Eqqarsaatini allamut saatinniarlugit killormut allattartoq

Kuultinik saffiortoq Nadja Kreutzmann inuit nittartakkatigut naapeqatigiittarfiinik sivisuumik atuinngikkallareerluni atuisaleqqissimalluni Facebookimi quppernermigut nalunaarpoq. Annilaanganermik nappaatini pissutigalugu sapinngisaminik ajorunnaarniarluni atuiunnaartariaqarsimavoq.

AG-mit ersinngitsumik nappaat, annilaanganeq, eqqartorniarlugu ungasinngitsukkut pulaarparput.

- Silattoramali annilaanganeq ilungersuutigisarnikuullugu oqaatigisinnaavara.

Maanna 43-nik ukioqarpunga, aammalu meeraallungali annilaangasareersimagunarpunga, Nadja Kreutzmann, annilaanganermik nappaateqarnermi saniatigut uummalluuteqarami annilaanganerup timikkullu ersiutit immikkoortinnissaannik ilinniartariaqarsimasoq, oqarpoq.

- 30-t sinnilaarlugit ukioqartunga aatsaat paasineqarpoq. Uummalluut uloriananngilluinnarpoq, uummatiga ilaannikkut eqqumiitsumik kassuinnartarpoq. Uummatiga akunneqatigiikkaartumik kassuttoq malugisinnaaniassagakku ullormut marloriarlunga uummallunninnut nakorsaatitortarpunga. Sulili uippallersinnaasarama malugisarpara. Annilaanganeq ilungersuutigiuarpara, atugaralugulu sakkortuvoq.

Nadja annilaangaleraangami – piffissami sivisuumi – ilummut anersaarpallaalertarlunilu sukkavallaamik silammut anersaartulertarpoq. Anertikkarnertut ippoq, taamaaligaangamilu timaani CO₂ annikippallaalertarmat timaa kakillaalulerlunilu, aqullaanngujuulerlunilu uissanngulersarpoq.

- Ilaannikkut peqitertuinnanngornissama tungaanut arriitsumik anertikkarsimasarpunga. Qerattarlunga. Tamannalu toqulersutut misinnarsinnaavoq. Kisiannili ambulancenut sianersimaniariarlunga ikiorneqartussanngorlunga paasigaangakku arriitsunnguamik qasukkariartoqqilertarpunga. Tassami tamarmi qaratsanneerpoq. Qarasara aallasakkaangat timera qisuariartarpoq, Nadja Kreutzmann nassuiaavoq.

Trivial Pursuit nillorutillu

Nadja Kreutzmann taamaalluni timmisartortilluni uippallilerpoq. Meriarfissaq qanerminut tutseriarlugu anersaartulerpoq.

- Silaannaaruttutut misiginartarami kukkunertut misinnartarpoq. Taamaammat puussiaq silaannaqanngimmat, silaannarlu atoqqiinnartarakku, kukkusutut misinnarpoq. Siullermillu taamaalioreerlunga kakillaalutitsiunnaarlunga paasivara. Timera CO2-mik, suerulluinnarsorisaraluannik, pissarseqqippoq.

- Uippallilerlunga malugigaangakku sorlukkut anersaartorlungalu uinngiarsunngikkaluarlunga uinngiarsorniartutut qanera inissillugu qanikkut silammut anersaartoqqissaarnissara sungiusartarlugu aallartippunga. Taamaalillunga CO₂ timinniitiinnartarpara, taamaalillungalu uissanngulernangalu, kakillaalutsitsilernangalu, sakissakkut naqisimaneqartutut misiginangalu allanik ersiuteqarneq ajorpunga. Tassa anersaartoqqissaarneq iluaqutima ilagaat, Nadja Kreutzmann oqaluttuarpoq.

Imminut allamut saasarneq Nadjap aamma paasivaa.

- Qarasaq 100 procentimik uippallertitsilertarpoq. Aallaqqaammullu uiga pikkoreqaaq, ikiuukkumasarmallu iluatsitseqaanga. Annilaangalerlunga malugisinnaagaangakku, allamut saasassassugut oqartarpunga. Qarasaq allamut saalluinnassaaq.

Nadja Kreutzmannip uia akisassaanik apersulertarpoq, taamaalillutillu Trivial Pursuitimi nallukattaasat sumut tamaanga nassartalerpaat.

- Taakkunanngaanniit atuaannartarpoq. Uangalu apeqqutit akissutissaat eqqarsaatigeqqissaartarpakka. Kisiannili kisimiinnissara annilaangagisalerpara. Ilaginngippangami? Sianerfigigukkumi akisinnaanngippat? Kiap taava ikiussagaminga? Annilaanganissara annilaangagisalerpara.

Killormut allassinnaaniassagami pappiaqqamik nassataqartassalluni paasivaa. Taamaaliornikkut qarasaa sulilerlunilu eqqarsaatai allamut saattangaarmata annilaanganini puigortarpaa.

- Timmisartortillunga allatut pissusilersorsinnaananga misigisimagaangama annilaangalersinnaavunga. Taava pappiaqqamik tiguseriarlunga assersuutigalugu Kalaallit Nunaat Tivolimi killormut allattarpara. Qarasara taamaalilluni Tivoli I-mik, L-imik O-millu naaneqartoq eqqaamaniarlugu nukippassuarnik atuilertarpoq. Qarasara ima ulapputeqartigisarmat annilaanganeq maluginiarneq ajorpara. Qarasaq allamut nukissamik atuimmat timikkut malussarpallaarunnaarsimallunga piffissap ilaani paasilertarpara.

