Issittormiunik ulluni makkunani unammiuaartoqarnerani timersortartunt Issittumit tamarmeersut katersuutsillugit ujaminnannissaq angusaqarnissarlu kisimik ukkatarineqanngillat.
Kalaallit Nunaanni Arctic Winter Games aamma kinaassutsimik, ataatsimoornermik kulturikkullu tulluusimaarnermik sammisaqarfiuvoq. Kalaallit Nunaanni Timersoqatigiit Kattuffianni (GIF) pisortaq Jonas Jensen taama oqaluttuarpoq.
Issittormiunik ulluni makkunani unammiuaartoqarnerani timersortartunt Issittumit tamarmeersut katersuutsillugit ujaminnannissaq angusaqarnissarlu kisimik ukkatarineqanngillat.
Kalaallit Nunaanni Arctic Winter Games aamma kinaassutsimik, ataatsimoornermik kulturikkullu tulluusimaarnermik sammisaqarfiuvoq. Kalaallit Nunaanni Timersoqatigiit Kattuffianni (GIF) pisortaq Jonas Jensen taama oqaluttuarpoq.
- Peqataanerput timersornermut kulturimullu pingaaruteqarluarpoq. Inuusuttorpassuit unammiuaarnerit timersornermik ineriartortitsinissamut aallarniutitut atortarpaat, kulturikkullu peqataaneq kattuffitsimmi taamatulli aamma pingaaruteqartigaaq, taanna oqarpoq.
Inuit imminnut tarrarsorfiginerat Timersortartut Arctic Winter Gamesimi ilaatigut Alaskamit, Canadap avannaanit Kalaallit Nunaanniillu naapipput. Jonas Jensen naapertorlugu nunat taakkua akornanni naapinneq immikkut ittuuvoq.
- Assigiinngitsorpassuartigut assigiissuteqaratta nunat akornanni kulturikkut paarlaasseqatigiittarneq pingaaruteqarluinnarpoq. Ileqqutoqqagut assigiit amerlaqaat ataatsimullu tunuliaqutaqarlutik. Soorunami assigiinngissuteqarpugut, kisianni pingaarnerpaatut inuit unammiuaarnerni ataqatigiilluarput, taanna oqarpoq.
Ataqatigiinneq tamanna immikkut naleqartuuvoq.
- Allanik tarrarsorfeqarsinnaaneq pingaaruteqarluinnarpoq. Timersorneq politikkilu akulerutsikkusunngikkaluarlugit kisianni tarrarsofeqarneq taanna ukioq manna immikkut pingaaruteqarpoq. Timersornerup ataqatigiinnermik pilersitsisinnaanera nukittorsaataasarpoq, Jonas oqarpoq, Kalaallit Nunaannilu ukiuni kingullerni politikkikkut pissutsit innersuussutigai.
Pingaarnerpaatut inuit unammiuaarnerni ataqatigiilluarput
- Jonas Jensen, Kalaallut Nunaanni Timersoqatigiit Kattuffianni pisortaq
Piffissami Kalaallit Nunaata Issittumi pingaaruteqarnerata politikkikkut qullersanit oqallisigineqartarnerani kulturikkut timersornikkullu taamatut tarrarsorfeqarneq immikkut pingaaruteqarpoq.
Timersortartuunermit pisortanngornermut Jonas Jensenip Arctic Winter Games namminertaaq misigisimavaa. Inuusuttuulluni 1998-imi Canadami Yellowknifemi timersortartutut peqataasimavoq - ullumikkullu Kalaallit Nunaanni Timersoqatigiit Kattuffianni pisortatut peqataavoq.
Jonas Jensen 1998-imi Canadami Yellowknifemi Arctic Winter Gamesertoqarnerani peqataavoq. Ullumikkut Kalaallit Nunaanni Timersoqatigiit Kattuffianni (GIF) pisortaagami kalaallit timersortartut isiginnaartutut malinnaavigai.
Assi: Nammineq pigisaq
– Yellowknifemiikkama timersornermik nuannarinninnerulerpunga Canadalu nuannarilluinnalerlugu. Taamaammat maaniinnera immikkut nuannaarutigeqaara, taanna qungujulluni oqarpoq.
Kalaallit aallartitaat “Kalaallit Nunaat”-mik taaguuteqarlutik peqataaqqilermata aamma nuannaarutigaa.
– Aappassaanik Kalaallit Nunaannik taaguuteqarpugut. Siornatigut Team Greenlandimik taaguuteqartarpugut, namminerli oqaatsitta atornissaat uagutsinnut pingaaruteqarpoq. Timersortartut akuerineqartutut tulluusimaartutullu misigisarput, Jonas oqaluttuarpoq.
Nammineq timersortartutut unammersuarnerni peqataasarnikuunera maannakkut suliassaanut aamma sunniuteqarluarpoq.
– Angusarissaarnissaq qanoq misinnarnersoq nalunngilara. Taamaammat Kalaallit Nunaanni Timersoqatigiit Kattuffiat sinnerlugu ineriartortitseqataanera uannut inuttut suliakkullu pingaaruteqartorujussuuvoq. Tulluusimaaqaanga, Jonas Jensen oqarpoq.
Arctic Winter Gamesimi unamminerit maanna aallartimmata Jonas Jensenip aamma Kalaallit Nunaanni Timersoqatigiit Kattuffiata kalaallit aallartitaat qanimut malinnaavigissavaat. Naak ujaminnannerit angusallu pingaaruteqaraluartut, unammiuaarnerit aamma annertunerusumik tunngaveqarput: ataatsimoorneq, kulturi inuillu naapittarnerat. Immaqalu tamanna pissutigalugu maaniinnissaq pingaaruteqarpoq – unammeqataasunut unammeqataasarsimasunullu.
