ILINNIARNEQ
Suliffissanik Danmarkimi nittarsaassineq
Suliffissanik nittarsaassineq Københavnimi Aarhusimilu ukiumoortumik aaqqissuunneqartartoq marsip 28-ani 29-ani 2026-mi pissaaq. Ilinniartut allallu Kalaallit Nunaanni sulilernissamik soqutiginnittut takuniaasinnaapput. Inu:it nittarsaassisussat ilagaat.
Kalaallit Nunaata Sinniisoqarfia ukioq manna aamma suliffissanik nittarsaassinermik aaqqissuussivoq. Aaqqissuussaq kalaallinut ilinniagaqartunut allanullu Nunatsinni sulilerusuttunut tunngatinneqarpoq. Ukioq manna Aarhusimi Københavnimilu nittarsaassinerit ingerlanneqarput, taakkunanilu kalaallit suliffeqarfippassui peqataassallutik.
Assi: Kalaallit Nunaata sinniisoqarfia.
Suliffissanik Danmarkimi ukiumoortumik nittarsaassineq Kalaallit Nunaata Sinniisoqarfianit aaqqissuunneqartartoq marsip 28-ani 29-anilu 2026-mi pissaaq.
Kalaallit Danmarkimi ilinniartut allallu Nunatsinni sulilernissaminnik soqutiginnittut suliffeqarfinnit kattuffinnillu Kalaallit Nunaanni inuussutissarsiornermi periarfissanik oqaluttuarsinnaasunit naapitaqarsinnaapput.
Aarhusimi Københavnimilu
Suliffissanik Københavnimi ukioq manna nittarsaassineq Nordatlantens Bryggemeeqqissaaq, tassani aallartitaqarfianiissalluni.
Aarhusimi Aarhussalenimi, Aarhus Banegårdip eqqaaniittumi, ingerlanneqassaaq.
– Piffissami matumani assoralisimaarfiusumi isumalluarnissaq pingaaruteqarpoq, Kalaallit Nunaatalu siunissaanut ungasissumut takorluuisinnaanissaput – qanorluunniit pisoqassagaluarpat, Mads Lumholt, Sinniisoqarfimmeersoq suliffissanik nittarsaassinermut, pikkorissartitsinernut aaqqissuussinernullu akisussaasoq oqarpoq.
Kalaallit ilinniartut ualikkut tassaniinnissaannut inniminneqqasoq
Inuit assigiinngitsunik tunuliaqutallit ulluni taakkunani marlunni nalunaaqutaq qulingiluaniit ulloqeqqata tungaanut nittarsaasunut takuniaanissamut periarfissaqarput. Tassani kalaallit suliffeqarfiutaat peqatigiiffiilu pisortanit namminersortunillu ingerlanneqartut nittarsaassissapput. Kalaallit ilinniartut, aappaat, ilaqutaat ilinniaqataallu ualikkut tallimap tungaanut tassaniissinnaanissaanut sumiiffik inniminnerneqaqqavoq.
– Ualikkut aaqqissuussinermi kalaallit ilinniartut tikilluaqqussavavut, tamatumalu kingorna nittarsaassiviit ammassapput. Tamatuma kinguninngua nittarsaassisut tamarmik saqqummiutissavagut, tassani sekundini 60-it atorlugit suliffissanut periarfissat, sulisunut iluaqutissat il.il. pillugit saqqummiussisinnaassallutik. Tamatuma saniatigut inimi sanileriiaani assigiinngitsunik saqqummiussisoqarpoq. Naggataartoqartinnagu kalaallit suppiliarisartagaannik sassaallertoqassaaq, DJ Aviaja tusarnaartitsissaaq, Mads Lumholt oqarpoq, suliffissanik nittarsaassinermi ulluni marlunni eqqugassarpassuarnik makitsisoqartassasoq, ilaatigut MacBook Pro-mik, ilanngullugu oqaatigalugu.
– Ilinniartunut Kalaallit Nunaanni suliffittaarsinnaanerat, aammali suli ilinniartuugaluarluni suliffeqarneq aqqutigalugu Kalaallit Nunaannut attaveqartoqarsinnaanera paasitikkusupparput.
Morten Kronvold Lykke Olsen, Inu:it-mi pisortaq
Air Greenland, EMJ-Atcon Greenland, Greenland Airports, Greenland Business School, Inuit:it, Inussuk, KNB Brugseni, Kommuneqarfik Sermersooq, NunaGreen, Peqqik – Kalaallit Nunaanni peqqinnissaqarfik, Permagreen, Polar Seafood, Royal Greenland aamma Tusass nittarsaassiartorlutik maannamut nalunaarsimapput.
Inu:it suliffissanik Danmarkimi nittarsaassinermi perngaammik peqataavoq. IT-mi ilinniagaqartut amerlanerulernissaat suliffeqarfiup kissaatigaa.
Assi: Inu:it
IT-lerisut perngaammik peqataassasut
Suliffeqarfik Inu:it, Kalaallit Nunaanni Danmarkimilu immikkoortortaqarfilik, suliffissanik Danmarkimi nittarsaassinermi perngaammik peqataassaaq.
Suliffissanik nittarsaassineq 2026
Kalaallit Nunaanni suliffissanik nittarsaassnik 2026 Danmarkimi Kalaallit Nunaata Sinniisoqarfianit aaqqissuunneqarpoq. Nittarsaassineq Københavnimi Nordatlantens Bryggemi arfininngornermi marsip 28-ani Aarhusimilu Aarhushallemi Banegårdip eqqaani marsip 29-ani pissaaq.
Ulluni taakkunani marlunni soqutiginnittunut qulingiluaniit ulloqeqqata tungaanut takuniaasinnaapput, 12.30-miillu 17.00-ip tungaanut Danmarkimi kalaallit ilinniartut kisimik peqataasinnaapput.
Paasisaqarnerorusukkuit una tooruk
– Ilinniartunut Kalaallit Nunaanni suliffittaarsinnaanerat, aammali suli ilinniartuugaluarluni suliffeqarneq aqqutigalugu Kalaallit Nunaannut attaveqartoqarsinnaanera paasitikkusupparput. Ilinniartunik ukiuni kingullerni sulisoqartarpugut, taakkualu ilaat suliarisartakkatsinnit allaanerusunik Danmarkimi ilinniartuupput.
– Ilinniagaalli suliassanut pisariaqartitsiffiusunut tunngapput, taamaalillutalu suleqatigiilerpugut. Kalaallit Nunaannit Danmarkimiillu sulisunik peqataatitaqartarpugut, tassani ilinniartunut suliffeqarfitta taamaattuunerat takutikkusukkatsigu, pisortaq Morten Kronvold Lykke Olsen oqarpoq, nangillunilu:
– IT-mik ilinniagaqartunik kalaallinik inuusuttunik pissarsisinnaagutta nuannaarutigissagaluarparput, ilinniartuuffigisinnaasaanik neqeroorfigisinnaavavut, taavalu Danmarkimi atuarnerisa nalaanni tapersersorlugillu Kalaallit Nunaannut suliffimmik misiliinissaannik neqeroorfigisinnaallugit.
Odense-København aamma Aalborg-Aarhus bussinik akeqanngitsumik angallassisoqarnissaa aaqqissuunneqarpoq. Aammattaaq kalaallit ilinniartut KBH-mit, Odense-mit, Aarhusimit imaluunniit Aalborgimiit ornigutinngitsut DSB Orange-mik bilitsit akiliutaat utertinneqarsinnaapput.
