut napparsimmavimmut unitsinneqassasoq innersuussutigaat.
Angut 42-nik ukiulik Aarhusimi pisariaqartitaminik ikiorneqarnersoq illersuisumit aperineqarpoq. Unnerluutigineqartoq eqqartuussinermi siullermeerluni oqaaseqarpoq:
- Immaqa, akivoq.
Maanna eqqartuussisup naggataarutaasumik oqaaseqarnissaa eqqartuussiviullu aalajangiinissaa utaqqiinnarparput.
