Sulorartartut Kattuffiata Kujataani peqatigiiffiit suleqatigiinnerat nukittorsarpaa

Sulorartartut Kattuffiata ukiap ingerlanerani siunnersorti sungiusaasorlu Miko Kongstad Kujataani sivisuumik angalatippaa, tassani sammineqarlutik najukkami klubit tapersersornissaat, sungiusaasut isumassarsisinneqarnissaat aamma kattuffiup sulorarnermilu kajumissutsiminnik suliaqartut suleqatigiinnerisa nukittorsarnissaat.

Angalaneq Timersoqatigiit Kattuffiannit, Badminton World Federationimit, Badminton Europe Confederation aqqutigalugu Kommune Kujallermit, najukkanilu klubit tapersersuinerisigut pivoq.

Nunanit tamalaanit, kommunimit najukkamiillu tapersersuineq peqatigalugu angalaneq ingerlanneqarpoq, tamannalu sungiusaanermik peqatigiiffilerinermillu nukittorsaalluni.

Klubit ineriartortinneqarnissaat aamma kajumissutsiminnik suleqataasut qitiutillugit

Miko Kongstadip angalanermini illoqarfiit sisamat tikippai: Narsaq, Nanortalik, Paamiut aamma Qaqortoq. Illoqarfiit pingasut tikinneqarnissaat pilersaarutaagaluarpoq, timmisartulli kinguaattoorneri pissutigalugit, Qaqortumi immikkut uninnganeq iluatsillugu, illoqarfimmi tassani timersoqatigiiffimmik sungiusaasoqarluni.

- Klubit pingasuinnaanngitsut sisamalli tikinnerat kattuffimmut pitsaalluinnarpoq. Tamanna najukkami soqutiginninnermut naleqqussarsinnaanermullu uppernarsaataavoq, aamma timmisartut kinguaattoorneri ajunngitsumik kinguneqarsinnaapput, Miko illarluni oqarpoq.

Kujataani illoqarfinni angalanermini Miko Kongstad timersoqatigiiffiit sungiusarnerinik tamanik isumaginnippoq – sapaatip akunnerini pingasuni Narsami, sapaatip akunnerini pingasuni Nanortalimmi aamma sapaatip akunnerani ataatsimi Paamiuni. Tamatuma saniatigut kajumissutsiminnik suleqataasuni siulersuisut ataatsimiitittarpai oqaloqatigisarlugillu, ulluinnarni klubimik suliaqarnermut siunnersortarlugit, isumassarsisitsinissamut atorsinnaasaannillu nutaanik tuniorartarlugit. Sulorarnermi sungiusartarnerup nukittorsaanissaa kiisalu kattuffiup timersoqatigiiffiillu attaveqaqatigiinnerisa pitsaanerulersinnissaat siunertaavoq.

- Peqatigiiffiit suliniarnermikkut tapersersorneqarnissaat pineqarpoq, aammali iliuuseqarluartarnerannut nersuiniarneq pisarluni. Kajumissutsimik suleqataaneq illoqarfinni assigiinngitsuni ingerlanneqarluarpoq, Miko tulluusimaarluni oqaluttuarpoq.

Shuttle Time atorlugu sulorartarneq atuarfimmut eqqunneqartoq

Angalanermi Shuttle Time-mik ilinniartitsineq pingaaruteqarpoq, taannalu Badminton World Federationimit (BWF) ineriartortinneqarsimalluni. Programmi aqqutigalugu atuarfiit sulorarneq timersornermik atuartitsinermut ilanngussinnaavaat – ilinniartitsisorlu akuerisaasumik ilinniagaqarsimasariaqarpoq. Miko Kongstad, BWF aqqutigalugu Shuttle Time-mi ilitsersuisartutut ilinniarsimasoq, tassunga atatillugu Paamiuni meeqqat atuarfianni ilinniartitsisunik, perorsaasunik ikiortinik aamma klubini sungiusaasunik ilinniartitsivoq. Sungiusaanerup Nanortalimmi aamma ingerlanneqarnissaa pilersaarutaagaluarpoq, kisianni atuarfimmi paatsuuinerit pissutigalugit kinguartinneqarluni.

- Shuttle Time meeqqat inuusuttullu amerlanerusut sulorarnermut peqataatinnissaannut periaasiuvoq pitsaasoq, neriuppugullu kingusinnerusukkut Nanortalimmi aamma taamaaliortoqarsinnaassasoq, Miko oqarpoq.

Naak Shuttle Time Paamiuni taamaallaat ingerlanneqaraluartoq, suliniummi takutinneqarpoq sulorartarneq atuarfinni qanoq iliuuseqarfigineqarsinnaasoq – taamaalillunilu meeqqat amerlanerusut timersornermik nuannaarutiginnilernissaat qulakkeerneqassalluni.

Siunissaq isumalluarfigineqarluartoq

Sulorarneq nunap immikkoortuani tunngavissaqarluartoq, Kujataani tikeraareernerup kingorna erseqqippoq. Timersoqatigiiffiit pimoorussilluinnarput, timersortartullu ineriartorusussuseqarluarput. Miko Kongstadip suliniuteqarnera timersuutinik sungiusaanermik aaqqissuussaanermillu pitsanngorsaanissamut nukissaqalersitsivoq.

- Kujataani sulorartartut siunissaat isumalluarnarpoq, Miko qungujulluni oqarpoq.

Miko sulorartarnermik ukiorpassuarni sammisaqarsimavoq. Nunatsinnit nunanut allanut unammisartuusimagami timersornerup ineriartortinnissaa aallussilluarfigaa. Kujataanut angalaneq piffissamik tunniusimaffiginnilluarnermillu atuiffiuvoq, Mikolli sulorarnermut utertitsilluni tunissuteqarnissap nuannaarutaanera kajumississutigisarpaa.

- Taama sivisutigisumik angalaneq ilinniartitsinerlu soorunami nukissaqarluarnissamik pisariaqartitsisarpoq, sulorartarnerulli ineriartortinneqarnissaanut ikiuussinnaanerup nuannaarutaanera annerujussuusarluni. Angalaneq uannut kattuffimmullu pingaarutilimmik paasisaqartitsivoq – tamatumanili sulorartarnerup inunnut maaniittunut qanoq pingaaruteqartiginera uppernarsarneqarluni, Miko oqaluttuarpoq.

Sulorartartut Kattuffiata angalatitsinermigut neriuutigaa, Kujataani sulorartartut qaninnerusumik ataavartumillu suleqatigiinnissaannut tunngaviliisoqarsimassasoq – siunissamilu sulorartarnerup ineriartortinneqartuarnissaa, peqatigiiffinni timersornertut aamma atuarfimmi timersornermik ilinniartitsinermi. Angalanerlu tamaanga uninngilaq. Miko aappaagu aallarteqqissaaq ilisimasani timersornermullu soqutiginninnini allanut ingerlateqqinniarlugit. Avannaanut Tunumulluunniit angalassanersoq suli paasinarsinngilaq – ataaserli qularutissaanngilaq: Nunatsinni sulorartarneq siamasinneruliinnanngilaq, aammali nukittorsarneqarluni, sungiusarnerit pitsaanerulissallutik peqatigiiffiillu ingerlalluarnerulissallutik, aamma pitsaassusiat suleqatigiinnerallu pitsaanerulissalluni.