Erik Jensen: Kongressimi ilaasortanik ataatsimeeqateqareerlunga eqqissiallappunga

USA-p kongressianit aallartitat aamma Folketingimut Inatsisartullu nunanut allanut sillimaniarnermullu ataatsimiititaliaanni ilaasortat tallimanngornermi ualikkut ataatsimeeqatigiipput.

Nammineq aalajangiisinnaatitaanermut tapersersuineq 

Erik Jensen (S) peqataasut ilagaat, taassumalu kalaallit isumakuluutaat tusarnaarneqarlutik namminiilivinnissamik kissaataallu tapersersorneqangaartut maluginiarpaa.

– Ataqqeqatigiissasugut siunissamullu isiginiarluta oqaloqatigiissasugut oqaatigineqarpoq. Isumakuluutit pineqartut aaqqissavagut. Ataaserli qularnanngilaq: Ataatsimoorpugut, Amerikamiullu nammineersinnaanerput tamallu oqartussaanerisigut pisinnaatitaaffigut tapersersorpaat. NATO-mut ilaasortaavugut, tamannalu paasilluarneqarsinnaavoq. Pissaaneq pingasunut avinneq eqqaamasariaqarparput, taamaammallu præsidentip oqaasii aqunneqarsinnaanngillat. Amerikamili kongressimi ilaasortat isumakuluutigut paasilluarsinnaavaat.

Neriuuteqarnartoq 

Suleqatigiissitap Kalaallit Nunaata tigunissaa oqaluuserissagaa Trumpip oqaaseqartartua Karoline Leavitt ippassaq oqarpoq. Pisoq pillugu ippassamut sanilliullugu ullumikkut eqqissisimaneruit?

- Aap, Trumpip naalakkersuisoqarfianit nalunaarutit kingulliit taamaakkaluartut eqqissisimaneruvunga. Præsidentip Kalaallit Nunaata pisiarinissaanik ilanngunnissaanillu kissaateqarnera tapersersorneqannginnerusoq USA-mi isumasiuinerit aamma takutippaat.

– Demokraatiskiusumik aqutsineq upperaarput, tamannalu amerikamiut aallartitaasa ullumikkut aamma oqaatigaat. Imaassinnaavoq kongressimi ilaasortat tikeraartut Trumpimut qanittuaranngitsut, kisianni asuli toqqagaanngillat. Pissaaneqarput, maannakkullu isummagut saqqummiuppagut, qularutiginngilaralu arlaannik allannguiumaartut. 

– Tapersersorneqaqaagut. Tamanna neriuuteqarnarpoq, Erik Jensen oqarpoq.