Ilaanneeriarlungaana eqqarsaatigisariga ullumikkut mutiusumik inuunermi niuerpalaartitaanerata naalagaanersua, soorlu ” takusinga, assilisinga ingasavittarluni”, tassami soorlu ulluinnarni ileqqutoqqat qaqutiguinnaq pisalerlutik.
Qularinngilara eqqarsassasutit una eqianaasakkaluaq, kisianniuna susassaaleqinermi alutornavissunik pinngorartitsisoqalersinnaasartoq.
Ilaanneeriarlungaana eqqarsaatigisariga ullumikkut mutiusumik inuunermi niuerpalaartitaanerata naalagaanersua, soorlu ” takusinga, assilisinga ingasavittarluni”, tassami soorlu ulluinnarni ileqqutoqqat qaqutiguinnaq pisalerlutik.
Qularinngilara eqqarsassasutit una eqianaasakkaluaq, kisianniuna susassaaleqinermi alutornavissunik pinngorartitsisoqalersinnaasartoq.
Inuussutissarsiornerup iluani qangali kinguaariit nangitsisarnerat qanganngoreerpoq, soorlu aalisartup ernera aalisartunngortarluni allanilu, nuliaasorlu illumi ningiuusarluni.
Uagut kinguaariinni boomerit, tassa utoqqartaasut, sunngorniarnitta aningaasarsiornermik tunaartaqarnera pissutigalugu uuttortarluarneqarsimavugut piumaffigineqarlutalu ilinniagaqaqqulluta. Qujanaqaaq-una ilikkagaqarsimagatta, sulimi ilinniarluarsimasuunissaq piginnaanngorsarsimanissarlu pisariaqaqaat.
Nittarsaassat
Inuusuttorpassuit kinaassutsimikkut ilisarnaataat soorlumi nioqqutissaq nittartaanneqartuartussaq. Pisunut ilaassaguit ”takunnga” piumasaqaataavoq.
Tamatuma angummanniapiloorneq kinguaariinnilu pisoqaanerusut ileqqutik malillugit silarsuaanni pisunut malinnaajunnaarsitsisarpoq – suli taamatut inuusoqarasugalugu.
Uagut, ilaqutariinni - meeraqqortuukkormiuneersut – peroriartorpugut angajoqqaajusut naleqartitaat toqqammavigalugit, ataatsimoornermik, kristumiutut inuunermik ilaqutariinnermillu pingaartitsiffiusuni – inuusuttunngorattali mumisitsinianut akuliukkatta tussiutit rockerpalaannguamik taarserneqarput.
Uanga nipilersoriaaseq taanna qatsussinnaanngilara – qatsutingaartarpakkali inuusunnitsinni uisakajaartitsinermik suli attassiinnarniartut, taamatullu pissuseqarnerup kinguaariit tulliinut ingerlaqqittarnera, naak sorpassuit allat mumisitsinerup nassatarisimagaluarai.
Kissaatiginartaraluassusia inuiaqatigiit siumut aallarsarnissaat, siumut allortoqartorlu sorianngitsoq utersaartaqattaaginnarani.
Ingasavissut
Kiammi kissaatigissanngikkaluarmagu inuiaqatigiit ilungersoruluttitaanerisa itinerusumik isumasiorneqarnissaa, inuusuttuniit utoqqarnut atugarititaasut sumi tamaani atuuttut pineqartillugit.
Iluarsartuussisoqalissaaq, atuarfeqarneq, peqqissuseq assigisaalu pitsanngorsarniaraluarlugit iluatsippiarnerli ajortunik. Kiammi suliat iluatsinngitsoortuartut qatsutinngimmagit?
Amerlaqaat inuiaqatigiit ingerlarsorneranni akunnattoortitaasartut, iluamik inuujunnaarlutik, stressilerlutik, ersiortunngorlutik ajorluinnaraangallu imminut toquttoqartarluni.
Nalaattakkat ajortut qaavisigut nunarsuarmi ulluinnarni piviusut tujorminartut pissaanermillu atornerluiffiusut nalaannikuuvaatigut, pisoorsuit asuli pisut naalagaaniangaalermata aammami tech-gigantit aalajangersakkaminnik malinneqqusinerujussuat atuummat paatsiveerussaaqataaqisumik.
Assersuutigalugu inooqatigiinnermi tusagassiuutit ilusilersugaanerisa ukkataraatigut, kisimik malugeqqullutik ajornerpaasorli tassaavoq naammagittarluta akuersaaginnartuunerput.
Akulikitsunik misigisanngiliuk soorlu nakkutigineqartutut innerit, nalilersorneqarlutit nioqqutissatullu ilusilersorneqarlutit? Ikinngutitit misigisatillu like-ennartarlugit peqatigivinnagit.
Apereqqilaarlakkit-aat: qanga kingullermik ikingutitit qanigisatillu naapisimaarpigit, nuannisaqatigalugillu nalunaaquttap akunnerini marlunni pingasuniluunniit.
Aperilaaginnartungaana!
