Troels Lund: USA-p Kalaallit Nunaannut saassussinissaa takorlooruminaappoq
Præsidentip Donald Trumpip qeqertaq tigurusukkaluarpaguluunniit USA-p Kalaallit Nunaata tiguarnissaa illersornissamut ministerip ernumaginngilaa.
Illersornissamut ministeri Troels Lund Poulsen illersornissamullu pisortaq Michael Wiggers Hyldgaard illersornissamut ministereqarfiup silataani pingasunngornermi januaarip 14-ianni 2026-mi tusagassiortunik katersortitsipput.
Assi: Sebastian Elias Uth/Ritzau Scanpix
Illersornissamut ministerip Troels Lund Poulsenip (V) USA-p Kalaallit Nunaannut saassussisinnaanera takorlooruminaatsippaa.
Illersornissamut ministeriaqarfiup silataani tusagassiortunik pingasunngornermi katersortitsinermini oqarpoq.
- Amerikamiut Kalaallit Nunaannut saassussisinnaanerat takorlooruminaalluinnarpoq, Troels Lund Poulsen oqarpoq.
Sverigep ministeriunerata Ulf Kristerssonip svenskit sakkutuuisa naalagaasa ilaat Kalaallit Nunaannut pingasunngornermi tikissasut X-imi saqqummiuteqqammeraalu tusagassiortunik katersortitsisoqarpoq.
Sverigemi ministeriuneq naapertorlugu Danmarkip piumasaqaataa malillugu sakkutuut naalagaat aallartinneqarput.
Nunanit allanit sakkutuut allat ilagalugit danskit sungiusarnerannut Operation Arctic Endurance-mut ilaassapput, Ulf Kristersson allappoq.
Nato-mut ilaasortat qanimut suleqatigalugit Kalaallit Nunaanni eqqaanilu sakkutooqatigiit ullumi pingasunngornermiit amerlanerulissasut, illersornissamut ministeeriaqarfik aamma Naalakkersuisut pingasunngornermi siusinnerusukkut nalunaarput .
Europami Atlantikullu illuatungaani isumannaallisaanermut iluaqutaasumik Nato-p Issittumi sunniuteqarnerunissaa aamma issittumi pissutsini sungiusarsinnaanissaa siunertarineqarpoq.