Annilaanganeq ilaannikkut ima sakkortusartigaaq Nadja Kreutzmannip iluaqutigisartagai sunniuteqaratik. Taamaaligaangami nammineq iliuuseqartarpoq.

Assersuutigalugu Pascuccimut iserluni nillorummik qinusoqarsinnaavoq, nillorullu oqummiuttarpara. Qanermi misigisaq ima nillertigallunilu sakkortutigaaq qaratsap annilaanganeq pinnagu tamanna eqqarsaatigilertarlugu. Aamma inuit ilaat nillorummik assamminni illuttut tigumiaannartarput.

- Akuersaarneq allamullu saasarneq pineqarput. Aap,massakkut annilaangalluni uippallilerneq akueralugu. Tamanna ajunngilaq, qaangiuteqqissaqqaarpoq. Qaangiuteqqittuaannarpoq. Iluaalliornarnerpaartaa pinngitsoortinniarlugu qanoq iliorsinnaavunga? Imaassinnaavoq aamma appelsiina qalipaajarlugu naamallugulu iluaqutaasoq, tassami tikka ersarissuummat qarasara uippallertitsinani allatut eqqarsalissaaq.

Annilaanganermut nakorsaatit

Nadja Kreutzmann uinilu marlunnik meeraqarput, kuultinik saffiortutut ilinniarsimasuuvoq saffiukkanilu Nuummi Tuapannguani angerlarsimaffimmini suliarisarpai. Siusinaartumik soraarnerussutisiaqalerusunnginnami Danmarkimi sivikillisamik ilinniarpoq. Ullumikkut Nuummi inuulluarpoq.

- Ukiut arfineq-pingasut maanga piniarsaraanga. Piffissami tassani nakorsaatinik atuisimagama anigorsinnaasimallugu nalunngilara. Annilaanganeq atajuaannarpoq, timikkut misigineqartuaannarami qasunartorujussuuvoq. Anniaatigineqarsinnaallunilu nuanniitsuusinnaavoq, kisiannili aamma qasunarnerpaalluni.

- Tunniutiinnarlunga eqqarsarnikuuvunga. Taava tarnikkut nappaatillit immikkoortortaqarfiannut unitsinneqarpunga, tassanilu toqorusunngitsunga paasivaat. Taamali misigisimaneq naammagiunnaariga. Piviusumimmi uumarusussuaarpunga.

Nadja Kreutzmann Cetralinimik, nakorsaatinik isumatsaqqanermut atorneqarsinnaasumik aammali annilaangajunnaartitsisinnaasunik, tunineqarpoq.

- Suliartorsinnaalerpunga. Meeqqakka isumagisinnaalerpakka, qasoqqasimangaarama annilaanganinnillu sunnerneqarsimangaarama nammineq isigisakka kisiisa ukkatarisinnaasimavakka. Allatulli nalinginnaatigisumik filmeriarsinnaalerlungalu kaffisorniartarfiliarsinnaalerpunga.

Nadja Kreutzmann maanna qaammatialunni nakorsaatitunngilaq, nakorsaatinillu atuiunnaarniarnermini malussarisseqqasimavoq.

Nakorsaatitorunnaarninnut suna peqqutaava?

- Annilaanganeq tarnitsinni aallartittartoq timitsinnullu sunniuteqartartoq maanna paasilluarpara. Tarnikkullu ajornartorsiutikka aqussinnaalerumallugit eqqarsarpunga. Taamaaliorsinnaallunga aamma misigivunga.

- Annilaangajuaannarpungami. Ersiutilli malunniutilerpata annilaangajunnaarniarlunga qanoq iliorsinnaanerlunga nalunngilara. Assersuutigalugu issiallunga sulitillunga timiga eqqissiviilliuleraangat pisuttuartarpunga. Immaqa marloriarlunga illu kaajallallugu iserlungalu. Eqqarsaatikka aqussinnaajumallugit misigisaatikka atortariaqarpakka, taanna oqarpoq.

Nadja Kreutzmannip ukiorpassuarni annilaangasareerluni nappaat taanna paqumigineqarunnaartoq paasivaa. Tarnip pissusaanik ilisimasalimmik oqaloqateqartuarlunilu ikiorneqartarpoq. Kisianni Danmarkimi qimuttuitsorluni uippallilerluni oqarnera ajornannginnerulersitsisut ilagaat. Saniliata oqaloqatigilerpaa taamaalillunilu uippallerneraniit allamut saasarlugu.

Maanna nappaatini ammasumik eqqartortarpaa, aamma inuit allat ilisimasaqarnerulernissaat paasinnittuunerulernissaallu kissaatigaa.

- Annilaanganeq pillugu ilisimasanik siammarterisinnaanera neriuutigeqaara, inuiaqatigiiarannguuvugummi immaqa kanngusuutiginnittartut imaluunniit qanoq atugaqarnerluta allanut ilisimatitsiumanngitsut. Uannut paquminarunnaarnikuuvoq. Taamaattuuginnarpungami, taanna oqarpoq.