Nalunngilat. Uangalu nalunngilara. Ukiup aappassaa
pingaarnertut oqallisaalluni nuanninngilaq.
Soqutigittaatsut oqassagaluarput:
Pinnguartorsuaq-una, taanna Trumpi. Ilumoorussisorliuna. Ilerasuuteqanngilaq.
Imminuinnaq eqqarsaatigingaarmat kiisa qaammat millisuusivoq.
Nalunngilat. Uangalu nalunngilara. Ukiup aappassaa
pingaarnertut oqallisaalluni nuanninngilaq.
Soqutigittaatsut oqassagaluarput:
Pinnguartorsuaq-una, taanna Trumpi. Ilumoorussisorliuna. Ilerasuuteqanngilaq.
Imminuinnaq eqqarsaatigingaarmat kiisa qaammat millisuusivoq.
Taamaammat-una kissaatiginangaartoq
ilungersunartorsiortilluta eqqarsartaatsitsigut nukittuniarnissarput.
Peqatigiilluta Naalakkersuisugullu tapersersorlugit, ernumaneq
aqutsisuutinnaveersaartariaqarparput.
Kingumut aperisarpugut qanoruna iliorluni naalakkersuisuni
isummiussapalaamini kalikkai matumanilu tiguaaniartutut isummerluni.
Allaanngilarmi inupiluit ittorsuat. Ikiortini anngaaginnartussiat peqatigai
kingunissanillu eqqarsaratik naalakkiutaanut naalaannartarput. Inupiluit
ilisarnaatillit natsamik teqqialimmik aappillarissumik qalipaatilimmik
qaavanilu oqariartuutilimmik.
Tamatta misigaarput matumani nunarsuarmioqatigiinni
isumaqatigiissutit pissuserissaanermullu malittarisassat atuuttartut matumani
USA-p iliuusaani atuutinngilluinnartut. Atuuttummi tassaammata Trumpip isumai –
qanorluunniit kinguneqassagaluarpata.
Sulilluarneq
Taava Kalaallit Nunaata Danmarkillu ataatsimoorlutik
nunarsuarmioqatitsinnik suleqatissarsiorneri nalilerujussuupput, tassunga
ilanngullugit Europami naalagaaffiit politikerillu amerikarmiut, Trumpip
Kalaallit Nunaannik tiguaanialersaarneranut akerliusut.
Pingaarluinnartuuvoq Trumpikkut uagutsinnik
avissaartuutsinnginnissaat, ”uagut” tassaagutta nunatsinni innuttaasut ilaat
imaluunniit Kalaallit Nunaat Danmarkilu. Taamaattumik Naleqqakkut politikerillu
allat avissaartuutsitsiniartuarnerat akisussaassuseqanngitsumik iliorneruvoq.
Aap, naligisatut pineqarnissaq peqataatinneqarnissarlu
pingaaqaaq. Aamma danskit akornanni avissaartuutsitsinermut peqataasut
amerlaqaat, ilaatigut oqariartuutigisarlugu Kalaallit Nunaat Danmarkip
oqartussaaffigigaa. Amerikarmiut tv-atigut danskit politikerit ilaat
apersorneqarluni oqaluttuartoq takunikuuvara oqartoq ”Kalaallit Nunaat
Danmarkip pigaa”. Taamatut oqartarneq qanganngoreerpoq
akuerineqarsinnaanngitsoq.
Tamanna danskit politikerit nuimanerit partiillu
qinersereernerup kingorna sulilersussat paasisariaqarpaat.
Piffissanngorumaarpoq qanoq aaqqiissuussaanissarput pllugu isummernissaq,
naligiissitaanerunermik malitseqartussaq. Taannali maanna oqallisissaanngilaq
utaqqissuttariaqarlunilu!
USA-p Kalaallit Nunaannik soqutiginninnerata
paasitippaatigut inuiattut inuiaqatigiittullu qanoq pingaaruteqartigisugut.
Trump suaartalissaaq: ”We need Greenland!” timmisartumi motoria nipilioqisoq
ingiortigalugu, imaanngilarli maanna qulangiagaatigut. Taama oqartarpoq
siunnersortimi oqaluttuummanni Kalaallit Nunaat USA-p illersornissaanut assut
pingaaruteqartoq. Imaammi pingaartigimmat nunarsuatsinni tamanik
akeqqersulerpoq aningaasarpassuillu atorlugit nunarput tiguarusullugu,
piumasaarsorniassagamik.
Naami qujavoq
Oqallisiginngilarput amerikarmiut nunatsinniinnerminni
akiliuteqartannginnerat, qanga isumaqatigiissutitoqqat USA-p, Kalaallit Nunaata
Danmarkillu akornanni tunngaviummata. Immaqami aperigaanni: ”
Ataasiaannarlusiluunniit qujanikuuvisi?”
Nunaqqatit-aa, sinnerluta ataatsimiigiarlutillu
isumaqatiginninniartartuususi, inuuserissillusi imminullu tatigalusi
naleqartilluarlusilu USA Danmarkilu naapittarniarsigit.
”Salliusariaqaraluarpugumik” oqalunneq maanna pisariaqanngilaq. Naligisatut
pisa sorpajunnik taamaattariaqarsorisanik piumasaqarata. Tamakku maanna
soqutaanngillat.
Piumasaqaatigut attuumassuteqartuni saqqummiunneqarlit aamma
danskinut tunngasut ilutsinni oqallisissaapput maaniinnarmiunngitsoq.
Anneruniarnerit USA-p tiguaaniarnermini
tunuartissutiginavianngilai, naak taamaattoqarsinnaanera
silatusaarnerunngingaarmat eqqarsaatigiuminaalluinnaraluaqisoq.
Tapersersoqatigiinneq naligiittut pissuseqarluni iluaqutaanerpaassaaq –
Danmarkiuppat, Europaappat imaluunniit ”USA-mi illersortigut”
nunarsuarmioqatigullu pineqartillugit.
